تفتكروا البنت دى مصيرها ايه؟

Date posted: January 31, 2010


أزيك يا مروة أنا محتاجه رأيك جدا وضرورى وواثقة فى تفكيرك جدا

أنا عندى خلاص هأكمل 25 سنة ان شاء الله من أسبوعين بالضبط أتعرفت على ولد عنده 28 سنة أحنا الاتنين فى كلية طب بس هو كان جامعة 6 أكتوبر بس أمتيازه كان فى جامعة أسكندرية وهو من أسكندرية أصلا وأنا كمان وهو كان من أصحابى على الفايس بوك بس أنا ما كنتش أعرفه شخصيا المهم أتكلمنا صدفة على الفايس بوك وأتشدلى وبعدها بكام يوم طلب انه يجيلى الشغل فى الوحدة اللى أنا فيها وأنا كنت رافضة المهم بعد ألحاح منه جالى بعدها بعد ما عرفنا بعض يعنى ب حوالى 4 أيام

وخرجنا مع بعض وبصراحة ما كنتش مطمنة ليه بعد ما قابلته وفى حاجه كانت مخوفانى مش عارفه ايه رغم ان والده ووالدته اتصلوا يومها وقالهم انه معايا وأنا طبعا ما كنتش مصدقة انه حاكيلهم اى حاجه عنى وهو طبعا كان صريح معايا فى موضوع انه كان يعرف بنات وانا أكيد كنت فاهمة كده يعنى ولد وقاعد لوحده او مع أصحابه فى بلد تانية اكيد عرف بنات طبعا

بصراحة قلت أنا مش هأقابله تانى ما أرتاحتش خالص هو طبعا كان العكس أتشدلى جداوكان بيكلمنى اكتر وبيعمل كل حاجه ترضينى وانا بدأت اسمعله وبعدين طلب يشوفنى تانى بس أنا كنت معترضه جدا لحد ما لقيته بيقولى أنا جايلك وقابلنى وقلتله انى بصراحة مش مطمنة ليه و مش هأحب غير الانسان الجاد اللى يرتبط بيا ومش بتاعه تسالى وخروج وماليش فكده وكلامى معاك فى الاول كان مجرد تعارف وما كنتش عايزاه يزيد عن كده عرفت يومها انه فعلا حاكى لمامته ووالده عنى وادهالى أكلمها وأتكلمت معايا كويس وقالتلى عايزه أشوفك قريب ان شاء الله ونتكلم مع بعض اول لما أنزل اسطكندرية لأن أهله عايشين فى البلد

المهم يومها لقيته بيقولى انه عايز يرتبط بيا ويخطبنى وعايزنى أعرفهم فى البيت كنت خايفه أقلهم عندى لأحسن ما يكونش متأكد من نفسه ويحرجنى مع أهلى
المهم قلتلهم يوم الخميس اللى فات وعرفته انى لازم أتأكد منه علشان نتخطب ولازم أعرفه وأطمنله هو اللى كان مستعجل وأنا اللى كنت بأجل

المهم يا مروة قلتلهم على أساس ان بابا يحاول يسأل عنه وعلى أهله وبعدها أتقابلنا تانى وقابلت باباه وأخته فى كارفور واختى كانت معايا وباباه سألنى انتم قاعدين فين بالضبط وحاجات كده وقالى فرصة سعيدة

وهو بعدها كان بيسألنى ايه ردهم فى البيت على أساسا لو بابا وافق هو يجيب أهله او مامته ونقعد مع بعض
لحد ما بابا قالى انه سأل عليهم ووالده دكتور فى الجامعة وأخته كمان ناس محترمه

طبعا أنا حاولت أسأل ناس أصحابنا من الكلية عنه قالولى انه كويس وراجل وصاحب صاحبه وعنده اصل وبيصلى بس مشكلته انه شويه هوائى وطبيعة حياته 7 سنين فى القاهرة 6 أكتوبر ولوحده خلته يعرف بنات كتير
بس قالولى انه ما دام الموضوع جد و أهله دخلوا والموضوع وصل رسمى يبقى هو عارف هو عايز ايه

المهم يا مروة أنا كنت خايفه منه وأخدت رقم موبايل مامته علشان لو حاجه حصلت أكلمها مش عارفه بصراحة أخدته ليه من وراه
ممكن لأن حصلت بنا حاجات زيادة عن مسكة الايد وخفت منه وقلت أكيد هو مش جاد وضحك عليه

بعد ما حصل بنا كده أنا خوفى زاد من ناحيته واخدت رقم مامته وهو سافر عند أهله البلد هى جنب أسكندرية والشبكة كانت وحشه وبعدين تانى يوم موبايله كان مقفول او الشبكة مش بتجمع وبعدين مفتوح ومش بيرد عليه فخفت وكلمت مامته وطمنتنى قالتلى انه نايم وهو بصراحة محترمة جدا وزوق

