الموضوع مات و شبع موت و هى مش عارفة

Date posted: March 4, 2010


 
 
 
مروة ازيك
انا عندى 30 سنة و كنت مخطوبة لولد من 6 سنين و كنا بنحب بعض جدا و كنا حنتجوز و انا كنت بحبه و هو كمان جدا هو من القاهرة و انا من اسكندرية و كنا بنكلم بعض كتير اوى لدرجة ان الفاتورة كانت بتيجى تقريبا 1900 جنيه و انا كان بيصعب عليه و كنت بساعده فى ثمنها و هو كان بيتعرض لظروف مادية صعبة جدا علشان هو كان بيحب يعيش فى مستوى معين يعنى مثلا بدل شقة صغيرة تبقى شقة كبيرة بدل عربية صغيرة عربية كبيرة (كان مدلع) بس كان ممتاز اوى فى شغله بيطحن هو مهندس على فكرة

و انا كنت بساعده ماديا فى الاول كان بيرفض و بعدين بقت حاجة عادية مع الوقت و بعدين بدأت مشاكل بينى و بين مامته و اخته و فى يوم كنت بتصل به فى البيت مامته رددت عليه بطريقة وحشة جدا قولتله لا كده مش حينفع و امش حنكمل مع بعض اتحايل علي و قالى فكرى (انا بصراحة كنت بدلع و متخيلتش فى لحظة ان اللعبة حتقلب جد) و قفلت معاه و استنيته يصلحينى بعد اسبوع اتصل بامى و قالها ان انا اخترت و كل شىء قسمة و نصيب.

امى قالتله مينفعش الكلام ده فى التليفون تعالى و نتكلم بس هو للأسف شخصية سلبية مش بتواجه. جوز اختى حاول يدخل اتصدمت لما قاله انى عمرى ما وقفت جنبه و ان انا اللى مدلعة اوى المهم سبنا بعض و اجوز اختى قاله تعالى اتفضل خد حاجتك بس هو ساب الشبكة قصاد الفلوس اللى انا سلفتهاله و فضلت اتصل به اتصل به مكنش بيرد عليه و يقفل الموبايل و عددت السنين و قابلته اون لاين كان مسافر فى انجلترا و اتكلمنا مع بعض و افتكرنا الأيام الحلوة اللى بنا و قالى انت اللى دمرتى كل حاجة

و وعدنى انه حيجى اسكندرية و نرجع لبعض و لما نزل مصر اختفى كلمته على الموبايل من نمرة غريبة عمل نفسه مش سمعنى بعتله sms بلومه و اقوله انا صدقتك و صدقت نفسى المهم مردش .. و بعدها بسنة شوفته اون لاين تانى و احنا بقلنا سنة بنتكلم دلوقتى و حسيت ان هو مبسوط اوى و بيقولى كلام حب و حاولت ابين له انا اتغيرت ازاى و حسيت يا مروة ان اول لما بقرب عند نقطة معينة يقولى ان احنا closed friends بس هو مش بيتكلم معايا كأصدقاء عايز يمسك العصايا من النص.

انا اعمل اه اقطع معاه؟ (هو شخصية سلبية و مش بيسامح بسهولة و بيحب يعيش دور الضحية) هل ممكن انساه و لا ده خوف من تجربة جديدة و سن 30 سنة بالإضافة انه مدرسة فرنساوى و انا كمان يا مروة ناس كتيرة اوى ممكن تقول اه التفاهه دى بس بجد صدقنى التوافق ده شىء مهم اوى و حاجة صعبة انك تلاقيها. (انا نسيت اقولك انه عنده دلوقتى 38 سنة و متجوزش لدلوقتى زى متقولى كده خلاص مش فارقة معاه و الله اعلم ) شكراا

 
 
____________________
 
 
ايه يا لوزة دا؟!!! فين عقلك
 
 
الموضوع مات و شبع موت
 
و هو منفض
و بيلعب
و بيتسلى بيكى و بعشرة غيرك اون لاين
 
و بعدين انتى اصلا عايزة تتجوزيه ليه لما انتى بتقولى انه سلبى و انه متدلع و انه مش بيواجه و انه بارد و انه كبر من موضوع الجواز و بقى مش فارق معاه
عايزة تتجوزيه ازاى بعد ما قال انك عمرك ما وقفتى جنبه
و ساب امه تبهدلك
و رماكى زى اللى ما صدق اول ما قلتى نسيب بعض
 
لو فى حد هنا عايش فى الوهم و عايش دور الضحية هو انتى
 
ممكن بقى تفوقى لحالك و تقلبى الصفحة دى .. زى ما هو قلبها و قلبك انتى شخصيا
Bookmark and Share