واحد مقطع السمكة و ديلها قرر يتجوز … تمترالالام تم تم

Date posted: May 5, 2010


 
 
 
شوفي ياستي انا مشكلتي كالتالي انا بنت متوسطة في كل حاجتماعيا وماديا وحتي في الشكل وفي تعليمي وفي شغلي بحاول دايما اكون احسن و انشاءالله هقدم قريب جدا للماجيستير المهم انا يعني قصدي اقولك اني والحمدلله ماعنديش اي مشاكل

من فترة حوالي كدة 8 او 9 شهور اتعرفت عل واحد زميلي في الشغل هو كان جاي عندنا جديد يعني ماكنش في بينا اي سابق معرفة وبعد شوية جالي دوغري جدا جدا و طلب انة يتعرف عليا لأنة معجب بيا وحابب يتقدملي.هو كمان كان لافت انتباهي وكان عاجبني فية حاجات كتيربس كل دة كان من بعيد لبعيد و وقتها انا قولتلة ان ماينفعش يكون في بينا اي حاجة مش رسمي ودة مش لأني معقدة او دقة قديمة ولاحتي كنت بمثل علية بس لأني بجد والله ماليش في الكلام دة وعمري ماعملتها ولاحتي ايام المدرسة او الكلية انا فعلآ مابعرفش اعمل كدة ماعرفش اكلم حد ماعرفوش واخرج معاة وادلع ونتكلم وكدة ولاحتي عمري صاحبت زي معظم البنات وزي كتير من اصحابي

 

المهم فضلنا نتكلم مع بعض جوا الشغل وفي التليفون حوالي 3 اسابيع او شهر وبعد كدة لقينا ان احنا الأتنين مبسوطين ومرتاحين وفعلآ اتفقنا علي 
الخطوبة وفعلا اتقدملي و اتخطبنا بالمناسبة انا عمري 27 سنة وهو 36 اتفقنا ان الجواز هيكون في خلال سنة والكل كان راضي ومبارك ومبسوط

 

انا كنت مخطوبة قبل كدة ومهما حاولت اقولك قد اية كانت تجربة قاسية ومؤلمة مش هقدر اوصفلك وفضلت فترة طويلة بعدها اكتر من سنتين رافضة الجواز تماما لحد ماقابلت خطيبي

 

ونيجي بقي ياستي لخطيبي إللي هو اساس المشكلة احب مبدئيا اقلك انة غيري خالص في حاجات كتير بس دة عمرة ماسببلي مشكلة او حتي قلق
هو طبعا راجل ناضج شخصية لذيذة جدا اجتماعي موت وجذاب ومتكلم ولطيف قوي بيعمل جو حلو كدة في اي مكان يتوجد فية
كمان هو حد مرفة ومدلل جدا مودي جدا جدا بيزهق بسرعة قوي عصبي عنيد متشبث برأية معظم الوقت ودة بيخلي التفاهم معاة صعب وقت ما بيعصب
إللي حصل إننا في الأول خالص كنا مبسوطين جدا ودة كان في فترة التعارف مانكرش إني عمري ما انبسط زي الأيام دي وبع شوية وفي بداية الأرتباط الرسمي أتعرضنا طبعا لكام موقف كدة أصتدمنا فيهم ببعض ودة حاجة عادية بتحصل بين اي اتنين مايعرفوش بعض قبل كدة حتي بيسموة صدام التعارف
وفضلنا فترة كدة في مشاكل ومش منسجمين
في الفترة دي انا غلطت اكتر من مرة مش هنكر طبعا وكان هو بيزعل جدا وفي شدة غضبة يقولي ان مش هينفع نكمل مع بعض بس انا ماكنتش بوافق وكنت دايما بساير الريح لحد ماتعدي وبعمل كل حاجة اقدر عليها علشان المركب تمشي وعلشان كمان ماكنتش عايزة ننفصل بجد كنت باقية علية طول الوقت وكنت بعمل كدة معاة حتي في المرات إللي بكون فيها مش غلطانة بس هو عصبي جدا ولما بيزعل بيقول كدة بس لما بياخد وقتة ويهدي خلاص بيرجع طبيعي والدنيا بتمشي

 

