من كتر ما الولد لف و دار بقى بيشك فى صوابع ايديه

Date posted: March 31, 2010


 

 

الحكاية دى ابتدت هنا لما الولد بعت لى مشكلته دلوقتى هو باعت بيقول الكلام دا

 

قبل ما تقروا المشكلة الجديدة اقروا المشكلة الأولانية علشان تفهموا اصل الحكاية

 ___________________________________

 

أزيك يا مروة عاملة إية أنا كنت بعتلك قبل كدة على موضوعى مع البنت المتجوزة وبعدت عنها دلوقتى خالص وبقيت أصلى دلوقتى وبعدت عن البنات اللى أعرفهم وخطبت كمان هى بنت كويسة بس أنا أتكلمت معاها عن شغلها هى دكتورة وليها نبطشيات فى المستشفى يعنى بتبات هناك حوالى يومين فى الأسبوع
 
 
كانت كلمتنى أكتر من مرة عن ناس زميلها ولاحظت من كلامها أنوا فية واحد خاطب بيوقف معاها وأنة بيساعدها كتير فى الشغل بالرغم من إنة تخصص تانى خالص وكانت عاوزنا نحضر فرحة أنا مشكلتى من زمان هى الشك وانى بقعد أفكر فى كل كلمة تقولها او تعملها أنا رفضت أننا نروح فرحة
 
أوقات كتيرة كنت بلاقى ويتنج على الموبايل بتاعها وسألتها أكتر من مرة قالتلى أنها بتكلم زميلاتها عشان الشغل وبتحضر ماستر دلوقتى وقعدت تقولى انت بتشك فية المهم صالحتها بس حاسس أنها بتعمل حاجة غلط طول الوقت يعنى متعودة تروح الجامعة عشان المحاضرات يوم الأحد والأربعاء فوجئت النهاردة الثلاثاء بتقولى أنا رايحة الجامعة قولتلها أشمعنى النهاردة قالتلى أنة واحدة صاحبتها أتصلت بيها وقالتلها تعالى فية محاضرة الساعة 10 الصبح حاسس انها بتكدب
 
خصوصا أنها امبارح وانا بكلمها قالتلى أنة واحدة صاحبتها قاعدة ترن عليها وانا بكلمها بس هى مش هترد وبعد ما خلصنا قولت استنى شوية واعمل انى هنام واشوف هلاقى ويتنج ولا لاء وفعلا لقيت
 
وهى متعودة تصحينى الساعة 6 الصبح كل يوم عشان الشغل لقيتها النهاردة أتأخرت ونايمة أتصلت بيها واما قولتلها انتى كلمتى صاحبتك امبارح قالتلى اة والنهاردة بتفجأنى وانا فى الشغل أنها رايحة الجامعة فى غير ميعادها
 
أنا شاكك أنها تعرف حد وأنها أتخطبتلى عشان شايفة أنة كل زمايلها أتجوزوا وأتخطبوا خصوصا أنة خطوبتنا كانت عائلية بحتة
 
كلة كان بيقولى عشان العك اللى عملتة خلى أهلك هم اللى يشوفولك عروسة كويسة أنا شاكك طول الوقت أنها تعرف حد بس مش عارف أثبت كدة ازاى
 
خصوصا تصرفاتها أوقات كمان اما بقولها تعالى نخرج من ورا أهلك مش بتمانع وبتتصرف بتفكرنى بالظبط بالبنت المتجوزة اللى كنت أعرفها قبل كدة فى كدبها على أهلها وجوزها اما كانت بتقابلنى
 
أنا أتخنقت بعد ما كنت حاسس انها البنت المناسبة لية بعد ما خطبتها حاسس انى ببعد اوى دلوقتى ومليش نفس اكلمها وبفكر أنى أزهقها لحد ما هى اللى تقول انا اللى مش عاوزة اكمل معاك طول الوقت انا حاسس انة اللى انا عملتة هيتردلى حتى لو توبت او صليت وحاسس انة هيحصل مع اللى انا خاطبها دلوقتى مش عارف بجد اعمل اية انا تعبت 

 

—————————

 أنا بجد زعلانة عليك

و مش عارفة أقول لك ايه

 أنا عايزاك تروح لدكتور نفسانى شاطر

 

و عايزاك تحكى له كل حاجة
اللى حكتهولى و اللى ما حكتهوليش

 

بجد

الموضوع دا أكبر منى و أكبر من قدراتى

مهما قلت لك مش هاعرف أساعدك

كان فى واحدة ست كل يوم تقف فى البلكونة و تشتم فى الجيران

 

دول مش نضاف .. دول غسيلهم وسخ
دا شباكهم ملطخ
دا وشهم مش نضيف
دا الهدوم اللى عليهم شكلها يقرف من القذارة

 

و فى يوم جوزها تعب منها و من كلامها

 

قام جايب فوطة و شوية مياة
و مسح بيها شباك بيتهم اللى هى بتبص منه

 

 

انت بقى عامل زى الست دى
العيب مش فى البنت و مش فى الناس

 

العيب فى عينيك و مخك اللى بيشوف كل حاجة متوسخة

 

أنا ممكن أرشح لك د. خليل فاضل
الراجل دا محترم و واعى و شاف بلاوى و كتب كتير فى حاجات شبه اللى انت فيه
Bookmark and Share