غبية و استعجلت

Date posted: June 17, 2010


 
 
 
انا ححاول مطولش عليكى انا عندى 24 سنة عادية بس يمكن عقلى و شخصيتى هى اللى بتجذب الناس ليا-انا جالى ناس كتير و دخلت اكتر من تجربة عشان الاقى الراجل الصح و كلهم كانو عايزين خطوبة و جواز بس من نعمة ربنا عليا ان قبل كل مرة الموضوع يجى يكمل ربنا يكشفلى حاجة احس انى مش هستحملها
 
خلصت جامعة و اخدت كورسات لكن مشتغلتش يمكن عشان ظروف مامتى وانا فى الجامعة كان ليه زميل بيخاف عليا جدآ و كنا عارفين عن بعد كل حاجة و فضلنا اصدقاء ست سنين بعدها طلب منى الارتباط الرسمى و بعد صلاة استخاره حسيت انه متربى و حيحافظ عليا و قولت لنفسى كل اللى هو بيعملة عشانك و حبه هيخليكى تحبي و فعلآ وافقت وجى وحسيت ان باباه شخصية متسلطة جدآ و هو قاللى كده فعلآ و قاللى انتى ليكى انا.
 
دلوقتى انا بقالى 7 شهور مخطوبة فى حاجات كتيرة ظهرت عصبى جدآ و بيعمل مشاكل على حاجات ملهاش معنى يعنى مُثلآ لو اتصل وانا مسمعتش التليفون يزعل .خرجنا فى الفترة دى مرتين بس وكل مرة اليوم يكون كله نكد واخر مرة قاللى انتى مش بتعملى حاجة اكتر من اى حد و انى عايزة اكون معاه بشروطه ده عشان انا قولتله ان دى طبيعتى وانى بتعامل مع كل الناس و محدش بيزعل منى بالعكس انا الحمدالله محبوبة جدآ……انا مخنوقة و حاسة انى مش مبسوطة هو علة طول صوته حزين و مكتئب ومن غير اسباب .
 
حاسة انى مش سعيدة و هو مش عايزنى اعمل اى حاجة خالص لا كورسات ولا شغل وكتير اتكلمت معاه ان ده يتغير و لما تحصل حاجة برة ونتكلم بعدها احنا نخرج نفسنا منها…..اه نسيت اقولك ان بعد كل مشكلة هو يتصل و يقولى اسف وانا هتغير ومتزعليش ولما اقوله انا محتاجة وقت عشان ارجع كويسه يقولى انتى بتكبرى الموضوع…انا صريحة و مش بحبه يمكن اتعلقت بيه الاول عشان هو قربنى منه لكن بعد اللى هو بيعمله انا كرهت الخطوبه و النكد و الخناق وكمان اعتذاره طول الوقت عايز يسأل و انا اجاوب …خايفة اسيبه دى تانى مرة اتخطب التانية كانت من 5 سنين بالمناسبة هو عارف عنى كل علاقاتى بالناس بس مبيتكلمش و اهله كمان محدش بيسأل الا لو انا سألت او هو قال انى مضايقة ان محدش بيسأل ….اسفة انى طولت عليكى بس انا حاسة ان طول عمرى قرارى فى ايدى و كل اصحابى بيقولوا ان شخصية قويى لكن دلوقت انا مبقتش انا و اعصابى بتدمر ….خايفة اظلمه و خايفة من كلام الناس ومش عارفة اعمل ايه؟؟؟؟؟؟؟
 
—————————————————
 
أنا مش هلف و أدور عليكى
 
اختياراتك
 
تتجوزيه عشان الناس ماتقولش اتخطبت مرتين و فسخت و تبقى دى حياتك .. هم و غم و نكد و قرف مع شخص انتى لسة قايلة انك مش بتحبيه
 
او
 
افسخى خطوبتك و الناس مالهاش حاجة عندك .. هم كدة او كدة هيتكلموا … اتجوزتيه هيقولوا غبية و استعجلت .. سيبتيه هيقولوا برده غبية و استعجلت
Bookmark and Share