مشمشة خايفة تموت

Date posted: November 10, 2009


 

 

ازيك يا مروة يا رب تكوني بصحة وسعادة وانتي بتقرأي رسالتي
مش عارفة اقولك ايه ولا ابدا ازاي
انا مخنوقة وتعبانة وزهقانة
وملقتس غيرك اقوله مشكلتي
انا على طول مكتئبة وحزينةومهمومة
انا عارفة من ايه
من كتر التفكير
بس التفكير فايه بقى
هي دي مشكلتي
اول حاجة انا هعرفك ظروفي يمكن دي تكون عذري فاللي وصلت ليه
انا عندي 19 سنة
ليا اخ واخت والدتي اتوفت من وانا عمري 12 سنة
ووالدي اتجوز من واحدة طيبة جدا بتعاملنا زي اولادها واكتر
وعشت طول الفترة دي برة مصر وطبعا لما دخلت الكلية جيت انا واخواتي و زوجة والدي مصر بس والدي فضل برة
مش عارفة اقول ايه بس انا فعلا تعبانة
انا لسة طالعة من قصة حب فاشلة وانتهت برفض والدي للشخص بس انا مش معترضة لان كل شيء نصيب
بس انا اللي مدايقني هو انا
بفكر كتير كتير اويييييييييييييييييييييييييييييييييي يا مروة
دايما بفكر بطريقة سلبية
على طول خايفة اموت
مع العلم اني مؤمنة والحمدلله ومحافظة على الصلاة والصوم وقراءة القران قبل مانام بس دايما خايفة
خايفة كمان ان حد انا بحبه يموت
كل يوم لازم اقوم بالليل اطمن على اخواتي انهم بيتنفسو
دايما طول الوقت بالي مشغول لو حد عنده اي مشكلة اعد افكر فيها حتى لو حد معرفوش
طول الوقت صعبان علياكل الناس اخويا
صعبان عليا اختي
وصعبان عليا والدي اللي فبلد تانية ومش شايفاه ادامي ولا مطمنة عليه
طول الوقت الناس شاغلني
دايما شايلة هم اللي حواليا طول الوقت بفكر فيهم وزعلانة عشانهم
واذا بطلت شوية افكر فكدة ..بفكر فاللي ماتو!!!!!!!
يا ترى ايه الللي بيحصلهم
حتى لو فرحت شوية بحاجة بفتكر الفقير اللي مش لاقي الحاجة دي
بزعل ومش بقدر افرح
طول الوقت حاسة اني هموت قبل م الحق اعد مع الناس الي بحبهم واشبع منهم
من كتر تفكيري دة بقيت بحلم اني بموت فعلا
اانا تعبت بجد من كتر التفكير دة
مش عارفة يا مروة اعمل ايه

———————–

 
ايه يا حبيبتى اللى انت عاملاه فى نفسك دا؟
 
كلنا هنموت
بس لحد ما نموت لازم نعيش
و نعيش كويس كمان
لو سالتى اى واحد او واحدة من المسنين عن الأشياء اللى بيندموا عليها هيقولولك ان اغلبها حاجات كان نفسهم يعملوها و ما عملوهاش
كانوا عايزين يسافروا و فضلوا مأجلين السفر لحد ما الصحة راحت
كانوا عايزين يحبوا و فضلوا مأجلين الحب لحد ما بقاش فى حد محتاج حبهم
كانوا عايزين حاجات كتير و ما عملوهاش
ماتوا و هما عايشين
و عاشوا عيشة مش راضيين عنها
 
استمتعى بكل لحظة انتى عايشاها و استمتعى بحب الناس اللى حواليكى و بلاش تضيعى جمال سنك فى الخوف و القلق
كل ما تجيلك الافكار دى افتكرى ان الحى ابقى من الميت و كلنا هنموت .. اهم حاجة احنا عيشنا ازاى
Bookmark and Share