شاب حياته ملخبطة .. من تفوق .. لسقوط .. لانحدار بطئ … لتبلد عاطفى .. لادمان

Date posted: November 3, 2009


 

 

الاستاذة: مروة , إن شاء الله أثناء تسلمك للايميل ده تكوني في أحسن صحة و حال, .. الرسالة طويلة لكن من فضلك خلي بالك اطول و اسمعيلي انا محتاج نصيحتك فعلا.

أولا أقدم نفسي؛ أنا اسمي*******, عمري 19 سنة و 8 شهور و 12 يوم تقريبا (لحظة…. انا طبعا مش باهزر ..حبيت اذكر الحقيقة كاملة خاصة و اني عايز الايميل ده يتمتع بشفافية عالية) . أنا حاليا طالب بكلية ا**** , و أدرس ****** ( التخصص اسمه كده). طالب بالفرقة الاولى!

أنا عاوز أطرح مشكلاتي المعقدة ذات المحاور المتعددة , و اطمح الى الحصول على النصيحة , و التوجيه من حضرتك.

في الحقيقة انا مش عارف ابدأ منين بالضبط لكن !! ممممم…. باختصار في البداية .. أنا اعيش حالة من الضياع ربما و عدم وجود أهداف محددة في الحياة .. يعني مش عارف اعمل ايه في ايه, و الدنيا خربانة الى حد كبير في نواحي كتيرة معايا…أبدأ بالمحور الاول للمشاكل الخاصة بي و هي الدراسة.

المحور الاولالدراســــــــــــــــــــــــــــــه و كوارثها):

دخلت المدرسة و دايما كنت شاطر و متفوق درجاتي أثناء المرحلة الابتدائية غالبا كانت ممتازة … خلصت 2 اعدادي و دخلت 3 و زي مابيقولو شهادة..أخدت دروس في معظم المواد الدراسية و الحمد لله فهمت الدراسات الاجتماعية اخيرا و كانت النتيجة ممتازة و طبعا بدون غش ( عدم الغش كان مبدا عندي في السنوات اللي بيتقال عليها شهادة) دخلت المرحلة الثانوية .. أولى ثانوي.. مش فاهم حاجة في الفيزياء و لا الكيمياء اساتذة رخميييييييين .. لكن بقيت المواد مش بطالة .. مش هخبي عليكي اني كنت دايما بامشي بعد الفسحة من على سور المدرسة طبعا.. و قبل الامتحانات يدوب الواحد يذاكر ليلة الامتحان و الصبح أدخل االامتحان أحله كله او معظمه صح.. النتيجة النهائية كانت أقل بالتاكيد من السنوات السابقة لكنها كانت شغالة يعني حوالى 87 % نو بروبليم. مع ملاحظة إن عدم الغش في الامتحانات كمبدأ أساسي حطيته لنفسي بعد انتهاء الترم الاول من اولى ثانوي و الحمد لله التزمت بيه للان.

أخذن دروس خصوصية في كل المواد .. الواجبات المطلوبة باعملها .. لو في امتحان في أي درس بأذاكرله قبلها بساعتين مثلا … و النتيجة النهائية في امتحانات الدروس الدرجة النهائية او قريب منها بالتأكيد.. يعني مكنتش بأقلق حتى من عدم المذاكرة .. طالما فهمت يبقى كل شيء أوككككك.

قضيت 2 ثانوي 3 ايام مدرسة في الترم الاول و بعدين زيرو ايام في الترم التاني و دروس خصوصية و مذاكر عند الامتحانات و خلاص.. امتحانات اخر السنة قربت و جت الامتحانات و دخلت الامتحانات و خلصتها و اخذت اجازة و ظهرت النتيجة 98.5 % .. شيء جميل جدا .. الكل طبعا كان فرحان .. .

عديت السنة كما عدت سنوات قبلها.. و جاءت الامتحانات و خلصت و ظهرت النتيجة و المجموع % 99 في سنة 3 و 1.25% مستوى رفيع .. يعني المجموع الكلي للثانوية 100% .. أحب الارقام الصحيحة. … ترتيبي مكانش عالي قوي لكنى كنت الاول على المدرسة و تقريبا الرابع على المحافظة و 135 على الجمهورية. ..

قدمت الرغبات على النت علشان التنسيق ..  كتبت الرغبة الاولى **** و اتقبلت .. دي فايدة التفوق… وااااااو..

