هو عريس طنط سوسو بيتصرف كدة ليه؟

Date posted: February 11, 2010


كيفيك استاذة مروة انشالله تكونى بخير وصحة وسعادة دايما يارب

كنت عاوزة رأى حضرتك كدا فى موضوع يخصنى….من شهر ونص اتقدم لى عريس عن طريق قريبة والدتى (اسمها سوسو) وكنا موافقين وهو كمان كان باين من القاعدة معاه هو ووالدته انهم موافقين عليا وكانوا بيتكلموا بكل ثقة….وقبل ما نمشى أخد وصف لعنوان البيت عشان يسأل علينا … وبعد كدا والدته اخدت رقم موبايلى انا وماما علشان تبقى تكلمنا… المهم فات ولا اسبوع وسألنا قريبة ماما (سوسو) كانت بتتهرب مننا … فقلنا خلاص هم مش موافقين بس هى مش عاوزة تقول علشان احنا مش نزعل… وبعدها بإسبوعين اتصلت بينا وقالت لماما ان والدة العريس عاوزة رقم موبايلنا عشان الورقة ضاعت منها بالرغم من انى كتبت لها رقمى على موبايلها… المهم هى اخدتها ومتصلتش بينا خالص….لكن كانت بتتكلم مع قريبة ماما دى علشان تقنعنا اننا نوافق… لأنه فات ولا شهر ونص على الموضوع وهو العريس (مشمش) متكلمش ولا حتى اتصل بـ(سوسو) علشان يقولها رأيه….فـ(سوسو) اتكلمت مع محمد فى التليفون وبتسأله: رأيك إيه؟؟؟

سألها: أهل البنت رأيهم إيه؟؟؟ (فى موضوع زاى كدا مين المفروض إنه يقول رأيه الاول وبعدين الطرف التانى يقرر ساعتها مش العريس برضو ولا أيه)

فقالت له: انا عاوزة رأيك عشان فى عريس تانى بجد مش هزار وأهل البنت هايجوا يزورونى يوم الجمعة… انت قعدت ياخويا ولا شهر ومش قلت رأيك هى هاتستناك!!!!

قالها: والعريس اللى انتى جايباه ده سُخن؟؟؟ (أعتقد انها كلمة عيب انه يقولها لواحدة ست)… وبعدين قالها: يعني البنت مش موافقة عشان خايفة انى اكون متزمت عشان مربى ذقنى…انا عامة مش فارقة معايا انها تكون لابسه خمار ولا حتى نقاب ….المهم البنت تكون كويسة ومحترمة وده اللى انا شفته منها… وانا عامة هعاملها بما يرضى الله لأنى انا برضو عندى أخت بنت ومسيرها فى يوم هاتتجوز…على العموم لما يجوا يوم الجمعة قولى لى علشان أجى واتكلم معاهم

أقول لحضرتك رأى ماما:الراجل دا محترمناش…. كدا يفوت شهر ونص ولا حتى يتكلم يقول رأيه أيه…دا كدا عدم احترام لينا …طب كان يتكلم يقول اى حاجة لو هو مش موافق… مش يشوف رأينا الاول ايه وبعدين يقرر على مزاجه… وبعدين ايه الكلمة اللى قالها دي (سُخن) مش عيب كدا إحنا قاعدين فين… دا شخص مش بيحترم حد… وكمان عاوزنا نجيلوه عشان ساعتها يقرر ويكلمنا

أما رأى أنا :كنت بقول لأه… لكني بقولها وقلبى بيوجعنى اوى واللهى العظيم لغاية دلوقتى

نسيت اقول لحضرتك ان بابا موافق من باب انه يسترنى يعني لأنى عندي 27 سنة وبقالى فترة يتقدم لى خُطاب ومش يحصل نصيب ولا 10 مرات

السؤال هنا: فين الغلط اللى فى الموضوع دا؟؟
لو انا فى ايدي الحل اعمل ايه بالظبط؟؟
لو حضرتك شايفة انى اكمل الموضوع… أقنع ماما إزاى بكدا؟؟؟
لو حصل انه فى نصيب واتخطبنا ولو هو انسان مش تمام اعرف ازاى؟؟
على فكرة هو شقته جاهزة من كل حاجة وعاوز يتجوز فى خلال شهرين
إزاى اقنعه هو ووالدته ان فترة الخطوبة تتطول شوية؟
__________________________
اهلا يا مشمشة
انا هفسرلك اللى حصل و انتى تقررى انتى عايزة تعملى ايه
العريس دا زى ما انت بتقولى جاهز و مستعجل و عايز يخلص فى شهرين
و هو كدة ضيع من الشهرين شهر و نص
ليه بقى؟
لانه كان بياخد لفة فى سوق البنات يشوف هيلاقى احسن منك و لا لأ
و مامته لما اتحججت ان النمرة ضاعت كان علشان تسيب الباب موارب .. يعنى بتقولك انتى و مامتك ان انتم لسة فى اللعبة و ما اتقلشتيش
هو بقى خد لفة … قابل ناس رفضوه و قابل ناس رفضهم و لسة بيدور
لان احساسه بيكى لا رفض و لا قبول
علشان كدة هو لسة بيدور
كلمة سخن اللى استخدمها لا تعكس عدم احترامه للواسطة على قد ما بتعكس تفكيره فى الجواز و فى العروسة … واحد رايح يشترى حتة أرض و لا عربية مش زوجة و شريكة حياة … ممكن تستبدلى كلمة سخن دى بكلمة “انقح منى” …. فهمتى؟
Bookmark and Share