fbpx
مونتيسوري مصر- تقدمها مروة رخا

موضوع مهم جدا لكل بنت بتدور على عريس و لكل ولد بيدور على عروسة

ازيك يا مروه
معلش قرفاكى معايا واحنا الساعه 5 الفجر بس جت فى بالى كده شويه خواطر ومعرفش ليه جيتى فى بالى قلت أفضفض معاكى ….قابلى بقى يا برنسه
انا بنت عاديه جدا 24 سنه اخر سنه ليا فى الجامعه السنادى
عادى جدا
الفكره كلها جاتلى أنى بقالى فتره كده بقال بنات اللى هما عايشين الحياه شغل وخروج وفسح واصحاب ومن غير ارتباط
انا كنت منبهره فعلا بيهم وعجبانى حياتهم اوى اوى
بس لما جيت فكرت فى حياتى عايزاها ازى لقيت أنى لأ انا عايزه اتجوز
بس مش عايزه أتجوز لمجرد انه شكل اجتماعى مفروض وانه لازم البنت اخرتها الجواز لأ خالص والا كنت اتجوزت اى حد بيتقدملى وقادر يفتح بيت
انا عايزه اتجوز واحد عشان اعيش معاه الحياه …الحياه بطريقتى الى نفسى اعيشها يكون لينا نفس الاهتمامات نفس طريقه التفكير نفس الروح بنحب نسمع نفس الحاجت نروح نفس الأماكن كده يعنى
مش عايزه اتجوز واحد لمجرد انه شايفنى انى مناسبه شكلى معقول وبنت ناس واهلى طيبين وشكلى هاديه (هما بيقولوا انى رقيقه هو انا شكلى يدى كده بس انا شايفه ان اللى يعرفنى كويس يلاقينى شعنونه جدا شفتى بيتخدعوا فيا ازاى)
وتبقى الحياه ما بينا كده انا قاعده فى البيت مستنياه يجى من الشغل ونفضل قاعدين نربى العيال و دمتم على كده
يعنى أنا مثلا مش عايزه اشتغل (انا عارفه طبعا انك ممكن متوافقيش على كده بس دى قناعاتى)
بس عايزه يكون ده قرارى مش هو يفرضه عليا لأ انا مش عايز مراتى تشتغل عشان تعقد فى البيت
انا صحيح مش عايزه اشتغل بس مش معنى كده انى عايزه اعقد فى البيت انا عايزه اعيش الحياه اطنط نروح ونيجى مع بعض نعمل الحاجات اللى بنحبها سوا كده يعنى
كنت لسه بقرا فى حوارك انك انتى اللى اخترتى انك متتجوزيش وان ده بيد الواحده كلامك صح
انا بقى اخترت انى اتجوز بس مش لاقيه اللى اتجوزه
هتقوليلى استنى لما تلاقيه هقولك مش باين
كل اللى بيتقدمولى نفس العينه مفيش اى تواصل بنا على اى مستوى كلهم جاين على سمعه الاهل الطيبه والبيت المحترم والشكل المعقول كل ده كويس بس انا نفسى أحس ان اللى متقدملى ده عايز مشمشة الكيان الشخصيه الأفكار الأهتمامات انا بكل عيوبى ومساوؤى الكتيره
مش أفضل طول فتره الخطوبه امثل واهلى يداروا عليا أحسن الجوازه تبوظ
واحده تشاركه الحياه مش تشاركه السرير وخلاص
هتقوليلى أصبرى هقولك خايفه
خايفه مالقيش الشخص ده وأفضل طول عمرى لوحدى انا مش عايزه أكمل لوحدى وفى نفس الوقت مش قادره اقبل بأى حد
مش قادره وحرام كمان أظلمه معايا لانى مش هعرف اسعده
ده غير انى بواجه هجوم شديد جدا جدا جدا عليا من بابا وماما وتيتيه وعمتو وعمو وخالو وجدو ألاخوات والاهل والاقارب والاصحاب وعايزين يسمعوا أغنيه… لأ معلش دى فى رساله تانيه دى
المهم الهجوم اللى عليا ده
لانى عماله ارفض من غير سبب مقنع وكأن مش نفس الروح او مفيش توافق ده سبب غير كافى اخر واحد أتقدملى ده بابا كان هيدبسنى ويحدد معاد خطوبه وجالى انهيار و لولا الامتحانات مكنوش هيسكتوا
وبابا عقدنى قالى انتى كده خلاص عمرك ما هتتجوزى انتى بتتبطرى والبطر ده اخره وحش وبكره تشوفى وهتفضلى لوحدك…كلامه خوفنى انا مش عايزه ابقى لوحدى جمدت شويه بعد ما انهارت كتير وقولتله الأرزاق دى بتاعت ربنا و مش انت اللى هتحدد بس من جوايا خايفه
خايفه مالقيش الحد اللى بتمناه وانا مش شايفه انى خياليه او متطلعه او بطلب حاجه كبيره
واتجوز اى حد والسلام ومبقاش سعيده
وخايفه افضل استنى واصبر وافضل طول عمرى لوحدى
معلش طولت عليكى بس كنت محتاجه افضفض معاكى قوليلى أعمل ايه؟
______________________________________________
مشمشة يا حبيبتى

