fbpx
مونتيسوري مصر- تقدمها مروة رخا

هل الجواز هو الحل للهروب من مشاكل البيت؟

 

 

ازيك يا مروه عامله ايه انا بعتتلك قبل كده عن مشكله عندي وبصراحه كل ما احس اني ضايعه ببعتلك

المشكله المره دي اني بجد مش عارفه انا مين ومش عارفه اعمل ايه في كل الي انا فيه ده

 

يعني ساعات ابقى انسانه زوق وكويسه وساعات اهزر هزار بايخ وساعات بقى كريمه واقول انا نفسي اشتغل عشان اعوض اخواتي عن الي شافوه في حياتهم واجيب لهم كل الي نفسهم فيه وساعات اقول لالا انا عاوزه اشتغل عشان اجيب لنفسي حاجات وهدوم واصرف يعني هو انا مجهود شغلي هيروح على اخواتي!!
 
بجد محتاره يا مروه عاوزه اقولك انا في ظروف بيت ما يعلم بيها الا ربنا يعني انا بابا مسافر بس بيذللنا على ما يبعتلنا فلوس الاكل والشرب وو ماما مطلقة ده غير انه كل ما يجي اجازه يعمل مشاكل وخناق وضرب وطبعا اهله مش بيحلوا حاجه ولا حتى اهل ماما
 
 
يامروه مفيش بنت بتفرح لما اهلها بيطلقوا بس انا فرحانه لاني اخواتي مش هيعيشوا في ذل ومهانه زي ما عشنا
 
مع اني عارفه ان ده ممكن ياثر عليا في جوازي لان مفيش عريس بيقبل واحده اهلها متطلقين وانا عاوزه رايك في الموضوع ده كمان ..

 

بالاختصار :يامروه انا السنه دي اخر سنه كليه وانا بمتحن وعندي 21 سنه وحاسه ان عندي 60 سنه من كتر الي شفته انا واخواتي والله العظيم يا مروه لولا اني انا واخواتي عارفين ربنا لكنا دلوقتي ماشيين في طريق غلط من كتر الي شفناه من قلة امان لما بابا بييجي وقلة فلوس في غيابه وممكن نتذلل لعم من عمامي عشان يدينا فلوس ووالدي بيبقى قاصد ده عشان يكسر عيننا

ارجوكي يا مروه انا عارفه انه بيجيلك رسايل كتير ومش ملاحقه وربنا يعينك بس بجد والله نفسي تنظري لرسالتي انها صحبتك الي عندها المشكله وتحسي بالمشاعر الي جوا الرساله وربنا العالم اني بكتبها وانا قلبي بيتقطع لاني بجد مهزومه من جوا الله يخليكي اديني حل لمشكلتي دي انا يعتبر مليش اهل ولا حد بيسال علينا حتى في الاعياد مليش غير صحاب

وانا اجتماعيه والحمد لله بس حتى صحابي مش بيحبوني اوي ومعنديش ثقه في نفسي ولا في عرسان بتجيلي مع اني حلوه مش وحشه والحمد لله

 

ليه يا مروه في الزمن ده الكويس والمحترم والي بيراعي ربنا بيتحدف بالطوب 
ليه والدتي واحنا نتظلم من والدي ومن اهل ماما مع اننا طول عمرنا ماشيين جنب الحيط وملناش غير الخالق وهو احسن من الكل 
ليه انا محترمه وكويسه وحظي كده في حياة كده ومفيش شخص بيهتم بيا ويحبني وغيري عنده كل حااااااااجه وبياخد زياده 
ليه وليه وليه …اسئله كتيييييير اوي نفسي تجاوبيلي عليها يا مروه لاني بجد مش عارفه اجابتها وحاسه اني وحيده في الدنيا دي وبقعد في اوضه ظلمه لوحدي واعيط بالساعات عشان محسسش اهلي بيا 
انا عارفه ان ربنا له حكمه في كده بس بجد نفسي حد يصبرني على كل ده
تنصحيني بايه يا مروه وكمان تنصحب والدتي بايه من ناحية والدي 
اسفه طولت عليكي يا حبيبتي بس بجد تعبانه اوييييييييييييي
 
——————————————
 
رسالتك حزينة و زعلتنى عليكى
 
انتى مالكيش ذنب فى اللى بين والدك و والدتك
 
لكن النصيب كدة
 
انتى من الآخر مالكيش حد غير نفسك و لازم تفهمى دا كويس
 
مالكيش غير عقلك و علمك و شهاداتك و طموحط و ارادتك و صحتك
 
ماحدش هيديلك حاجة
لا اب
و لا ام
و لا اخ
و لا قريب
و لا زوج
 
أيوة … الزوج ممكن يبقى تكرار لحكاية والدك
لان الضعيف بيختار احسن الوحشين
و انا عايزاكى تبقى قوية عشان تختارى احسن حاجة فى الدنيا
 
انتى قربتى تتخرجى
 
ارمى الماضى و المشاكل تحت رجليكى و اعمليها سلم تطلعى عليه
 
دورى على شغل و وانتى بتشتغلى ادرسى و خدى كورسات و دورات
 
استثمرى وقتك و طاقتك فى تنمية مخك و قدراتك و مهاراتك عشان تترقى فى شغلك و تنجحى و النجاح هيجيب ثقة و فلوس و أمل فى بكرة
 
ما تفكريش ان موضوع طلاق اهلك دا عائق فى جوازك .. الراجل الصح اللى مخه متركب صح اللى يصلح زوج ليكى و اب لولادك مش هيفكر التفكير المتخلف اللى انتى خايفة منه دا
 
أهم حاجة انك ما تهربيش من بيت أهلك لبيت جوزك
 
لازم تقفى على رجليكى الأول و تعرفى انتى مين و تقدرى على إيه
 

و بعدين اختارى الراجل اللى يكون معاكى ضد الدنيا مش مع الدنيا عليكى

من هي مروة رخا؟
مروة رخا: موجهة مونتيسوري معتمدة دولياً من الميلاد حتى 12 عام. Marwa Rakha: Internationally certified Montessori educator from birth to 12 years.

بدأت “مروة رخا” رحلتها مع “نهج وفلسفة المونتيسوري” في نهاية عام 2011 بقراءة كتب “د. ماريا مونتيسوري” عن الطفل والبيئة الغنية التي يحتاجها لينمو ويزدهر. تلت القراءة الحرة دراسة متعمقة للفلسفة والمنهج مع مركز أمريكا الشمالية للمونتيسوري

“North American Montessori Center”