أب قاسى و حبيب تخلى عنها
Date posted: June 28, 2010
السلام عليكم
ازيك يا مروة يارب تكونى بخير دايما
انا عندى 21 سنة فى اخر سنة فى الكلية من القاهرة ودى اول مرة ابعتلك فيها يارب مكونش بزعجك
مشكلتى انى حياتى فى البيت صعبة جدا والدى راجل شديد جداااااااااا وصعب قوى ومخلينا كلنا عايشين فى اكتئاب مستمر
لدرجة ان احنا كلنا والعيلة كمان بيتمنوا ليه الموت وبنكرهه ومتجنبينه تماما مفيش بينا وبينه اى علاقة ولا حوار مجرد بنخدمه بنشوف طلباته وبس وهو مريض وفى البيت على طول واحنا بنراعى ربنا فيه والحمد لله بيرفض اى عريس يتقدم عشان مش عايزنى اتجوز دلوقتى شايفنى صغيرة وبيأجل الموضوع تماما لاجل غير مسمى اصلا هو لو وافق على اى عريس هيطفشه من اسلوبه فى التعامل اصله كان ليه منصب كبير وطلع على المعاش وعنده حتة العظمة والكبر والسلطة مسيطرة عليه وان الناس كلها عبيد ليه
بس انا كمان مشكلتى التانية انى ارتبطت بواحد من سنة هو من محافظة تانية وانا فى القاهرة طبعا بنشوف بعض نادرا عنده 26 سنة وبيشتغل فى شركة مرتبه 1200 وطبعا بيصرف مرتبه كله طول الشهر مش بيحوش معندوش شقة ولا فلوس ولا اهله يقدروا يساعدوه وفاقد الامل ومحبط ودور على شغل كتير ووصل لمرحلة اليأس من كل حاجة
وشايف انه التحويش والجمعيات ده هتجيب ملاليم مش هتعمل حاجة فى وسط الشقق الغالية
انا اعصابى تعبانة جدا نفسى اطلع برا البيت وارتاح من والدى وفنفس الوقت بحبه جدا ومش شايفة نفسى مع راجل غيره
وهو مش مطمنى خالص مش عارفة احنا مرتبطين ولا لا ولا اخرتها ايه
وسيبنا بعض قبل كده بسبب الماديات ورجعنا ومقدرناش
انا بجد مش عارفة اعمل ايه ؟
——————————-
اهلا يا حبيبتى
احنا مش هنعرف نغير والدك و لا طباعه
لكن انا عايزاكى تحاولى تحطى نفسك مكانه
المرض خلاه يائس
و الفراغ خلاه عصبى
و الوحدة خلته كريه
و التمسك بالذى كان خلاه متسلط
غصب عنه
انتى و اخواتك مطلوب منكم على قد ما تقدروا تعاملوه بحنان و حب لانه حاسس انكم بتكرهوه و بتتمنوا موته و حاسس انكم بتخدموه من باب الواجب مش من باب العرفان بالجميل
انا عارفة انك زعلانة منه و مخنوقة لكن العجْز و العجَز صعبين جدا
اما بالنسبة للولد
حاله زى حال شباب كتير
لكن 1200 جنيه مش وحش
ممكن تتجوزوا فى شقة ايجار جديد و كل حاجة تيجى واحدة واحدة
لكن اهم حاجة النية .. و هو مقضيها و خلاص
العيب مش فى امكانياته المادية
العيب فى نظرته للحياة و نظرته ليكى