رحت الجامعة. . و دخلت الكلية .. و بداية الكواراث الدراسية بدأ تتوالى.. مبذاكرش.. أنام كتير.. أقعد على الموبايل شاتينج كتيير… بأقضي وقتي هنا وهناك مع الاصحاب.. لكن مفيش مذاكرة.. بس كنت ملتزم بحضور جميع المحاضرات.. مع ذكر حقيقة أني كنت أنام في محاضرتي الفيزياء أمام الدكتور مباشرة.. في المقاعد الامامية.. لكن الدكاترة كانوا محترمين جدا و متفهمين الظروف.. امتحانات نصف الترم جاءت و دخلت .. نتيجة سيءة جدا.. عرفته في البيت طبعا لاني مبحبش اخبي عليهم الحاجات دي لانها بتتعرف عاجلا او آجلا… و قلت طبعا هعوض في امتحان الترم… عديت الايام و طبعا انا زي مانا .. و جت الامتحانات و يدوب مذاكرة يومين قبل الامتحان.. و دخلت الامتحانات و النتيجة كانت تقترب من جيد.. زعلوا شوية في البيت كانوا متوقعين ان 100% ثانوي عام و داخل الكلية دى بمزاجه لازم يجيب امتياز ..قلتلهم شوية كلام حلو .. و عن التعويض في الترم التاني… طبعا جاء الترم التاني .. و نظرا للنتيجة المتواضعة دي و علمي بمستواي اللي بينحدر للأسفل أقنعت نفسي أو كذبت على نفسي مش عارف بالضبط .. أني هدخل قسم **** لانو الحلم القديم.. و الترم التاني. مثله مثل الترم الاولاني مع اختلاف بسيط.. اني مبقيتش احضر المحاضرات اللي مبفهمهاش بدل مانام فيها….. و جت امتحانات نصف الترم .. تقريبا منجحتش في ولا مادة… سكت طويلا .. و مكلمتهمش في البيت.. أختي بس اللي كنت بكلمها لاني متعود عليها شوية..يعني سننا قريب من بعض و متصاحبين شوية.. و جاء امتحان نهاية العام .. دخلت.. حليت اللي عرفته و محليتش اللي معرفتوش..كنت متوقع نتيجة مثل راسب,, شايل كام مادة كده يعني… لكن النتيجة ظهرت مقبول بدون مواد 59.4% , فرحوا في البيت اني نجحت بعد احساسهم اني شكلي مش ناجح.. أكيد كرموني في الامتحانات أنا عارف أنا محليتش حاجة.. الحمد لله على كل حال..

خلصت الاجازة مع وعود بالتغيير .. و العودة للزمن القديم… زمن التفوق!!

دخلت القسم .. بأحضر في الاول المحاضرات .. شوية شوية تتضح الاهتامامت الاخرى.. أبحث في تلعم اللغات.. أخدت كورس في اللغة الاردية و مش كملته.. بدأت شوية تعلم ذاتي في اللغة الفارسية و مش كملت.. جمعت شوية دروس في البرمجة و التصميم و متعلمتش منها حاجة .. الخلاصة… معملتش حاجة في اي حاجة… بس سهر.. اهمال متزايد في الدراسة.. غياب عن المحاضرات.. جاءت امتحانات نص الترم و منجحتش في حاجة.. و بعدين امتاحانت الترم و نجحت في 4 مواد و شيلت مادتين… جاء الترم التاني.. طبعا لازم الحلقة تكتمل.. اهمال و لا مبالاة فظييييييييعة.. مبذاكرش .. أسهر أقرأ رويات .. قصص . أتفرج على أفلام.. أقضي وقت عند الاصحاب…..الخ , و طبعا جاء امتحانات الترم التاني و نجحت في مادة و احدة و شيلت 6 مواد. مبذاكرش.. أذاكر ليه؟ علشان انجح.. و فيها ايه لو مش نجحت… !!!!

ظهرت النتيجة طبعا و عرفتهم في البيت.. .. ردود فعل بالتأكيد مش مرحبة… تغيير في المعاملة.. تقطيم كل شوية… يا شماتتة الناس فينا (دي ماما) , انت بتنتحر ببطء (ده بابا و بيتهيألي عنده حق) .. …..

بابا و ماما ساعات يقولوا لو شايف نفسك مش أد الكلية دي و مش سالك فيها .. روح حاجة تانية ان شاء الله تجارة حتى بس تفلح فيها.. طبعا لما كلمت ماما عن التحويل لحاسبات تقريبا قالتلي مجنون .. أنت مش داخل القسم ده بمزاجك .. ياما قلتلك ادخل طب .. و انت اللي مصمم!

