fbpx
مونتيسوري مصر- تقدمها مروة رخا

جات لى بعد ما خربت مالطة

آسفة يا مروة
أنا كتبت الرسالة تانى بالعربى
انا كان نفسى أكتبلك من زمان
انا عندى 23 سنة ..خريجة علوم .. لما دخلت الكلية17 سنة كان فى ناس كتير بتعجب بيا وبيحاولوا يرتبطوا بيا وإتقدمولى .. بس قلبى مدقش لحد منهم
غير لما قابلت واحد فى الكلية .. كنا بنتعامل على إننا زمايل وفى جروب واحد بس إحساسى ناحيته كان مختلف
وانا كمان كنت حاسه إنه بيحبنى .. وفعلا بعد فترة قالى إنه بيحبنى ..إرتبطنا أسبوعين كان أحلى وقت فى عمرى .. أنا إتمنيته كتيير بس عقلى دايما كان بيقولى مينفعش
عشان هو كان مستهتر شويه وبيعرف بنات كتيير .. فحاولت أقفل الموضوع من ناحيتى بس فضل إحساسى
(كنت بستنى بس ظهوره قدامى .. وجوده قدامى بس كان بيخلينى مبسوطه .. وأقلق لو إتأخر شوية .. كنت بموت فى البرفان بتاعه .. حاجات كتيير )
وفى اول سنة 3 قابلت واحد فى مناسبة ما .. وممكن تقولى كان فى إعجاب من الطرفين جه إتقدملى وإتخطبنا .. كنت مبسوطة بس بعد كام شهر إكتشفت إننا مختلفين جدا .. وكان فى مشاكل وحاجات .. وفى الوقت اللى كان بيزيد فى المشاكل .. كان الشخص اللى فى الكلية دا بيحاول يقرب منى أكتر .. بس مكنتش بدى فرصة لكدا (بس ساعات كنت ببقى متلخبطة مش عارفة انا بحب مين فيهم )
.. ومع زيادة المشاكل كنت بتعب بس كنت صغيرة وخفت من موضوع الإنفصال فكنت بحاول أعدى .. .. وبعد سنتين ونص وقبل فرحنا حصل مشكلة كبيرة وإنفصلنا .. تعبت أوى منه .. جرحنى كتير
وفضل سنة يحاول يرجعلى ويكلمنى (كان لسه فى مشاعر ناحيته) ومع الضغوط منه إستجبت .. إتفقنا هيجى البيت تانى .. وقلت لأهلى .. وجالى عريس فى الوقت دا فقلتله .. لقيته معملش حاجة وقالى براحتك .. رفضته عشان يحس إنى متمسكة بيه .. وجالى بعديه واحد تانى على طول وقلتله .. حسيت إنه متردد فى القرار اللى خده إنه يرجع .. إتجرحت أكتر ووافقت على العريس .. هو كان كويس وبعد فترة رجع تانى خطيبى الأول يكلمنى ويتصل ويعتذر ويقولى آسف .. انا هستناكى .. وكلام من دا .. بس طبعا مكنش ينفع أرد .. وفضل يظهر فى الأماكن اللى بكون فيها ونظراته وكلامه خلى الناس تلاحظ .. وبعد فترة حصلت مشاكل وإنفصلت .. مش هتصدقى لقيت المعاملة إتقلبت 180 درجة .. ولقيته بيقول أنا هخطب .. يااااه .. مش قادرة أقولك حسيت بإيه وقتها.. كنت بحس إنى بكرهه أوى
هو خد وقت كتير منى .. بس أقدر أقو لإنى تخطيت الموضوع دلوقتى
وبعد كام شهر إتخطبت كام شهر بس فركشت لأنه كان طباعه صعبة اوى
وبعدها مرة كمان إتخطبت لواحد جارى فترة صغيرة وإنفصلت ..
ودلوقتى أنا مخطوبة .. لحد كويس .. بس مش حاسة إنى مبسوطة أحيانا بقول إنى فاقدة الإحساس .. مش حاسة إن فى حاجة بتبسطنى أصلا .. كان زمان حاجات صغيرة زى رنة أو رسالة أو وردة ولا ورقة شجرة بتخلينى طايرة .. لكن دلوقتى لا .. حاسة إن مبقاش ليا خلق لأى حاجة .. حاسة إنه مش واخد منى أى مساحة
اللى مضايقنى أكتر إن الشخص بتاع الكلية دا بيجى على دماغى كتير جدا دلوقتى .. لدرجة إنى بعتله كام مسج من رقم غريب حاجات كان نفسى أقولهاله من زمان .. وساعات بتصل أسمع صوته بس وأقفل .. أنا إتضايقت لما عملت كدا .. وخدت قرار إنى مش هعمل كدا تانى ..
هو كان بيظهر كل فترة ويحاول إننا نرتبط .. بس ساعتها عقلى كان بيقف قدامى ويقولى لا .. ولحد دلوقتى بيتمنى إنى أقول أه
واللى بيضايقنى إنى مش عارفة أحس الحاجات اللى كنت بحسها ناحيته مع أى حد تانى ..
مش هى دى الكيميا اللى كنتى بتتكلمى عنها فى الراديو ؟؟
إانا قربت أتجوز
بس مش عارفة هعرف أتجوز وأنا إحساسى كدا ..
ولاممكن بعد الجواز الأحاسيس دى تتغير .. تفتكرى ممكن أحبه ؟؟ ممكن أبقى مبسوطه ؟؟
تفتكرى العيب فيا انا؟؟
ملحوظة : ممكن تفتكرى إنى بتخطب لاى حد بيتقدم بس لا انا رفضت ناس كتيير كنت بختار بواحد إتنين تلاتة
معلش طولت ..
بس بجد محتاجه حد يقولى اى أحاجة .. انا عمرى ماإتكلمت مع حد فى الحاجات دى
بس حقيقى تعبت

______________________________________

انت عدوة نفسك يا لوزة
يا حبيبتى انتى ارهقتى نفسك عاطفيا لدرجة التبلد
من موضوع لموضوع و من عريس لعريس و من خطوبة لخطوبة لما مشاعرك نحست
انت فقدتى الاحساس و بقيتى شغالة على الاوتو بايلوت
خطيبك الحالى ذنبه ايه؟
و انت هتتجوزى ازاى و انت مش حاسة بحاجة غير الحنين لقصة حب قديمة؟
مستعجلة ليه؟ خايفة من ايه؟ اى قرار هتاخديه دلوقتى غلط
لو قررتى تنفصلى غلط
و لو قررتى تكملى غلط
انا مش عارفة اقولك ايه
انت مش عارفة تعيشى من غير قصة و راجل و عريس و بتاع
انت فين و مين يا مشمشة؟
لو جردتك من كل مواضيع ارتباطك هلاقى ايه؟
ينفع تأجلى فرحك؟

ينفع تقولى لخطيبك انك محتاجة اجازة؟ انك قلقانة؟ انك مترددة؟

من هي مروة رخا؟
مروة رخا: موجهة مونتيسوري معتمدة دولياً من الميلاد حتى 12 عام. Marwa Rakha: Internationally certified Montessori educator from birth to 12 years.

بدأت “مروة رخا” رحلتها مع “نهج وفلسفة المونتيسوري” في نهاية عام 2011 بقراءة كتب “د. ماريا مونتيسوري” عن الطفل والبيئة الغنية التي يحتاجها لينمو ويزدهر. تلت القراءة الحرة دراسة متعمقة للفلسفة والمنهج مع مركز أمريكا الشمالية للمونتيسوري

“North American Montessori Center”