fbpx
مونتيسوري مصر- تقدمها مروة رخا
 
 
 
ازيك يامروة عاملة ايه؟
انا اول مرة اكتبلك وسمعت عنك كتير من اختي وانك بتهتمي بكل قرائك
ياستي انا عندي 30 سنة ومتزوجة ولدي طفلين ومتزوجة في شقة علي النيل وزوجي متيسر ولكن بورث يعني مش دخله كويس هو عنده بس شوية فلوس في البنك عايشين علي فوايدهم وشغله حكومي وطبعا المرتب 500 جنيه يعني ولاحاجة بيروحو بنزين للعربية 
مش هقولك اني عايشة عيشة وحشة بس انا للاسف مش راضية عنها ودايما ببص للاحسن مني
وزوجي عكسي بيبص دايما للاقل منه علشان يحسسني اني احسن وانه قدملي كتير وعلشان كمان يرضي غروره ويخليني ارضي بالوضع الحالي لانه متكاسل جدا ومش عايز يتحرك ولا يحاول يعمل اي حاجة بحيث يعلي من مستوانا
انا مسؤلة عن كل حاجة في البيت وحتي في ابسط الاشياء مش ينفع حاجة تحصل مش موافقة عليها او هو يعملها من غير موافقتي 
وبحس اني الراجل في البيت ويوم لما اقوله شيل عني شوية يقولي ماانتي اللي عايزة كدة وبتتحكمي في كل حاجة 
قوليلي يامروة حاجة اقدر اعملها ابقي راضية بيها واحافظ علي حياتي الزوجية .
ملحوظة:انا حياتي الزوجية فاترة جدا وبعد حملي الاول مباشرة تركت غرفة النوم وبقيت انام في الغرفة الاخري وهو مش مضايق ولا فارقة معاه.
حاسة ان العلاقة فيها حاجات غلط من عندي ومن عنده ومستمرة فقط لانها المفروض تستمر 
شكراااا يامروة ومستنية ردك ضروري
 
———————-
 
اهلا وسهلا يا حبيبتى

 

قبل ما ارد عليكى .. انا عندى سؤال

هو انتى ليه ماتطلقتيش؟

لا فى حب و لا فى جنس و لا فى فلوس و لا فى تحمل مسئولية .. ليه مستمرة فى الجوازة دى؟

انتى بقالك قد ايه متجوزة؟

 

و عندك اولاد قد ايه؟
 
————————————-
 أزيك يا مروة

أنا بصراحة أتصدمت من ردك عليا

أولا أنا بعتلك علشان تحاولى تساعدينى مش علشان أنا عايزة أطلق

أولا هارد عليكى أنا متجوزة من 8 سنين وعندى طفلين وبحب جوزى وعيالى جدا وهو محترم جدا وأبن ناس أوى بشهادة كل أيلى يعرفة وأنا لو عايزة أطلق مكنتش بعتلك

أنا عايزاكى تقوليلى محاولات أظبط بيها حياتنا ويمكن أنا موضحتش صح أنا أيلى سبت الغرفة وهو أة معترضش بس بيطلبنى كتير وأنا أيلى مش عايزة !!!!!!!!!!! بصى مسدود نفسى من الأخر وبتحجج بالعيال

يمكن أنا جيت علية شوية الرسالة أيلى فاتت لأنى كنت مضايقة منة بس هو متحمل معايا مسئولية تربية العيال عيبة أنك لازم تقوليلة أعمل كذا دورت عالشغل ليا ومعايا بكالريوس تجارة طبعا مفيش معلش دوشتك بس فكريلى وحاولى معايا علشان خاطر الولاد منهم طفل عمرة 4 شهور وربنا يهدينا للصح هاستناكى

سلام

—————————
 

أيوة كدة نهدى و نعرف نتكلم

يعنى انتى باقية عليه و على البيت

بصى يا ستى

الناس نوعين

فى نوع زى الحيوانات الاليفة
و فى نوع زى اللى بيربوا الحيوانات الأليفة دى

يعنى فى
pet
و فى
pet owner

النوع الاول محتاج رعاية و توجيه بصفة مستمرة
و النوع التانى بيعرف يوجه و يرعى

الكارثة بقى لما النوع التانى يقرر انه عايز النوع الاولانى يتغير … يبقى مسئول و مستقل و طموح من نفسه
لان دا مش هيحصل و الموضوع بيؤدى للاحباط المتبادل

فى علاقتك بجوزك
انتى فى الاول كنتى بتحبى الدور دا … انه بيلجأ لك فى كل حاجة و بياخد رأيك و معتمد عليكى
و بعدين تعبتى و بقيتى عايزاه هو اللى يسوق شوية
و بعدين ما حصلش – و خلى بالك ان هنا مش هو اللى اتغير … لا دا انتى اللى اتغيرتى
و بعدين سقط من نظرك كرجل … فأول حاجة منعتيها عنه حقه كرجل و العلاقة الحميمية
و بعد كدة راح الاحترام و التقدير

لو تاخدى بالك من اللى انا قلته دا هتلاقى ان هو من الاول كان كدة … يعنى هو لا اتغير و لا هيتغير

يبقى انتى بقى علشان تنقذى الجوازة دى مطلوب منك الآتى

أولا: ركزى فى الحاجات اللى بتحبيها فيه بدل عيوبه
ثانيا: تقبليه كما هو و تقبلى فكرة انه مختلف عنك
ثالثا: بدل ما تلومى عليه انه مش بيعمل كذا و كذا .. اعملى انتى .. انتى اشتغلى .. انتى حققى تطلعاتك بنفسك
رابعا: تبطلى تخبطى راسك فى الحيط لانك مش هتأذى حد غير نفسك
خامسا: قدريه … ايوة لازم تقدريه و الا هتيجى واحدة تانية و تقدره و ساعتها مش هنعرف نتصرف

من هي مروة رخا؟
مروة رخا: موجهة مونتيسوري معتمدة دولياً من الميلاد حتى 12 عام. Marwa Rakha: Internationally certified Montessori educator from birth to 12 years.

بدأت “مروة رخا” رحلتها مع “نهج وفلسفة المونتيسوري” في نهاية عام 2011 بقراءة كتب “د. ماريا مونتيسوري” عن الطفل والبيئة الغنية التي يحتاجها لينمو ويزدهر. تلت القراءة الحرة دراسة متعمقة للفلسفة والمنهج مع مركز أمريكا الشمالية للمونتيسوري

“North American Montessori Center”