ماما قالت لبابا بعد ماالنتيجة ظهرت اني عايز احول .. طبعا كنت قلتلها اني لغيت الفكرة من دماغي.. لكنها قالتله.. رد فعله كان كما هو متوقع.. الفاشل فاشل في أي مكان.. و الناجح ناجح.. و شوية تقطيم مستمر للآن ..

تنتحر ببطْء……….. انت ميت….. فشل…. معندكش هدف … لا هوية… فكر عبيد لازم تمشي بالضرب على دماغك ..دي غلطتى اني عاملتكم كالاحرار و سايب كل واحد براحته… تاعبني…. مش عارف انام بسببك… شاغلني دايما…

طبعا هو عنده حق في كتيير من اللي بيقولوا.. و ان كنت أختلف معاه في بعض النقاط.. انا مش راضي عن نفسي بتاتا … بس انا مش عارف اعمل ايه في ايه … تايه شوية.. ضايع شوية..

الدراسة بدأت .. و بقالي أقل قليلا من شهر .. في سنة أولى (اعادة) .. و يبدو ان السيناريو يتكرر…

لمزيد من التوضيح: كان حلمي يوما أن أكون مليارديرا مثل بيل جيتس.. علشان كده أنا حابب مجالات ادارة الاعمال , و تكنولوجيا المعلومات , و اللغات.

أيضا أنا مهتم باللغات جدا… لغات البرمجة (كمبيوتر ) و لغات البشر.. أفكر في الابتعاد حاليا عن مجالات الهندسة , و ما يتعلق بها .. أدرس لغات مثلا في كلية الالسن.

لكن .. أنا مش واثق .. مش عارف .. أضمن نفسي … اني مش هدخل كلية ألسن و يتكرر السيناريو!! .. نفسي أحس اني باعمل حاجة مفيدة… قادر أنجز في شيء معين.. لاني كده فعلا بأموت…..

المحور الثاني : ( الجنس و سنينه)

المعروف عني بين الزملاء و الاهل و …… أني مثال .. و على خلق . و متفوق (قبل السقوط المدوي بالطبع) , انا من أسرة "ملتزمة" والدي من (الاخوان المسلمين , حقيقة لا احب الاخوان المسلمين لاسبابا اعرف بعضها و لا اعرف البعض الاخر لكن طبعا باحب بابا, كتير من الناس بيعتبروا اني من الاخوان لكن حقيقي باستمتع باستفزاز الاخوان و باقولها صراحة انا مش من الاخوان ), و ظاهري كذلك .. لكن طبعا محدش يعرف ايه اللي في النفس و الا كانوا ضربوني النار و بالجزم زي اللي حصل مع بوش..

حدوتي مع الجنس تتلخص في موضوعين بالتحيد : الاستمناء و المواقع الاباحية.

اسئلتي كتير.. و ماما مبتردش عليا.. اسأل بابا .. سألت بابا ازاي الاطفال بييجوا..؟؟ انا عارف الطيور بتعمل ايه.. احنا بقى ايه؟ … قاللي بما يناسب مستواي .. و عرفت ان في التقاء بين الاعضاء لدى الذكر و الانثى و هو ما قاله احد الزملاء من الجيران , و استغربته و استبشعته!! .. و عرفت ان في مني و بويضات بتكون الجنين!

زي ما الناس بيعرفوا عني .. و بياكدولي دايما إني ذكي .. ربما.لكن للأسف في كارثة شخصية.. و ربما كان غباء شديد مش ذكاء بالمرة و هذا ما يبدو…. أنا أحد مكتشفي الاستمناء… عرفت الاستمناء و انا لم ابلغ بعد .. بالصدفة.. إكتشاف! … محدش قاللي ان فيه حاجة اسمها كدة بتتعمل كده.. اللي حصل.. عرفت الاستمناء و انا عندي 12 سنة ! .. بتفكير طفل بالتأكيد… مكلمتش حد .. و محدش يعرف ابدا اني مارست الاستمناء ابدا.. انا مش من الناس اللي تحب تجاهر بالمعاصي… عرفت الاستمناء… و كللعبة الجديدة مارستها كتيرا عن حهل حتى باسم ما افعله… بعد فترة ما من الوقت.. لاني استطيع التفكير.. فتحت أحد كتب فقه السنة . و بحثت فيه عن اشياء مثل الزنا .. و وجدت شيء اسمه العادة السرية او الاستمناء… طبعا مكنتش محتاج ذكاء خارق علشان اعرف ان اللي باعمله اسمه كده.. بعد فترة طويلة او قصيرة… بابا بدا يكلمني اكتر عن شوية حاجات .. و ذكر الاستمناء و قاللي هتلاقي زملاء في المدرسة بيعملوا حاجات زي كده متسمعش كلامهم . , و احكي لي… طبعا وشي احمر … اكيد هو فاكر اني مكسوف و بريء.. لكن ميعرفش اني عملتها من غير لا زميل و لا يحزنون… .. حاولت ان اتوقف عنها لكن لم اتوقف … أدى ذلك لتأثيرات سلبية على الصحة أهمها رعشة دائمة في الاطراف .. و انخفاض في الوزن … بالاضافة الى ضعف في التركيز و الذاكرة.. توقف عنها لاكتر من سنة من يناير 2007 ل مارس 2008 ,, و هزمتني نفسي فعدت اليها حتى الان..

