- Marwa Rakha - http://marwarakha.com -

بابا مات و ماما فى حياتها راجل

Tweet [1]

 

 

هاي موري اذيك ياقمراية وحشاني مووت هبتدي علي طول المشكلة بيني وبين ماما من بدري اوي من وفاة بابا اللة يرحمة  من سنة بس يمكن مكنتش  حاسة بيها اوي بسبب وجود حبيبى  في حياتي لانة كان مهمون عليا حاجات كتير اوي بس خلاص بقي ربنا يوفقة

المشكلة في شخصية ماما نفسها صعب التعامل معاها انا كنت متفهمة مع با با اكتر وكانت علاقتي بية جميلة اوي انا بحبة اكتر حد في حياتي وماما عارفة كدة بصي يامروة انا من حبي لبابا اوقلت كتير بحس بالذنب من نحيتة بردو بسبب ماما لانها ليها فريند عرفتة من ابل وفاة بابا انا طبعا مكنتش ابلة في الاول بس ماما فرضتوا عليا براحة وبالتدريج وبذكائهم عرف ازاي يقرب مني ويخليني احبة اكتر بعد وفاة بابا هو بيعاملني دلوقتي كويس اوي وبيهتم بية اوي بس انا بيغلي الدم في عروقي لما ماما تبقي مبسوطة وتحكيلي عنة ببقي نفسي اقولها بكرهم وهما سبب ارفي من نفسي من نحية حبي لبابا ولما يتخانقوا ويدخلوني بينهم ويخلوني اسمعهم  ببقي مدايقة جدا بس بعمل كدة احتراما لماما

ماما عارفة اني نفسي يخرج من حياتنا بس خلاص فات الاوان هوبقي حاجة اساسية في حياتنا حتي اخواتي عرف يقرب منهم لان بياجي عندنا البيت بحكم انة مهمندس بابا وماسكلنا المباني انا بحترمة ويمكن برتاح لما اتكلم معاة بس اوقات بحس اني بكرهة وبكرة ماما  مش دة بس سبب المشاكل بيني وبين ماما احنا علي طول مختلفين مش بنتفق غير لما ماما تبقي عاوزة تحكيلي عن خناقة بينهم او مكالمة فرحتها اوي منة انا بجد مش عارفة اعمل اية انا بقيت كارهة الاجازات ونفسي السنة كلها تبقي دراسة عشان ببقي في الكلية في بلد تاني بعيد عن البيت  حاولي تقوليلي حل ومرسي يا حبي

——————————-

انتى حاسة انك لما تحبى الراجل دا هتبقى بتخونى حبك لباباكى
 
و دا احساس ملخبط
 
بصى يا مشمشة
 
باباكى و حبك ليه و علاقتك بيه و ذكرياتك معاه عمر ما حد هيغيرها و لا يستبدلها و لا يحل محلها
 
العلاقة اللى بينك و بين باباكى هتفضل خاصة و مقدسة مهما حصل
 
حتى لو مامتك اتجوزت
 
جوز مامتك مهما كان راجل طيب و لطيف هيفضل جوز مامتك
عمره ما هيبقى باباكى
 
عشان كدة احساسك انك بتتخلى عن باباكى او انك بتخونى حبك ليه احساس مش صح
 
واضح ان الراجل دا ذكى و قدر يقربك منه
و قدر يقرب من اخواتك
 
انا مش عارفة طبيعة العلاقة اللى بينه و بين والدتك
 
لكن لو انتى حسيتى انك بتحترميه
او انك بتثقى فيه
او انك ممكن تضحكى على حاجة قالها
او انك ممكن تفرحى لو شوفتيه
 
كل دى مشاعر بتقول انك متقبلاه كصديق للاسرة
او كزوج ام
 
عمره ما هيبقى باباكى لان اللى بينك و بين باباكى عمر ما حد هيدخل فيه
 
و غضبك على مامتك مفهوم
 
انتى حاسة انها خانت ذكرى اعظم اب فى الدنيا
 
لكن الناس مختلفين و الشخصيات كمان مختلفة
 
فى رجالة و ستات لما يترملوا بيعيشوا لولادهم و بس
 
و فى ناس تانية بتبدأ من جديد
 
و مافيش حد احسن من حد
كل اختيار و له تمنه
بلاش تعاقبى مامتك
احنا لا بنختار اهلنا و لا من حقنا نحاسبهم
 
هى بتحاول تبقى صاحبتك
غيرها كانت ممكن تحطكم قدام الأمر الواقع
و غيرها كانت ممكن تعمل كل حاجة فى السر
و غيرها كانت ممكن ترميكم فى الشارع و تشوف حالها
 
انا مش بدافع عنها
انا بدافع عنك انتى
و عن حقك فى الاستمتاع بوجود الأم
و وجود ذكريات جميلة مع الأب

ووجود صديق رجل فى العائلة بيحاول يكسب ودك