المهم دي كانت فترة وعدت وخلاص احنا عرفنا بعض كويس وعرفنا ازاي نتعامل مع بعض وكل واحد عرف طباع التاني ورجعنا فربنا تاني من بعض وبقينا منسجمين

 

كل دة ولسة ماوصلناش لأصل المشكلة وإللي هو ان خطيبي دة راجل من الآخر مقطع السمكة وديلها زي ما بيقولو صاع ولف ودار بحق كل يوم 
في ال36 سنة
إللي هما عمرة كلة واحد البنات كانو في حياتة اكتر من الرز عمل كل حاجة ممكن يعملها راجل في حياتة وعاشها بالطول والعرض وفكرة الجواز دي ولا كانت علي بالة اصلا ودة إللي خلاة ماتجوزش لحد دلوقتي
ولحد ما شافني وكان وقتها بدأ يفكر في الجواز يعني زي ماتقولي كدة ربنا حطني في طريقة في الوقت المناسب وهو لاقني حد مناسب بنت ناس متربية جميلة بشكل يكفية مافيش مني قلق او خوف بالنسبة لواحد بيشك في نفسة
والأهم من دة كلة إنة قالي بعد كدة إنة اساسآ بيخاف من فكرة الجواز نفسها وعاملها الف حساب وطول الوقت كان بيهرب منها بالمشوار لأن الزبالة اللي شافها في حياتة مش شوية وتخلي اي حد يراجع نفسة بدل المرة الف
ضيفي علي دة كلة تجربة حب فاشلة ما حاولش يحكيلي تفاصيلها لحد دلوفتي لكن الأكيد انها عقدتة اكتر ماهو متعقد مليون عقدة في بعض

 

 

وطبعا الكلام منطقي لأن دة واحد عاش طول عمرة كدة حر طليق مع نفسة ولنفسة وبس متعود علي حبياة السهر والخروج والسفر والاصحاب اللي ليهم اول مالهم آخر واللي بيشغلة في حياتة مساحة مهمة جدا جدا جدا
لو اقولك انة بيعرف طوب الارض ابقي قصرت

 

 

والجواز بالنسبالة تقيد وكبت وحبس حرية ومسؤلية كبيرة هو ماتعودش عليها ومش عايز اصلا ونكد وعكننة وقرف وعيال و وجع دماغ ومشاكل وخناق
واحوال أتنين عايشين في بيت واحد وبيتغيرة 160 درجة بعد الجواز
دة كلامة وحتي لما كنت اسيبة يتكلم كدة علي راحتة كان بيعبر عن الموضوع بشكل غريب كان يقولي عارفة لما يكون في حد انتي بتحبية وبعدين بجي مرة واحد يقولك يلا بقي علشان هضربك بالنار !!
كلام غريب واسلوب تفكير اغرب بس هي دي دماغة مع الأسف

 

صدقيني حاولت اطمنة علي قد ما اقدر بكل الطلاق سواء كان كلام او فعل او صبر علية وعلي طبعة وتصرفاتة ودة وصلة مني وفي اكتر من موقف لكن تقولي لمين حتي لو كان قلبة لان شوية برضة اللي في دماغة هو اللي في دماغة مابيتغيرش

 

ودلوقتي احنا زي ماقولتلك بقالنا حوالي 10 شهور مخطوبين وماخدناش اي خطوة 
إيجابية في الجواز وطبعا اهلي بدأو يقلقو ومؤخرا لما بتكلم معاة لاقيتة بيقولي انة مش حاسس انة ملهوف علي الجواز زي اي حد او ان الموضوع شاغل تفكيرة وانة لسة خايف يروح لقضاة برجلية

 

 

في نفس الوقت ماقليش انة عايز ينفصل او ينهي الخطوبة وانا مش عارفة بجد هو ناوي علي اية كمان مش عارفة المفروض اتصرف ازاي؟ يعني اواجهة ولا اطلب منة يحدد شكل لعلاقتنا ولا اعمل اية
في نفس الوقت باقية علية ومش عايزة انفصل
تفتكري هو بيلمح ولا عايزها تيجي مني ولا زي مابيقول انة فعلا مش اكتر من مجرد فضفضة وانة بيحكيلي علي اللي في قلبة وضميرة من غير مايزوق الكلام 
حيرني فية قوي يامروة وانا مانكرش اني حبيتة واتمنيتة واتعلقت بية قوي قوي قوي والله من قلبي
يمكن حتي اكتر ما هو حبني بكتير بس هو من النوع اللي مابيعبرش عن اللي جواة بالكلام يعني برضة علي حد تعبيرة مابيعرفش يتنحنح
نادر قوي قوي لمل يقولي كلمة حلوة صريحة كدة لكن تصرفاتة كانت دايما بتقول كتييييير

