الصداقة بين البنت و الولد حلوة الا فى الحالة دى

Date posted: February 1, 2010


انا عندي 22 سنة ومش مرتبطة بس ليا صديق ولد عندي بالدنيا كلها على الاقل بيسمعني مش بيعد يتريألي ع كل كلمة بقولها زي اهلي المهم انا حاسة بحاجة من ناحيتي وخايفة اكون بحبه وهو مش مستعد وكان قالي قبل كدا انه مش مستعد للارتباط دلوقتي لانه طالع من تجربة مؤثرة ولسة قلبه مش صافي..هو الوحيد اللي ف حياتي والي بعد اتكلم معاه بصراحو وبنحكي لبعض ع كل حاجة وبالساعات رغي انا معرفش صحوبية الولد والبنت بتبئى كدا ولا احنا متداريين ورا يافته اننا اصحاب ومحدش عايز يقول مشاعره للتاني عشان منخسرش بعض..المهم انا مليش غيره ف الدنيا وبحب اكلمه كتير ومبصدق اي حاجة عشان اتصل بيه وهو كمان بيكلمني كتيرر ..احنا مش بنشوف بعض وانا بحب لما اتكلم مع حد اشوفه وشي ف وشه فبتلكك في اي حاجة عشان اشوفه واتكلم معاه وهو مش بيطلب عشان شايف ان كدا غلط ومينفعش ومبيخرجش مع بنات ولوحدنا كمان لما بقوله مش بيرفض بيوافق بيقولي ببقى عايز اشوفك بس مش هطلب ده..ودي حاجة مضيقاني اووي اني اعد اطلب ..وكمان لما بتحصل اي حفلة او حاجة بقوله ييجي يحضرها عشان ابئى معاه..بجد لما بشوفه بتفرق كتير اوووي حد غير اللي بيكلمني في التليفون..نسيت اقولك اننا مع بعض من ايام المدرسة واتفرقنا في الجامعة بس…والمشكلة كمان انه اول حد ف حياتي ومبهوره بذكائه وثقافته اووي عشان دي اول حاجة بتشد فيها للولد وخايفة من القرب ده وان كل حاجة هو فيها..
اعمل اايه؟؟وكمان هو من اللي بيقولو انا اصاحب بنات واعرف وبتااع لكن اختى لا بقوله امال تعرفني ليه وبتكلمني ليه بيقولي انتي حاجة تاانية خالص غير كل البنات وانا مش عارف لا اسيبك ولا اكمل معاكي وحاجات زي ديه…
اعمل ايه ؟؟
__________________________
تحكمى عقلك و تمسكى فى قلبك باديكى و سنانك و تلاقى لنفسك منفذ تانى لمشاعرك و لعواطفك و لحكاياتك
قلبك مسئوليتك لوحدك
ترميه فى الأرض .. انت اللى هتتوجعى
ترميه فى ايد حد مش مستعد .. انت اللى هتحسى بالاهمال و قلة القيمة
الولد من الاول قال انه مش مستعد
هو مستلطفك؟ ايوة
متونس بيكى؟ ايوة
مطرية عليه عيشته؟ ايوة
بيحبك و مش عارف؟ جايز
لكن احنا لا هنعرف نقرره و لا هنعرف نغيره و لا هنعرف نسأله و لا هنعرف نعمل فيه اى حاجة
يبقى فى ايدنا ايه؟
انت و قلبك و مشاعرك و تصرفاتك و توقعاتك … مالكيش حكم على حد غير نفسك
هتعملى ايه بقى؟
Bookmark and Share