المهم انه كلمنى لما صحى وقالى كده غلط انك تأخدى رقم ماما من ورايا لو طلبتيه منى انا اديهولك لكن تفتشى فى الموبايل وانا سايبه معاكى
وزعل لانى قلقلت جامد رغم ان مامته طمنتنى وقالتلى انه نايم

وهو راجع من البلد امبارح عمل حادثة طبعا ما كنتش مصداقه لحد ما فعلا لقيت اهله عنده ومامته كلمتنى تانى كانت بتسلم عليه وقلتلها حمد الله على سلامته

دلوقتى يا مروة كل تفكيرى هو هيجى البيت امتى او مامته هتشوفنى امتى او اى حاجه جد تحصل وقلتله انهم فى البيت سألوا وبيرحبوا بيهم فى اى وقت وهو قالى ان المفروض مامته كانت هتشوفنى بس علشان ظروف الحاثة الموضوع هيتأجل شوية 3 او 4 أيام لحد ما العربية تتصلح

أنا عملت حاجات غلط معاه وخايفه جدا ومش عايزه الموضوع يزيد عن كده لو هو بيضحك عليه وقلتله ما نتكلمش زعل وبعدين قالى اللى انت عايزه بس انت خلاص بقى كل كلامك هتيجى امتى مع ان انا اللى كنت مستعجل وانت اللى كنت بتأجلى

وبعدين قالى مفيش مشكلة 4 أيام ما نتكلمش فيهم لحد ما تقابلى والدتى
فى حاجه جوايا يا مروة مخوفانى منه مش عارفه عدم الثقة ده غلطتى انى مش بأديله فرصة ولا أحساسى صح كمان أخر مرة كنت معاه النهاردة المفروض العربية مش معاه بس بعد ما سبته وروحت حسيت ان هو بيركب العربية بس مش عايز يقولى مع انه كلم بابه قدامى وفتح سبيكر وسمعته بيقوله يا هيجيله يا يروحله هو يأخد العجل منه

بصى يا مروة أنا محتاجه ردك بسرعة علشان مش عايزه أعمل حاجه غلط تانية تبوظ الموضوع أكتر وفى نفس الوقت انا مش مرتاحه كده واحنا بنتقابل ونتكلم
على فكره انا قلتله ان بابا زعل منى لما عرف انى قابلته مرة بره كنت عايزه اعرف رد فعله وقلتله انه كمان زعل لما عرف انى بأكلمه وقالى ان هو المفروض اللى يسأل ويتكلم وانت ما تكلمهوش غير لما تكون فى حاجه رسمى
فقالى انت ليه قولتيله انى قابلتك بره كنت قوليله جالى الوحدة او المستشفى وقالى على موضوع انى بأكلمه قالى ليه باباكى يزعل المفروض ان احنا بنعرف بعض وبعدين الموضوع معروض عندك ى البيت وعندى وباباكى تفكيره ليه كده

ارجوكى يا مروة محتجاكى تقوليلى المفروض اعمل ايه انا خايفه اكلمه دلوقتى عايزه اتقل شويه كمان زى ما كله بيقولى ومحتاجه اعرف رأيك فى الموضوع والمفروض اعمل ايه

_____________________________________

انا مش عارفة اقولك ايه
انت بجد عكيتى الموضوع اخر حاجة
يعنى واحد انت مش عارفاه كويس و من اول مرة خرجتى معاه و انت خايفة و قلقانة و كل مرة تتكلموا تقولى انك خايفة و قلقانة … يبقى تعملى معاه اى حاجة ليه؟ ….. الا اذا انت كنتى عايزة كدة و ساعتها ما ينفعش نلومه و نقول انه ضحك عليكى لانك عارفة انت بتعملى ايه
دى كدة اول عكة
تانى عكة بقى موضوع مامته .. هى مامته هتعمل لك ايه؟ يعنى فين عنصر الأمان انه قايل لمامته؟ هل مامته كلمت مامتك؟ هل باباه كلم باباكى؟
احنا لحد دلوقتى كل اللى شايفينه انه ولد بيحكى لأهله عن علاقاته .. يا ترى أخته كدة برده؟
ثالت عكة هى مطاردتك ليه … انت دلوقتى بقيتى عاملة زى اللى فرطت فى شرفها و هتبوس رجل الولد علشان يستر عليها … البنت المذلولة المكسورة الملهوفة عمرها ما بتحلى فى عين راجل
دا مش بعيد حاسس انك تدبيسة
دلوقتى انت مش حاسة بالأمان و مكدبة كل حاجة بيقولها و مخوناه و حالتك كرب
رابع عكة انك ابتديتى تتصرفى تصرفات بلدى … بابا متضايق .. الناس بتقول … هتيجى امتى … ناقص تقوليله جايلك عريس
الرجالة مش اغبياء و الحركات دى مش بتخيل عليهم
انا مش هقولك تتصرفى ازاى … انا هسيبك تفكرى فى الكلام اللى انا قلته دا و عايزاكى تراجعى نفسك و مواقفك و قراراتك و دوافعك
Bookmark and Share