انا مليااانه وده هيتعبه ومش هيعرف يركز فى العمليه الجنسيه نفسها

Date posted: November 11, 2009


السلام عليكم ورحمه الله وبركاته

ازيك يا مروه
ان شاء الله بخير

اولا انا مش عارفه ابتدى منين بس انا هقول اللى حوايه زى ما هو
انا مرتبطه بشخص من فتره حوالى 5 شهور
وعلاقتنا كويسه اوى وانا بحبه اوى وهو كمان واتعرفت على ولدته
وهى ست محترمه ومثقفه وحبتنى وانا كمان حبتها يعنى معلملتنا مع بعض
الحمد الله كويسه وكمان مامته كلمت ماما واماما موفقه عليه
بس المشكله انه مش لقى شغل ومستنين لحد ما يلاقى شغل
علشان يتقدم رسمى
المهم
انا وهو تقريبا متفاهمين فى معظم امور الحياه
بس مشكلتى هى انى مليااانه وهو عايزنى اخس
وقالى كذا مره وانا والله بحااااول على قد ما اقدر بس انا مشكلتى
انى لما بحس انى تحت ظغط مش بعرف اعمل اى حاجه
يعنى بدل ما اخس بززززيد
مع ان قبل ما اعرفه كنت خسيت 20 كيلو بس خستهم من غير ما اى حد يقولى حاجه …..!
المشكله الاخيره اللى كانت بينها كانت النهرده
كنا قاعدين فى كافى ولقيته ساكت شويه وسألته مالك
قالى ايه توقعاتك عن علاقتنا الجنسيه بعد الجواز …؟
انا مكنتش فهمه معنى السؤال فاقولت مش عارفه يعنى بس
اعتقد كويسه عادى يعنى
وبعدين سألته طيب انت ايه اريك شيفها ازاى
قالى انه شيفها متعبه …
قولتله ليه
قالى علشان انا مليااانه وده هيتعبه ومش هيعرف يركز فى العمليه الجنسيه نفسها وفى انه يبقى شايل رجلين تقاااال عليه
انا فضلت اسمع الكلام وبحاول ابينله انى متماسكه المهم
قعدنا نتكلم فتره وفى الاخر
انا قولتله ان نبعد لحد ما احاول اخس لان انا كده تحت ضغت ومش عرفه اعمل حاجه بس هو كان رافض الحل ده بس انا اصريت عليه
وبجد فعلا انا تعباااااااانه اوووووى
ومش عارفه اعمل ايه اخد فتره وارجعله تانى بعد ما اكون انتظمت فى الرجيم
واله ابعد عنه خالص وانهى العلاقه واله اعمل ايه بس مش عارفه
المشكله انى شيفه ان اللى يحب حد يحب زى ما هو بكل ما فيه
بعيوبه ومميزاته وشيفه ان التخن ده اكيد مش كويس بس مش مشكله تخلى
علاقتنا الجنسيه متعبه اوى كده ما فى كتير متجوزين وتخان ومبسوطين
بليز سعدينى فى التفكير

ملحوظه:-
هو مش شخص وحش بالعكس هو اكتر راجل شفته فى الدنيا
بيحترم حريت البنت وهو اللى ساعدنى انى اثبت نفسى فى المجال اللى بحبه
وبيشجعنى انى اشتغل يعنى مش سى السيد
بس موقفه ده هو اللى محيرنى
اكمل واله لا

واسفه جداا جدااااا على الاطاله

——————————-
كلامك وجعنى اوى يا مشمشة
بجد

اولا هو مش شخص سئ
ثانيا انت مش معيوبة

نتكلم جد بقى
فى مثل بيقول ان كل فولة و لها كيال
و هو مش الكيال بتاع الفولة بتاعتك

جميل انك تبقى عايزة تخسى علشان نفسيتك و صحتك
لكن مش جميل انك تبقى على طول تحت ضغط نفسى .. لو تختنتى هيسيبك و لا هيخونك و لا هيزهد فيكى

انت واضح ان طبيعة جسمك تميل للامتلاء
و واضح انك كل ما بتخسى بترجعى تانى

و المعروف ان البنت بعد الجواز بتملا شوية
و فى الحمل بتملا كتير
و بعد الولادة بتتعب على ما تفقد الوزن الزيادة بتاع الحمل

لما انت دلوقتى و انت لسه لا اتجوزتى و لا حملتى و لا ولدتى مش عاجباه و شايف ان العلاقة الجنسية بينكم عتبقى حاجة صعبة و عبئ نفسى عليه يبقى انت لسة بتفكرى فى ايه؟

فى ولاد تانية ما يملاش عينهم غير البنت المليانة
و فى ولاد شايفين ان ليلى علوى و الهام شاهين و هياتم رمز للست اللى بجد

انا عارفة انك بتحبيه و عارفة ان القرار صعب
بس هل انت ممكن تستحملى الحياة مع زوج مش شايفك مثيرة او جذابة او بترضى شهواته؟
ممكن تستحملى نقد قد ايه؟
ممكن تستحملى نفور قد ايه؟
ممكن تستحملى غيرة قد ايه؟
ممكن تستحملى عدم امان قد ايه؟

Bookmark and Share