 

حاسة ان علاقتنا وصلت للنقطة اللي لازم نقف فيها مع نفسنا وقفة وبعدها يا نكمل مع بعض يا كل واحد هيروح لحالة بس انا مش مستعدة دلوقتي للموقف دة وبرضة بقول لنفسي وقوع البلاء ولا انتظارة وخايفة قوي اكون بضيع وقتي ومشاعري مع الشخص الغلط

 

ودايما بسأل نفسي ياتري هو حبني فعلا عايزني ولا مش عايزني ولا حن لحياتة القديمة ياتري حس بيا وبحبي لية ويمكن يكون هو دة اللي مقوية عليا؟
ياتري هوي مقدرني فعلا ولا مستهون بيا؟؟
او يمكن في حد تاني في حياتة حد قديم او جديد مش هتفرق كتير المهم اني افهم

 

اعمل اية يامروة واتصرف معاة ازاي التصرف اللي ما اندمش علية بعد كدة من غير ما اكون اتنازلت عنة بسهولة من غير ما اتمسك بية او احافظ علي حياتة معاة و اتمسك بيها

انا بجد حد مسالم جدا وماليش في المشاكل والنكد والقلق و الجو دة خالص وعلشان كدة عايزة اكمل الموضوع دة علي خير او احافظ علي اللي باقي فيا و اخد بعضي واطلع منة برضة علي خير

دبرني يا وزيري ؟؟

 

—————————————————–

 يا حبيبتى
يا روح قلبى

بجد انا اتخنقت و انا بقرا رسالتك

 

تفتكرى لو كان الوضع معكوس
و كان انتى اللى مقطعة السمكة و ديلها
و هو اللى طيب و غلبان و مسالم و ما لهوش تجارب

 

 

كان هيقبل يرتبط بيكى؟
و لا كان هيعمل زى شباب كتير و يقول لك عايزها زى – ودا حقه

 

انتى بقى تهاونتى فى حق نفسك

 

اول مرة لما اقبلتى ترتبطى بواحد ماضيه اسود و مهبب بالطريقة دى
تانى مرة لما حبيتى واحد مش بيحبك لشخصك … واحد شايف انك واحدة مناسبة و مش زبالة زيه و زى اللى عرفهم – وبس
تالت مرة لما سمعتى كل افكاره السلبية عن الزواج و الارتباط و الخلفة و مع ذلك استمريتى
يعنى هو لو كان زهق من حياة السمكة و ديلها و قرر يستقر بقى و يبنى أسرة و الكلام دا كن هقول لك مبروك
لكن هو لحد النهاردة مش رجل اسرة … مش هيكون لك زوج و لا هيكون اب لولادك .. انانيته اكبر من الكلام دا

 

رابع مرة لما قعدتى عشر شهور من ال12 شهر – مدة الخطوبة – و مااعترضتيش على تخاذله … فين الشقة و العفش و الجهاز و الترتيبات للجواز؟

 

خامس مرة بقى …. الراجل اللى لف و دار و متعود على حاجات معينة فى حياته لما يخطب واحدة ملتزمة زيك يبقى كدة اتقطع عليه المياة و الهوا … يبقى ملهوف على الجواز … فاهمانى؟
هو ليه بقى على قلبه مراوح كدة؟

 

كل دى غلطات فى حق نفسك

 

انا مش باقول لك سيبيه
انا باقول لك انك لو هتكملى فى الجوازة لازم تبقى متوقعة هو هيبقى ازاى

 

و تانى بكرر

 

انا مش ضد انه مقطع السمكة و ديلها
انا ضد انك تتجوزيه و هو مش مستعد للجواز و الاستقرار و الاسرة
انتى عايزة تبنى
و هو مش فى دماغه

 

 

تعملى ايه؟
بابا هو اللى يعمل
بابا يقعد معاه قعدة راجل لراجل و يقوله انت ناوى على ايه يا ابنى
Bookmark and Share