fbpx
مونتيسوري مصر- تقدمها مروة رخا

ثقافة الخوف فى مجتمع منافق

 
 
 
هاى مروه أنا بعتلك قبل كده بس المرادى عندى مشكله أنا مش عارفة هى المشكله فيا و لا فى إختياراتى
 
الحكايه و ما فيها أنى قريب كلمت واحد زميلى من ايام المدرسة على الشات و هو إنسان محترم و اهلى يعرفوه و لما اتكلمت معاه حسيت أن بينا حجات مشتركه كتير حتى المستوى الإجتماعى تقريبا متطابق و لما كلمتو حست أنى قبل ما كمل الجمل الاقيه بيقول بقيتها حتى لما ابقى على وشك أسأل سوءال الاقيه جاوب عليه
 
المهم أنا إنسانه متدينه و مليش فى التظبيط عشان كده كل مكلم حد على الشات بقطع بعديها عشان عارفة أنى معنديش أى تطورات فى علاقاتى و أن اخرتى شات حتى نمرة تليفونى مبديهاش لولاد خالص ،المهم الولد ده حسيت من كلامه أنه مهتم بس هو فى كليه الطب
 
و سنه أدى يعنى صعب أنه يفكر فى إرتباطات و هو عاجبنى شويه بس طبعا عشان مشفتهوش وجها لوجه بقالى 6 سنين كده ف مش قادره اعرف أنا ممكن ابه ولا لاء و أنا خايفى أنى أتكلم معاه أكتر فأتعلق بيه و ممك هو من جواه يكون مش ناوى على إرتباطات من الأساس ف مش عارفه أكلمه بس كده ممكن أتعلق بيه و يطلع بيكلمنى مجرد كزمايل و لا اقطع و لو هو عاوزنى هيقول 
 
و عندى سؤال تانى هو لما يقعد الولد ده يكلمنى بال6 ساعات يبقى معجب بيا و لا عادى تضييع وقت

 

لأنى لما بكون بكلم حد كزميل بقفل معاه علطول و خصوصا لو حسيت أنه معجب و أنا من نحيتى مفيش حاجه عشان مشاعر الناس مش لعبه فهل ده طبيعى

و بعدين أنا بخاف أتعود على حد و اتجرح لو لقيت مفيش أى حاجه من نحيتو

و فيه حاجه كمان أنا متقدملى ناس فى الوقت الحالى بس مفيهمش الصفات اللى موجوده زى التوافق ده بس لو أتعرفت عليهم ممك أعجب بيهم بس أنا عامله زى اللى قدمها حاجه و عنيها على حاجه تانيه مش عارفة أعمل ايه و أقوله أنى متقدملى نا من باب أن أحنا زمايل و بحكى عادى ولا بلاش لحسن يفتكر أنى مدلوقه عليه

 
 
 ——————————-
 
ايه يا حبيبتى كم الخوف اللى فى كلامك دا؟
 
خايفة منه و خايفة من نفسك و خايفة تتعلقى و خايفة تتجرحى و خايفة تشوفيه و خايفة تقربى و خايفة تبعدى
 
ايه كل دا؟
 
انتى عاملة زى اللى خايف يموت فى حادثة فبطل ينزل الشارع و بطل شغل و بطل يزور الناس و بطل يقف فى الشباك و بطل يفتح الباب و فى الاخر مات برده بس مات من غير ما يعيش
 
اولا انا عايزاكى تقابليه
 
ايوة
 
دا زميل و انتى محترمة و هو محترم … اتقابلوا فى مكان عام و شوفى اصلا هيحصل قبول و لا لأ … مش يمكن اول لما تتقابلوا الموضوع يخلص و نرتاح
 
و عايزاكى تثقى فى نفسك شوية …. و تقتنعى ان مافيش حاجة هتحصل غصب عنك .. لا هتخرجى غصب عنك و لا هتقولى كلمة غصب عنك و لا هتعملى اى حاجة الا بكامل ارادتك
 
و بعدين ايه اللى هيجرا لو الموضوع باظ؟ ولا حاجة .. عادى .. ما كل يوم ناس بتحب و ناس بتفترق و ناس بتتجوز و ناس بتتطلق و ناس بتتولد و ناس بتموت .. عادى
 
اللى مش عادى و مش صح و مش صحى انك فى يوم من الايام تبقى ام و مايبقاش عندك حاجة تديها لبنتك غير الخوف .. لا خبرة و لا تجارب و لا نصايح عملية و لا حتى كلمة صح فى موقف صعب
 
وارد انه يكون مش بيفكر فى الجواز و وارد انه يكون متونس بيكى لانه مش بيخرج و بيذاكر على طول و وراد انه يكون بيتعامل من باب الزمالة و بس
 
لكن انتى مش هتعرفى هو عايز ايه و لا انتى عايزة ايه غير لما تخوضى التجربة و تتقابلوا و تتكلموا
 
من هي مروة رخا؟
مروة رخا: موجهة مونتيسوري معتمدة دولياً من الميلاد حتى 12 عام. Marwa Rakha: Internationally certified Montessori educator from birth to 12 years.

بدأت “مروة رخا” رحلتها مع “نهج وفلسفة المونتيسوري” في نهاية عام 2011 بقراءة كتب “د. ماريا مونتيسوري” عن الطفل والبيئة الغنية التي يحتاجها لينمو ويزدهر. تلت القراءة الحرة دراسة متعمقة للفلسفة والمنهج مع مركز أمريكا الشمالية للمونتيسوري

“North American Montessori Center”