مزاجى نكد و الم و شجن

Date posted: September 25, 2009


 

 

ازيك يا مروه عامله ايه ,انتى مش عارفه انا محتاجه رأيك قد ايه
بصى بقى انا عندى 21 سنه بحب و ولد بقالى اكتر من 5 سنين كنا اصحاب فى ثانوى و اول ما شفته اول مره حبيته و لما بدأنا نتكلم حسيت منه بحاجه وبعدين بقى يكلمنى كل يوم كتير و خصوصا الفجر وكنا بنرغى فى كل حاجه و فضلنا كده فتره و فعلا قربنا من بعض لحد لما حصلت مشكله والمشكله كانت ان انا اديت رقمى لواحد صاحبه بس انا والله مكنش قصدى غير انى اتقرب منه و ادخل فى الجروب بتاعه المهم اول ما روحت لقيته بيكلمنى وبيقولى انتى اديتى رقمك لمحمود قولتله اه قالى طيب امسحى رقمى و متكلمنيش تانى فانا قولتلو ماشى وقفلنا مع بعض و قعدنا منكلمش بعض فتره كبيره وبعد كده بقينا ممكن نتكلم كل سنه مره طول 5 سنين وانا بحبه وعلى فكره ديه كانت اول مره احب او حتى اعجب بحد وفضلت احبه وهو ميعرفش وكان اى حد يقولى ارتباط اقوله انا مرتبطه

المهم بعد كل السنين ديه لقيته بيكلمنى وبيسألنى عملتى ايه فى الامتحانات وده كان فى شهر 1_2009 و كمان لقيته جالى عند الجامعه مفاجأه تخيلى بعد 5 سنين و ابتدينا نتكلم تانى بس قليل خالص و بعد كده فى عيد الحب جبتله ورد و بعتهوله على البيت و مكتبتش من مين لقيته بيكلمنى وبيقولي ميرسى موت على الورد و انا معايا حاجه ليكى المهم بعدها بقينا بنتكلم برده عادى و مفيش حاجه ما بنا و انا كنت بكلمه على طول وبعدين هو لما كان يزعل كان يفضل زعلان كتير و يقولي الزعل على قد الغلاوه انا الحد الغالى عندى بزعل منه جامد و مشكلتى ان انا فعلا بضعف قدامه و بعد كده فى شهر 7_2009 كان فى مشاكل مع اصحابى و كنا قعدين بنتعاتب و بقلهم انتوا ليه مش بتحبوا احمد قالولى لو كنا مش بنحبوا مكناش روحنا و قبلناه و صلحنا مشكله خمس سنين وبعدها لما اتكلمنا كنت عماله اقوله انت كنت بتعمل ايه فى 7 شهور دول انت كنت عايز منى ايه كان كل رده عليا انا مردتش اقولك عشان متزعليش من اصحابك وقعد يقولى اللى انت عايزه ايه و انا اعملوا وبعدين قاللى لما تهدى انا هكلمك و لقيتوا بعتلى رساله و بيقولى انا مش هكلمك تانى عشان متقوليش ان انا بكللمك عشان صحابك قالولي اكلمك وهو كان مقتنع ان انا فضلت اصحابى عليه و بعدها انا كلمتوا و قلتلوا اللى ما بنا مينفعش كان يخلص في رساله فانا اتصلت عشان انهي الموضوع بطريقه الكبار

وقاللى الموضوع مينفعش فى التليفون لازم اشوفك فاتا وافقت و اتفئنا على الميعاد واعتزر وتانى يوم قالي معلش انا هتاخر شويه لحد ما لغينا ولحد دلؤتى مائعدناش القعده ديه بس انا محتاجلها موووووووووووت عايزه اخرج اللى جوايا طول الفتره ديه سواء قمنا حبايب او اصحاب او ولا حاجه بس لازم اتكلم وانا مش عارفه اعمل ايه و كل حد حواليا برأى ارجوكى انصحينى انا محتاجه رأيك قووووووووووووى انا عايشه فى نار و لحد دلؤتى مش عارفه حتى ازعل منو ومش عارفه اخرتها لحد فين
معلش عشان طولت عليكى
وشكرا جدا ليكى

———————————————–

اهلا يا مشمشة … بصى بقى … انا زعلانة منك و عليكى اخر حاجة

انت عندك قدرة عجيبة على الوفاء للنكد … ايوة انت متمسكة بالنكد و الماضى و
الاشباح

ليه مش بتقلبى الصفحة اللى اسودت و اتهببت و اتشخبطت و اتقطعت دى؟

قصة حب حصلت ايام المراهقة و خلصت ..ليه نضيع على حسها سنين الجامعة و مستعدة
تضيعى علشانها سنين تانية من عمرك؟

مين قال ان اول حب مش هييجى غيره؟ و مين قال ان اللى غلط غلطة لازم يدفع ثمنها
بقية عمره؟ و مين قال ان موضوع مات و شبع موت يفضل حى جواكى و بيتغذى على
سعادتك و مستقبلك؟

انت مش حاسة ان الولد دا بيبالغ شوية فى ردود فعله؟ هو الناس اللى بيحبوا بعض
الحب دا كله بيبيعوا بالسهل كدة؟ لو كل اتنين متجوزين اتصرفوا زيه كدة كانت
البلد كلها اتطلقوا …. انا مش هقول لك تعملى ايه .. انا هسيبك تفكرى فى كلامى

Bookmark and Share