خطيبها عايزها تتقل

Date posted: April 25, 2010


 
 
 
هاى يا مروة ازيك عاملة اية

انا دايما بحب اسمع ارائك بتعجبنى جدا وعجبتنى جدا فى برنامج شبابيك بجد كلامك حلوة اوى ربنا يزيدك كمان وكمان

انا مش هطول عليكى انا عندى 21 سنة ومخطوبة جواز تقليدى جدا يا مروة انا مش كان ليا تجارب خالص قبل كدا حتى كلية مش كونت بنزلها الا على الامتحانات

مشكلتى بقى مع خطيبى ومع ماما ماما بقى دايما تشككنى فية بحس انها بتحاول تتطلع القطط الفاطسة اللى فيه مش عارفة لية انا مخطوبة بقالى شهرين لو يوم مش اتكلم معايا تقولى تلاقية بيكلم واحدة غيرك لو مثلا علق على لبسى هو عايز اغير استيل لبسى يخلينى روشة كدا والبس كعب انا مش شايفة ان فيها حاجة خطيبى وعايز يخلينى احسن ماما بقى هو ازاى يعلق على لبسك ولية اصلا يعلق على لبسك ولو مثلا شدنا مع بعض فى تليفون انا وهو وانا الللى ابقى غلطانه تقولى خليك كدا لحد ما يركبك ويدلل رجلوة بس انا مش شايفاة كدا خالص انا شايفاة حد حلو اوى انا بصراحة كل يوم اعجابى بيزيد بية يوم عن يوم مش عارفة اعمل اية نفسى

اقولها سبنى انا هعرف اتصرف لوحدى بس مش عارفة اقولها ازاى انا حاسة ان هو مش مرتبط بيا انا بس انا حاسة انوة مرتبط بيا انا وماما

مشكلتى معاة بقى بدات من اسبوعين كدا لقيتوة متغير معايا لقيتوة مش ملهوف عليا زى الاول حتى فى نظراتوة ليا حتى مكلماتوة معايا قلت مابقتش زى الاول ولما اقولة يقولى لا انا عادى بقيت خايفة ليكون كلام ماما صح

ويبقى عايز يبعد عنوة لحد امبارح لما اعدنا واتكلمنا

وقالى ان انا مش مديلوة فرصة ان هو كمان يعبرلى عن اللى جواة وانى عايزة كل حاجة بسرعة ومش معنى ان فى مرة مكلمنيش يبقى كد\ا هو مش عايزانى ومش معنى ان انتى فى مرة اتصلتلى ولقيتى معايا ويت يبقى كدا انا بكلم واحدة غيرك

انا عايزك تسبنى لو فى يوم شدنا مع بعض سبنى انا اللى ابدا بالكلام

انا فهمت من كلاموة ان هو عايزانى ابقى تقيلة

ابقى تقيلة ازاى عايزة ارجعوة تانى ملهوف عليا ومكلماتو ة تبقى كتيرة زى الاول اعمل اية هو دايما بيقول ان انا بسمع كلام وان هو لما يقول على حاجة مش عجباة فيا وقالى عليها انا بغيرها من غير ما يعدها تانى هو فرحان بدا

بس عايز انا اديلوة فرصة اعمل دا ازاى ولو فى مرة بعتلوة مسدج حلوة واقولة رايك اية يقولى مش كل ما تبتعتى حاجة تبقى مستنية رد سبنى لحد ما انا ارد انا قدرت انى افهم كلام وقولت انى اتقل علية

بس ازاى اتقل يا مروة انا بتعامل معاة بطبعتى جدا وكمان انا كان نفسى جدا انى احب واتحب ولاقى اهتمام من حد غير اهلى

