صباح الخير يا مروة
أنا عندي 24 سنة
ارتبط قبل كدة مرة شهرين بس ونهيت الموضوع عشان كان فيه عيوب معينة مكنتش هاقدر أعيش معاها وأتأقلم عليها مع انه كان انسان كويس قوي وبيحبني قوي قوي ، وبعد فترة أعجبت جداً بواحد وكنا بنتكلم كتير وقالي انه معجب بيا وعايز الموضوع بجد وانه عايز لما يكون قادر ييجي ويكلم بابا ووقفت جانبه وكنت بشجعه في كل حاجة وبدأت أهتم باهتماماته وحاسيت أنا كمان بحاجة حلوة أوي ناحيته وده كان مخليني مبسوطة جداً وبعد فترة هوا سافر يشتغل بره وبرده كنا بنتكلم كتير وماشيين في الحياه مع بعض وسفره مكنش باعد بينا خالص بالعكس ده قرب بينا أكتر ، وفجأة اختفى ومبقناش بنتكلم تاني وفضلنا كده سنة كاملة وكنت مستغربه جدا لإنه كان حاسس قوي باللي أنا بعمله عشانه ومقدر ده كويس لأن عموما الولاد بيتخيلوا ان ده واجب عليكي وانك كده عادي وانك كده مبتعمليش حاجة بس هوا مكنش كده .. وفي السنه اللي هوا اختفى فيها دي أنا كنت بقنع نفسي إن ده حد ميتزعلش عليه وكتمت حتى إني مدايقة وده لطبيعة شخصيتي إني كتومة جداً وكنت فاكرة إني خلاص كدة أنا تمام جدا وأقلمت حياتي من غيره .. لحد ما عرفت انه خطب فجأه الدنيا اتغيرت وحسيت أد ايه انا كنت بضحك على نفسي واني كنت بقول ان انا تمام وانا مش كدة ، كنت بقول انه حتى لو رجع يكلمني انا مش هارجع مهما حصل وانا أصلاً كنت مستنياه بجد يكلمنى ويقولي هوا ليه عمل كده .. وحاسيت إني مكسورة أوي من جوا إن أنا وصلت نفسي للمرحلة دي لمجرد إن انا مش عايزة أزعل عليه وديتش نفسي فرصة إني أزعل وأدايق
وبعد كدة أنا قررت إني لازم أشوف حياتي وأعيشها زي ما أنا عايزة حياتي تكون
أنا مقتنعة جداً بالجواز ونفسي أعمل بيت كويس وحياة كويسة بس مع الشخص المناسب أللي اقدر أديله كل المشاعر الكويسة اللي عندي ولو ماجاش أو مش لاقيته يبقى عدم الجواز أحسن .. بس في نفس الوقت خايفة أكمل حياتي لوحدي
أنا مش بحب فكرة الجواز التقليدي مع إني بجربها وبشوف ناس ، بس من فترة شفت واحد لو فكرت فيه عقلياً فهو مناسب جداً والدماغ والصفات اللي أتمنى تكون في الإنسان اللي أرتبط بيه ، لكن عاطفياً لالالالالالالا ، أكيد أنا عارفة إن بالطريقة التقليدية دي عمري ما هاشوف حد أبقى بحبه يعنى بس في إحساس تاني كدة ممكن يخليني مقبلة إني أتعرف عليه وكمان أكون أنا حابه كدة وعايزة كدة أو حته مبسوطه بيه وخصوصاً إني مجربة يعني ايه تشوفى حد أول مرة يبقي عندك إحساس انك عايزة تشوفيه تاني وتبقي مبسوطة قوي وانتي شايفاه
أنا عموماً شخصية صعب أوي أحب حد أو حد يلفت انتباهي بس مجربة قبل كدة أحاسيس مختلفة حلوة وممكن أكون حاسيتها من أول مرة شفت فيها الشخصيات دى على الرغم ان ممكن مايكونش فيهم كل حاجة أنا بحبها أو تعجبني .. فا أنا دلوقتي محتارة عشان أول مرة أقابل حد عقلياً وشخصياً كويس بس مفيش ناحيته أي مشاعر ومش قادرة أتقبله عاطفياً .. مش عارفة أضغط على نفسي وأحاول أتكلم معاه مع إن ده بيعمل عليا ضغط جامد ولا أقول لأ وخلاص وده هايريح دماغي أكتر كتير !!
وبجد أنا متأسفة إني طولت عليكي قوي كده واتكلمت كتير واعذريني لو كنت مملة بس أنا مش بعرف أعبر وأقول اللي أنا عايزاة عن طريق الكتابة .. فا حاولت على أد ما أقدر
شكراً جداً على اهتمامك
_____________________________________________
اهلا يا جميلة
طبعا التجربة الأولى دى تجربة صعبة لكن الواحد بيعيش و يتعلم
أغلب الشباب اللى بيكونوا مخنوقين من العيشة فى مصر و بيدوروا على شغل برة مش بيكون الارتباط فى بالهم .. يعنى ممكن يحب و كل حاجة بس كلام فى جواز و كدة لأ .. لأنهم بيكون عندهم احساس عالى و بشع بالظلم … مصر ظلمتهم … ابسط حقوقهم مش لاقينها .. و الحل؟ الغربة! أول ما بيسافروا الحياة الجديدة بتاخدهم … كل اللى كان فى مصر قبل السفر بيبقى صفحة و اتقلبت و هناك بيبتدوا يركزوا على مستقبلهم و يحوشوا و يكونوا نفسهم … التأقلم على البلد الجديد و الشغل و الحياة بياخد وقتهم و مجهودهم .. علشان كدة علاقتهم بتضمر
بعد شوية و اول ما الوضع يتحسن بيدوروا على الجواز .. فى اللى بيدور فى الدفاتر القديمة و فى اللى بيقابل ناس هناك و فى اللى بيتجوز صالونات فى الاجازة
طبعا دى مش قاعدة .. فى ناس بتسافر و تحوش و تفضل محتفظة بحبها .. بس الناس دى الاستثناءات
هو الولد لو كان ناوى على حاجة جد كان قابل باب ان شالله ربط كلام قبل ما يسافر
المهم
حكاية و خلصت
العريس التانى بقى
تفتكرى انت ازاى هتشوفيه و انت لسة بصة على اللى فات و بتقارنى و متوقعة نفس المشاعر؟
انا مش باقولك وافقى … انا باقولك لو انت مش مستعدة نفسيا لصفحة جديدة بلاش تبهدلى ولاد الناس .. الرفض احساس صعب
و لو انت فعلا مستعدة و هو مش عاجبك .. خلاص بناقص … دا حقك
لكن بلاش الافكار الهدامة اللى من نوعية انك هتعيشى طول عمرك لوحدك و الكلام دا
انت لسة صغيرة و البحر مليان سمك
