عزيزتى مروه
صباح او مساء الخير حسب الوقت اللى بتقرى فيه رسالتى انا بشتغل مهندس وعندى 23سنه خطبت يادوب من 6شهور والحمد لله والعلاقه بينى زى الفل لدرجه ان فبعض الاوقات والله وبدون مبالغه بحس ان احنى توام لكن فى مشكله صغيره
انا لسه سامع حلقتك مع ياسمين عن الخيانه واسبابها وانتى قولتى ان لازم الراجل يهتم بشريكه حياته عشان ما تدورش على الاهتمام ده بره انا متفق معاكى تماما ودا اللى انا بحاول اعمله بس المشكله ان انا رومنسى شويه او كتيييييير وخطيبتى مش كده خاااااااااااااااااااااااااااااالص هى شخصيتها بتميل للهزار والضحك اكتر وانا مش كده انا كنت متربى انا واخواتى بالبلدى مئفول علينا وده فبدايه شغلى كان مسببلى مشاكل فالتعامل بس الحمد لله اتحسنت كتيرالمهم ساعات كتير اقولها بحبك تقولى شكرا او ربنى يخليك هى ساعات بتتجاوب وتقولى وانا كمان بس انا بحس ان هى حريصه زياده اوى قوليلى اعمل ايه اتصرف معاها ازاى وانا اسف على الاطاله وياريت تجاوبينى
____________________________
اى شئ يا مشمش زاد عن حده هيتقلب ضده على طول
يعنى العقلانية بزيادة غلط و الرومانسية بزيادة غلط
انت متأكد انها بتحبك و انها مبسوطة معاك … صح؟
يبقى مافيش داعى “تشحت” منها الكلمة الرومانسية
انت غرقتها رومانسية و حنية و كلام حب لحد ما هى زهدت فيه .. لا بقت عايزة تقول و لا عايزة تسمع و لا عايزة ترد
يبقى انت تقفل الحنفية شوية … انا مش باقولك تبقى جاف او قليل الذوق … انا باقولك تبقى عادى … تتكلم كلام عادى زى ما اتنين اصحاب قريبين بيتكلموا .. و هى مع الوقت هتفتقد الرومانسية و مع الوقت هتحتاج انها تعبر عن مشاعرها و مع الوقت هى هتقول كلام حب
اديها مساحة و وقت تحس باحتياجها للرومانسية و مساحة و وقت تعبر بدل ما هى على طول دلوقتى فى موقف المتلقى
