عايزة اقلع الحجاب علشان موحشنى

Date posted: November 11, 2009


شوفى يامروه انا معجبه بيكى جدا وبطريقة حلك للمشاكل وبارائك فيها فحبيت اخد رايك فى حكايتى مشكلتى ياستى ان بابا وهو شاب كان شخص عادى جدا وبعدمتجوز يمكن بكام سنه قرريبقى شيخ وماما طاوعتو عشان المشاكل لبست نقاب واحنا خمارات انا واخواتى ودخلنا ازهر بس ماما فضلت شخص عادى ربتنا باعتدال بنسمع مزيكا وعندنا دش وفيس بوك بس مفيش نادى ولا صحاب ولاد ….المهم اتعرف بالشيخ فلان واحنا ولاد الشيخ ومعارفو كلهم من نفس العينه
خلصت تعليم من غير اختلاط بشباب خالص بس حبيت مره حب مراهقه بالنظرات بس كان مع ولد كنت اعرفو فى ابتدائى الموضوع ده حصل فى اعدادى وخلص من غير ولا كلمه…..الاهم انا جيت فى اعدادى وبدات اتخن لحد لما وصلت ومن 4شهور تقريبا ل 100 كيلو وطبعا مرضيش اروح لدكتور بعيد……وبمنتهى الصدفه فتح دكتور جنب البيت ب20 مترتقريبا فقررت اروح والغريبه انو وافق وجيم كمان جنب البيت وبقيت 81 كيلو دلوقتى المشكله انى حسيت من 4اسابيع تقريبا بمشاعر ناحية الدكتوربتاعى رغم انى مكنتش طايقاه اول كم مره روحتلو فيها…….مشكلتى الاولانيه انى حاسه انى عمر ما شاب هيعجب بيا وانا باللبس اللى موحشنى جدا ده ولاعارفه اغير لبسى ولاعارفه اغير دماغى وطريقة تفكيرى المحافظه بس مش متزمته وانتى عارفه ان العرسان المتزمته كترو اوىىىىىىىىىى ولمابفكر اشتغل واشيل فكرة الجواز دى من بالى خالص لانى شكلى مش هيخلينى الاقى المناسب لطريقة تفكيرى بحس بحزن فظيع لانى رومانسيه جداجدا
وبلوم ابويا على كده واحيانا بقول ان انا اللى مش عاجبنى حاجه……ومشكلتى التانيه الاخ اللى حاسه بمشاعر ناحيتو ممكن تكون مش حقيقيه بس لو حقيقيه هو محترم جدا ومحافظ هقابلو بانهى شخصيه شخصيتى الحقيقيه ولا انتهز الفرصه واسايرو وخلاص مع العلم انى لو مش هتجوز صح يبقى بلاش احسن بس بردو خايفه اضطر اوافق فى يوم من الايام عشان فرصى قليله جدا…………..بجد احترت وحاسه انى محتاجه دكتور نفسانى وبابا عارف دماغى وانى صعب اتجوز شيخ قالها لماما قبل كده ورغم كده مش بيعمل حاجه……انا مش قادره اتصرف ولافاهمه حتى انا عايزه ايه رغم انى عارفه كويس جدا انا مش عايزه ايه بس خايفه اكون بوهم نفسى بحاجات مش مناسبه لظروفى بجدمش عارفه اعمل ايه ؟انا عارفه انى رغيت كتييييييييييييييييراوى وتلاقيكى مش طايقانى بس انا قلت هبعتها وخلاص لو رديتى بشكرك جدا ولو لا ادينى فضفضت لحد بس بجد بتمنى تردى عليا ولوعايزه تستفسرى عن حاجه اسالينى وهجاوبك…………..مشمشه 21 سنه
————————
مشمشتى حبيبتى
الحمد لله ان والدك اخيرا وافق انك تروحى لدكتور تخسيس و انك تروحى جيم
و دا معناه انه ابتدى يقلق عليكى و على مستقبلك

انا بقى عايزاكى تنسى شوية موضوع العريس و الجواز دا
عايزاكى تركزى فى الخسسان و فى الرياضة لان طول ما انت حاسة انك وحشة و لا انك تخينة و لا ان فرصك قليلة مش هتلاقى الراجل اللى انت بتدورى عليه

انا عايزاكى تبنى نفسك و شخصيتك بالقراءة فى مجالات متنوعة و النت موجود اهو الكتب و المقالات و المدونات فى كل مكان

و عايزاكى تشتغلى و تاخدى كورسات فى مجال شغلك

اما بقى موضوع مشاعرك ناحية الدكتور
انا لسانى دلدل من كتر الكلام عن النضج العاطفى
انت دلوقتى بنت عندك 21 سنة بمشاعر طالبة اعدادى عندها 12 سنة

انت منجذبة له لان دا الراجل الغريب الوحيد اللى قربتى منه … المهم ان انت دلوقتى لسة صغيرة و الدنيا قدامك مفتوحة .. ابتدى باللى انا قلت لك عليه و كله هيتصلح

Bookmark and Share