زلة لسان و عقل باطن و حاسة سادسة

Date posted: February 3, 2010


ازيك يامروة عاملة ايه؟انا بحترم افكارك جدا وبحبك اوي ربنا يحميكي
انا مشكلتي مش مشكلة اوي انا بس محتارة
انا عندي 21سنة في كلية هندسة ومتفوقة جدا في دراستي وبنت ناس اوي الحمدلله
اتعرفت علي شاب من الانترنت (انا عارفة رئيك في الموضوع ده بس تابعيني للاخر)
هو خريج كلية من اد كدة بس ماوقفش عند كدة اخد كورسات كتير اوي وغالية اوي واشتغل في مكان محترم اوي ومرتبه عالي اوي ماشاء الله ,كاان بيحب واحدة قبل كدة وحكالي عنها وانه عايش علي ذكراها
وبعديها بفترة قالي انه بيحبني وكدة وسالته عنها قالي ان الموضوع خلص وانه بيحترم الذكري دي وبيحاول ينساها بس قالي انا مش هكدب عليكي هي عانت اوي وظروفها كانت وحشة وانهم ارتبطوا خمس سنين وحاجات كدة وقالي ساعديني انساها لاني بجد بحبك اوي وعايز اكمل حياتي معاها وان موضوعها خلص ومستحيل يرجعوا لبعض
انا بصراحة حاسة اني مايلة نحيته شويتين بس مش حب
هو محترم ومرح ومجتهد ومتدين وابن ناس وكل حاجة بس انا مش بحبه الحب الافلاطوني زي مابيقولوا
وكمان هو زي ماتقولي متعقد من موضوع كليته ده وكان نفسه اوي يدخل هندسة ولما يسالني عن حاجة في الشغل يتريق ويقولي امال هندسة ايه بقي….بس بهزار طبعا
بيني وبينك خايفة اعلق نفسي بيه اوي واهلي يرفضوا علشان الكلية وكدة بالرغم اني مش فارق معايا خااااااالص
بالعكس مبهرة باجتهاده اوي
بس اللي قالقني موضوعه القديم اللي محترم ذكراه اوي كدة وكمان اني مش بحبه زي مابيحبني وهو كمان صريح
اووووووي اي حاجة بيحسها نحيتي مش بيخبيها يعني جات فترة وحس بفتور في مشاعره من نحيتي وقالي كدة وانا قولتله اوكي انا ماطلبتش اصلا منك حاجة
بس بصراحة الفترة الاخيرة حسيته انسان كويس
من الاخر يامروة انا مش عارفة اخد الخطوة اني ارتبط بيه رسمي ولا لا لانه عايز يقابل اهلي….قوليلي ايه رئيك
معلش ياقمر صدعتك
_________________________________
اولا انا اخدت بالى من حتة غلطة فى كلامك …. كشفت المستور كله .. فى علم النفس اسمها
Freudian Slip
زلة لسان كشفت المستور
“وقالي ساعديني انساها لاني بجد بحبك اوي وعايز اكمل حياتي معاها وان موضوعها خلص “
عايز ايه؟ عايز يكمل حياته معها
سواء ان كنتى مؤمنة بكلامى دا و لا لأ .. دا احساسك بيه و بعلاقته السابقة … الحاسة السادسة بتاعتك متأكدة انه لسة بيحبها و انه نفسه يكمل معها
ثانيا
موضوع النت …. انا مش هعيد و ازيد فى كلام قلته قبل كدة كتير .. بس انتم اتقابلتوا … خرجتوا …. شوفتيه و شافك … حصلت بينكم مواقف واقعية … دا الناس بتنفر من بعض على أتفه الاسباب بمجرد انهم يتقابلوا
ثالثا
يعنى ايه تنسيه الحب الاولانى؟
انت بنت و لا ممرضة؟
ما ينسى مع نفسه و يجيلك ساق سليم
رابعا
لما انت مش بتحبيه و مش منجذبة له و مش متعلفة بيه .. عايزة تدخليه البيت ليه؟
خامسا
موضوع الكلية مش فارق معايا و احتمال كبير ما يفرقش مع اهلك … بس مركبات النقص و الغيرة واردة …. و انت حاطة الموضوع فى بالك بدليل انك اخدتى بالك من هزاره و فوتيه بمزاجك
Bookmark and Share