تحية لهذه الفتاه على شجاعتها .. رأيكم ايه فى اللى حصل دا؟

Date posted: September 5, 2009


 
 
 
انا كنت بحب واحد زميلى اوىىىى احنا الاتنين كنا فى كلية هندسة واعدنا 3 سنين مرتبطين بس كنت بجد بموت فيه ودلوقتى احنا مخطوبين بقالنا سنتين يعنى بقالنا مع بعض 5 سنين وفاضلنا اقل من سنة ونتجوز المشكلة اللى مخليانى دايما مدايقة ومش طايقة نفسى انى مبقتش احبه زى زمان خالص يعنى لو زمان كنت بحبه 100% دلوقتى بقوا 50% حاسة انىزهقت شوية ومليت من طول الفترة مع ان هو بيموت فى التراب اللى بمشى عليه وعلطول مهتم بيا وبيعمل كل حاجة عشان يرضينى وهو امور وكل حاجة فيه بصراحة كويسة بس انا اتغيرت بجد وخصوصا بعد ما اشتغلت واختلطت بولاد كتير وكان فى ناس منهم بيحبونى وكان فى واحد منهم غنى جدا جدا جدا وبيحبنى اوىى وبعتلى ناس قالولى صراحة انى لو بعدت عن خطيبى هو هيتجوزنى تانى يوم بس طبعا انا مش ببص للفلوس ومبحبش ابقى خاينة بس بحب احس ان كل اللى حواليا معجبين بيا وبيمدحوا فيا ,بحب احس بالاعجاب من زمايلى وبدات انجذب لناس معايا ف الشغل حتى لو كانوا عاديين بس بحس انى عايزة اغير حياتى وكمان انا حاولت ابعد عن خطيبى بس مقدرتش لانى متاكده انى هندم لو بعدت عنه وعمرى ما هلاقى حد يحبنى زيه ولان عمرى كله كان معاه ,وكمان هقولك على حاجة عمرى ما قولتها لحد اننا بصراحة عملنا مع بعض حاجات كتيرة غلط ومش عارفين نبطلها لما بنعمل الحاجات دى بحس انى بحبه اوىى ولو معملناش كده بحس انه عادى بالنسبالى ,ساعات بحس انى بحبه ومقدرش استغنى عنه وساعات اكتر مش بحس ناحيته بحاجة ,مش عارفه ليه حبى ليه قل اوى كده واعمل ايه عشان ارجع احبه زى زمان واحس معاه باحاسيس حلوة ؟؟؟ بجد محتاجالك اوى يا مروة ومليش حد اتكلم معاه
 
—————————
 
اهلا يا مشمشة

 

اولا انا عايزة احييكى على شجاعتك و صراحتك مع ذاتك … فى ناس كتير بتتحط فى نفس موقفك دا و بتمثل ان كل حاجة تمام و بعدين يرجعوا يندموا

اولا اللى حصل لك دا طبيعى .. شخصية الولد و البنت بتتغير بعد التخرج و الشغل و الاحتكاك … خطيبك كان انسب واحد فى فترة الجامعة لكن بعد الجامعة انت اتغيرتى و عينيكى فتحت على صفات تانية فى شخصيتك … مش كل البنات بيحصل لهم كدة لكن فى ناس بتكون جواهم صفات و احتياجات كامنة و بتظهر مع الوقت و الاحتكاك

دا كدة تفسيرى للى حصل لك

ثانيا بقى موضوع الولد الغنى اللى هيتجوزك بكرة لو سيبتى خطيبك … داين تدان و انت بكدة هتبقى ظلمتى نفسك قبل خطيبك … راجل مين دا اللى تسمحى له يتعامل معاكى كانك عربية ساكند هاند فى بيعة مشبوهة؟ و راجل مين دا اللى يسمح لنفسه انه يغوى واحدة مخطوبة؟ و محترمة مين اللى تدى له فرصة؟ و ثقة ايه اللى ممكن تكون بين اتنين اتعرفوا كدة؟

دا كدة موضوع الولد الغنى

ثالثا احتياجك لاعجاب الناس و انك تكونى مرغوبة .. الاحساس دا جزء من اى انثى لكن كل واحدة بتحط له الحدود اللى تريحها .. فى واحدة بتستكفى باعجاب اهلها … و فى واحدة بتستكفى باعجاب جوزها … و فى واحدة بتحب تشوف الاعجاب فى عينين الزملاء .. و فى واحدة بتشجع الزملاء على الكلام و التصريح بالاعجاب … و فى واحدة بتدمن الاعجاب و رجالة الدنيا مش مكفينها … انت مين و حدودك ايه؟ دا شئ يرجع لك

رابعا ازاى ترجعى المشاعر الحلوة بينك و بين خطيبك؟ كل مرحلة و ليها مشاعرها … انتم بقالكم مع بعض 5 سنين و علاقتكم ببعض قريبة عاطفيا و جسديا … انتم اتعودتوا على بعض و شعلة الحب اللى فى الاول عدت و دلوقتى مش من المنطق انك تدورى على نفس المشاعر دى فى علاقتكم … الحب بيطلع و بينزل علشان كدة مش كفاية لاستمرار الزواج .. اللى بيخلى الناس تستحمل بعض و تكمل مع بعض هو الاحتياج … لو عايزة تصلحى مع خطيبك انت محتاجة تنمى و تغذى الحاجات اللى انت ما تستغنيش عنه فيها .. الحاجات اللى انت محتاجة له فيها … محتاجة احلام مشتركة و تواصل على المستوى العقلى مش بس العاطفى و لا الجسدى
الحلقة دى فيها تفاصيل اكتر
http://www.marwarakha.com/index.php?categoryid=30&p2_articleid=257

Bookmark and Share