اما المواقع الاباحية …. فكان من المستحيل ان اتصفحها … ربما بعض الفضول أو ؟؟؟؟ … اول مرات دخول على المواقع الاباحية و انا في الصف الثاني الثانوي .. بعد فترة طويلة من معرفة الاستمناء … و انا لست مدمنا لهذه المواقع .. لكن كثيرا ما تخذلني نفسي خاصة اذا كنت وحدي امام الكمبيوتر!!

نظرا لما سبق.. اعتقد ان طفل مارس الاستمناء باسراف لمدة طويلة كهذه و قبل ان يبلغ فعليا … في ورطة الان ! اتعقد اني مصاب بالعقم , و العجز,,, يعني مانفعش للجواز… لا ادري مدى صحة هذه الافكار … لكن انا الغي فكرة الزواج تدريجيا من اهتمامي … ……….. …..

 

المحور الثالث : ( قلبي قاسي !)

حاسس اني مش طبيعي زي البني آدمين فيما حولي… أعاني من لامبالاة فظيعة جدا… و برود برود ….. انفعل فقط مع الاشياء التافهة ( حد فتح الكمبيوتر من غير اذن …….الخ).., حاسس ان قلبي حجر… لما حد قريبي بيمموت .. بيكون قريب جدا . ولا حتى دمعة بتنزل! و مش متأكد اني بأكون زعلان و لا لأ.. مثلا اتخيل ان ماما أو بابا أو حد من اخواتي مات.. مش عارف الاقي رد فعل حتى في التخيل…

بيبقى نفسي جدا اعرف اعيط… أزاي أحس زي البني آدمين؟؟ .. اللي حب بنت معينة حبها ازاي .. انا مش عارف.. كل البنات بنات … ايه اللي يخليني اقول انا بحب دي او دي.. ازاي بيحصل ده… ؟؟؟

محاور أخرى ( مما سبق ربما يتضح لحضرتك محاور اخرى تفيديني بالنصح حولها)

سؤال أخير.. أنا عندي كام مرايا؟؟ و أنواعهم ايه؟

أرجو من حضرتك الرد… انا منتظر .. لو سمحت لا تتجاهلي الرسالة . أعتمد على نصيحتك في محاوري المعقدة و المزدحمة اكتر من محور 26 يوليو!!

———————-

 
انا هقولك رائى بس ما تزعلش منى
 
انت مغرور
واقع فى غرام عقلك و ذكائك و قدراتك الخارقة .. ايوة … بالمقارنة بزملائك انت قدراتك خارقة .. اللى هما بيعملوه فى شهور انت بتعمله فى كام ساعة .. اللى هم اكتشفوه النهاردة انت كنت عارفه من سنين … قراءاتك … مهاراتك اللغوية … عائلتك المستقرة (ايوة .. بالمقارنة بالبيوت المصرية انتم بيتكم زى الفل) كل الحاجات دى خلتك زى الفرس الجامح .. اله نفسك بطريقة او باخرى .. يعنى لولا مرجعيتك الدينية كنت عبدت عقلك
 
و من هنا تضائل الناس من حولك .. لا حد يستاهل الحب و لا حد يستاهل البكاء و لا حد يستاهل اى حاجة … عزلت نفسك عاطفيا عن الناس
 
غرورك وصل لمرحلة انك عامل زى اللى بيسابق نفسه على الطريق السريع و بيشوف مين هيكسب
 
انت اهملت دراستك و عمال بتسقط (و انت عندك كل مقومات النجاح) علشان تثبت لنفسك انك حتى لما تدمر نفسك برده مش هتتدمر
 
انت عارف نقط قوتك .. تفكيرك فى كلية الالسن مثلا دليل انك عارف مهاراتك اللغوية .. بس لو انت هتروح بنفس الروح دى يبقى النتيجة واحدة
 
تصالح مع عقلك و مع مرايتك
 
اما موضوع الخلفة و العقم و الكلام دا
ممكن تدخل هنا
Bookmark and Share