لوزة و النت

Date posted: February 15, 2010


انا عندى 23 سنة اتعرفت على واحد على النت بالصدفة و هو عرفنى على نفسه وقالى هو بيشتغل فى ليبيا حاليا المهم كان كلمنى فى بداية الامر تعارف بس بعد كدة اتعلقنا ببعض وبقى يكلمنى على طول بس بتكلم فى الدين والصلاة والصوم واى حاجة تانية وبعدين قالى انه حبنى وعايز يرتبط بيا وانا وافقت وقلت ليه مافيش مانع لما تنزل ممكن تيجى عندنا وبعدين قبل ما ينزل بيوم اتصل بيا وقالى انا نازل بكرة وخلاص وحاولت انتظر فيه كتير اكتر من ثلاث شهور ما فيش خبر عنه خالص وحتى موبيله غير متاح وفجاة فى يوم لقيته بيتصل بيا وبيقولى لو قولتلك ان انا سفرت دبى هتصدقينى جالى شغل هناك مفاجىء وبعدين رجعت تانى ليبا دلوقتى وحاولت اتصل بيكى او اقولك رقمك مش كان معايا علشان الخط بتاع ليبا مش كان شغال انا اسف وسمحينى والله انا عارف انى مذنب فى حقك ومش عارف اعمل اية علشان اصلح غلطيتى المهم انا صدقته بس مش على طول سبته يتعذب شوية زى ما عذبنى كدة المره اللى فاتت دلوقتى قدامه شهرين لعند ماينزل وبيقولى هتستنينى ولا اية وانا بقوله انت بتحبنى قوى وانت مش قادر تعمل اى خطوة ايجابية خالص وهو يقولى والله مستنى العقد بس اخد العقد وانزل نتجوز وارجع تانى وانتى معايا نعيش هناك على طول ونبقى ننزل فى الاجازات بيقولى دلوقتى اتصل بمامتك اقولها فى التليفون ولا اية رايك انا محتارة فى الموضوع دة وبعدين ماما ممكن تساله انت عرفتها منين وشوفتها فين وبعدين حتى لو اتكلم دلوقتى هو قدامه شهرين زى ما قالى اعمل اية ؟ ممكن تقوللى اية رايك فى الموضوع دة
ايه يا لوزة الكلام الغريب دا؟
هو انتى ليه هترمى نفسك الرمية السودا دى؟
دا انتى ما تعرفيهوش و ما شوفتيهوش و ما فيش بينكم مواقف و احتكاك مباشر يخليكى تحكمى عليه
ازاى تتجوزى كدة؟
افرضى اتقابلتم و ما حصلش توافق و قبول
انتى عارفى ان فى ناس بتسيب بعض علشان طريقة نطقه او نطقها بتعصب
او شكله و لا شكلها فى الاكل مقرف
و لا الريحة
و لا نبرة الصوت
و لا المشية
و لا حركة الايد
افرضى طريقة كلامه وسط الناس عرة
و لا طلع بخيل
و لا طلع عصبى
و لا مدمن
و لا كداب و سرح بيكى فى كل اللى قاله
و لا اى مصيبة تانية
انتى حبيتى صورة فى خيالك على النت مش راجل لحم و دم
اما بقى موضوع اختفائه
هو غالبا نزل مصر و شاف عروسة و ارتبط و خلع منك
و لما الموضوع باظ رجع يدور عليكى
و طبعا لقاكى لسة قاعدة مستنية
ايه يا لوزة الكلام دا بس؟
Bookmark and Share