بس فى حاجة كمان يا مرورة عايزة اسئللك عليها هو لما يمسك ايدى او انوة يحاول يبسوس ايدى او راسى دا كدا عيب وكدا مش هيتجوزنى فى اول خطوبتا حاول انوة يمسك ايدى وباسها انا كانت اول مرة فى حياتى حد يعمللى كدا اتنرفزت علية جامد وضربتوة بالمخدة وبعد ما مشى روحت قولت ل ماما وعملتها مشكلة بس الحمد الله عديت على خير بس دلواتى انا بتمنى انوة يمسك ايدى او انوة يبوس راسى مش عشان انا بنت وحشة بس هى احساسها حلوة اوى انا اة ببقى مكسوفة جدا ساعتها ووشى جايب ميت لون والاول اعد اتمنع كدا هى كدا حاجة غلطت او حاجة عيب وانا اسفة انى طولت عليكى يارب تكونى فهمتنى .وشكرا ليكى انك سمعتنى

 

—————————

 

اهلا يا مشمشة

اولا

لو ماما شايفة انه بتاع بنات و بيعرف غيرك و انه عايز يركبك و انه مش بيحبك .. كات وافق على الجوازة ليه؟

دا سؤال حقيقى .. انا عايزة اعرف ردك و رد مامتك عليه

لكن بما ان هى وافقت على الجوازة يبقى هى مؤتمناه عليكى و لا هى هترميكى لواحد فيه كل العبر اللى هى بتقول عليها دى؟

ثانيا

انتى قليلة الخبرة لكن ذكية

و فهمتى ان الولد عايزك تتقلى

خلينى بس اوضح لك شوية حاجات

اى حاحة بتزيد عن حدها بتتقلب ضدها

يعنى الحب الكتير لما بيزيد عن حده بيتقلب خانقة
و الغيرة لما بتزيد بتتقلب شك
و الرومانسية لما بتزيد بتتقلب هلاوس و انفصال عن الواقع

زى ما انت نفسك تحبى و تتحبى .. هو كمان نفسه يحب و يتحب

فى الاول كانت المعادلة مظبوطة
هو كان بيعبر عن حبه
و انتى كنتى مبسوطة
و انتى كنتى بتعبرى عن مشاعرك
و هو كان مبسوط

اللى حصل مع الوقت ان انتى بقيتى بتعبرى و هو بيستقبل بس
و بعدين بقيتى بتعبرى و هو مش قادر يستقبل .. زى كدة اللى جاتله تخمة من الاكل

يبقى المطلوب منك انك تديله مساحة هو كمان يحس انك وحشاة و انه عايز يكلمك و انه عايز يشوفك و انه عايز يكلمك

انا مش بحب كلمة "التقل" دى لانها بلدى كدة و حركات مش تمام

مش انتى نفسك تسمعى كلمة حلوة و تحسى بلهفته؟
يبقى سيبى له مساحة يحس انه عايز يقول كلمة حلوة و انه عايز يعبر عن لهفته

ايه بقى معنى مساحة؟
هل هى القمص و لوية البوز؟ لأ
هل هى النكد و الجفاء؟ لأ
هل معناها انك تقلبيه خالص؟ برده لأ

معناها انك تشغلى نفسك بحاجات خاصة بيكى
لو مش هينفع خروج و اصدقاء و شغل
يبقى هوايات و رياضة و اى حاجة تانية تلاقى فيها نفسك و تطورى فيها نفسك

و ساعتها انتى هتكونى مبسوطة و مش هتنكدى عليه و مش هتبقى عبئ عليه و مش هيتخنق منك و من مكالماتك و من رسايلك

 

ثالثا بقى موضوع مسكة الايد و البوسة و كدة

 الراجل بعضمة لسانه قال لك انك مستعجلة و عايزة كل حاجة بسرعة

و قالك تسيبيه هو اللى يبدأ

و قال لك تتقلى

 يبقى انتى بقى استمتعى بالمشاعر اللطيفة دى لحد ما ييجى وقتها الصح و وقت التعبير عنها

 

انتى لسة فى بداية الخطوبة و لسة قدامكم كتير

و الراجل الشرقى – اللى هيعجب بواحدة بشخصيتك – عايزك تتمنعى و تتسهوكى علشان ترضى جواه غريزة الصياد اللى جاب الديب من ديله

Bookmark and Share