عبادة الكفار للعجوة

Date posted: April 25, 2010


 
 
 
إلحقينى يا مروة 
 
خطيبى فيه مميزات كتير
 
وأنا بدأت أتعود على وجوده فى حياتى + إنى حساسه جدا جدا وأول مرة أحس إنى مرتبطه وفى حد على الأقل بيبقى حريص يعرف أخبارى بالتفصيل ويسمع صوتى كل يوم
 
المشكلة إنى عمرى ماحسيت بنظرة حب منه ولا وصلنى إحساس معين من كلام الحب بتاعه ولا باحس معاه بحنان أو إحتواء لكن بنتكلم دايما كإننا أصدقاء
 
وأنا 24 ساعة باحلم بالحنااااان من وأنا عندى 12 سنه لغاية دلوقتى 25 سنه
 
لدرجة إنى كنت باحلم بواحد يكون فى الخمسين وأكون زى بنته رغم إنى مش ناقصة إهتمام وحنان من بابا وماما وإخواتى وصحباتى المقربات
 
وباتمنى إنه يبين أى لهفة وإحنا مع الناس وساعات باقول طب ما أنا ماقدرش أستغنى عن وجوده طيب أستحمل طبعه وأفضل أتخيل لوحدى صورة فارس الأحلام الخيالى اللى يشبعنى نفسيا
 
علما بإنه مالوش خبرات سابقة وماعندوش دكاء إجتماعى أوى) …… لما بابقى معاه مع الناس باحس إنى (أستغفر الله ) يتيمه والإنسان اللى كنت باحلم إنه يحسسنى بالراحة والأمان ما بيبصليش حتى …………..
 
ما فيش أى تصرف فيه لهفه لا قدام الناس ولا قدامى حتى لما يقولى وحشتينى وبحبك
 
وده مش بيحصل كتير لأنى ما بتجاوبش ولا برحب بالكلام ده و مابصدقش
 
وعلشان كده مهما ألح عليا علشان أقوله شعورى ناحيته ما برضاش ولما يجيب هدايا و ورد باعرف إن أهله هم اللى جايبينها أو قايلينله عليها وبعد كل خروج معاه (مع ناس) بابقى هاعيط وأقضى الليل كله عياط وخوف من المستقبل
 
لكن لو تليفونه إتأخر أبقى هاموت واحس إنه لوماسألش عليا حياتى مش هايبقالها طعم ولا معنى
 
لكن باباه ومامته حنينين جدا خصوصا باباه حنين عليا من قلبه وده بيأثر فيا أوى
 
أنا عارفه إنه جاد فى رغبته فى الزواج يعنى معجب بى طبعا لكن مش قادره أصدق موضوع الحب ده ومش متخيله نفسى متزوجه راجل قدى فى السن
 
لازم أفضل محافظه على شكلى وأناقتى وجمالى وكرامتى قدامه وكل ماأشوف واحده حلوه أتضايق وأقلق (مش من إنه يسيبنى لكن من إنه يحس ولو للحظة برغبة فيها وده معناه دمار نفسى ليا)
 
كده الزواج هايكون عبء,,
 
كان نفسى ألاقى حد يدينى مشاااااعر عميقة فأحب أعمله أى حاجة مهما كانت صعبه ونحس إننا حاجه واحدة يعنى أمان وإستقرار وبالتالى أكون زوجة صالحه وأرضى ربنا …….لكن برده مش هاقدر
 
أستغنى عن إحساسى بمشاعره (القليلة)وحرصه على الإطمئنان علياورغبته فى الزواج منى وممكن ما أقدرش أنساه بسهوله يعنى مش هاقدر أسيبه 
 
أنا فى صراع بين الفكرتين دول +إنه عايزنى أحبه وأبقى حنينه وأنا مش قادرة وخايفه يزهق ويسيبنى هو فى الحاله دى هاتبقى فضيحة قدام الناس وممكن أموت من الإحباط لو حد سابنى 
 
شكرا على الرد السريع
 
———————————–
 
مش عارفة ليه يا لوزة مش قادرة اتعاطف معاكى
 
انتى زى ما تكونى عايزة واحد يعبدك زى ما الكفار كانوا بيعبدوا اصنام العجوة
 
لا العجوة بترد و بتعبر و لا الكفار بيزهقوا او يشتكوا
 
تفتكرى لو هو اللى بعت لى رسالة كان هيقول فيها ايه؟
 
و بعدين فى جمل فى كلامك بتعكس انانيتك النسبية و عدم استعدادك لتحمل المسئولية
 
انا مش باقول لك انك وحشة
 

انا بقول لك انك محتاجة تراجعى نفسك و توقعاتك من خطيبك

Bookmark and Share