موضوعك دا مهم جدا و انا اتكلمت فيه كتير قبل كدة بس هعيد تانى الكلام

أولا انت تصورك للحياة الزوجية فيه شوية مراهقة
مثلا موضوع التنطيط و الفسح و الخروج و الكلام دا …. الحياة الواقعية مش كدة … ايوة هتخرجى مع جوزك بس مش بالكترة و لا بالطريقة اللى انت متخيلاها. اى خروجة دلوقتى بفلوس قد كدة … كل المطاعم و الكافيهات فيها حد ادنى للطلبات و اسعارها غالية … يعنى لو خرجك مرة فى الاسبوع يبقى كتر خيره.
و بعدين هو بيشتغل طول النهار و احتمال بعد الظهر كمان علشان هو بيصرف لوحده يبقى هيجيب منين البال و الدماغ و المزاج للخروج؟
ثانيا انت بقى فى قرار انك ما تشتغليش .. انت حرة فى قرارك
لكن اسباب قرارك برده فيها انانية … انت عايزة تقعدى فى البيت علشان مش عايزة قرف الشغل
و عايزة تتفسحى و تشوفى الدنيا
يعنى عايزة تقعدى فى البيت و تصرفى يمين و شمال
و الراجل عليه عبئ تسليتك علشان ما تزهقيش
انت من حقك تقعدى فى البيت لكن مش من حقك بعد كدة تشتكى من الملل و الزهق و انه مش فاضى و انه مش بيكلمك و انه مش طايق يسمعلك كلمة

لو هتقعدى فى البيت يبقى لازم يكمون عندك هوايات و انشطة تشغل وقتك …. و طبعا لازم يوافق عليها! و لازم يكون عندك دخل منفصل علشان هو مش مسئول عن الصرف على هواياتك …. فقولى لبابا يحط لك وديعة فى البنك تدخل لك فلوس اول الشهر

موضوع بقى تلاقيه فين و تلاقى واحد عنده نفس اهتماماتك ازاى

اولا انت لازم تحددى هى ايه اهتماماتك دى .. ايه هواياتك و انشطتك
ما ينفعش نطلب من حد انه يفهمك من غير ما انت تكونى فاهمة نفسك

و ثانيا تدورى عليه فى دايرة الاهتمامات دى

يعنى لو انت غاوية رحلات و صحراء و سفارى … يبقى هتلاقيه وسط المجموعات اللى بتطلع رحلات

لو انت غاوية اوبرا يبقى هتلاقيه فى وسط منظمى حفلات الاوبرا او نقادها او متذوقيها

كدة يعنى

لكن لو انت قاعدة فى البيت لا بتشتغلى و لا بتروحى و لا بتيجى هيجيلك ايه غير العريس اللى عايز واحدة قاعدة فى البيت لا بتروح و لا بتيجى؟

من هي مروة رخا؟
مروة رخا: موجهة مونتيسوري معتمدة دولياً من الميلاد حتى 12 عام. Marwa Rakha: Internationally certified Montessori educator from birth to 12 years.

بدأت “مروة رخا” رحلتها مع “نهج وفلسفة المونتيسوري” في نهاية عام 2011 بقراءة كتب “د. ماريا مونتيسوري” عن الطفل والبيئة الغنية التي يحتاجها لينمو ويزدهر. تلت القراءة الحرة دراسة متعمقة للفلسفة والمنهج مع مركز أمريكا الشمالية للمونتيسوري

“North American Montessori Center”