fbpx
مونتيسوري مصر- تقدمها مروة رخا

انا نفضت ايدى من المسؤوليه

 

 

ازيك يا مروه ؟؟ يا رب تكونى بخيررررر … انا قريت من يومين كده مقاله ليكي تحففففففففففففففففه بجد عن امتى العلاقه تبقى وحشه و لما قريت ال 50 نقطه حسيت ان انا اللى كتباهم بجد .. تقريبا 45 حاجه من الحجات دى انا حساها .. انا و هو مخطوبين من حوالى 5 شهور و قبلها كنا مرتبطين سنه .. و كنا كويسين و كان اغلب كلامنا تقريبا عالنت و كده يا اما بنخرج و يمكن الصيف اللى فات ده كنا دايما بنخرج و تقريبا كل يوم و كان كويس اوى معايا .. اوك كنا بنتخانق بس كنت حاسه دايما جوايا اننا هنبقى لبعض و دايما كنت حاسه ان هو ده جوزى و هو ده اول و اخر واحد فى حياتى .. بس بعد ما تخطبنا و هو اشتغل و حس بالمسئوليه اللى عليه بعدنا واحده واحده .. المشكله يا مروه انى حاسه انى مظلومه معاه بجد .. اولا انا مش بعرف عنه حاجه , ياعنى لو خرج يا اما بعرف من اخته بالصدفه يا اما من صاحبتى عشان تعرف صاحبه و اما اساله مثلا عملت ايه امبارح و كده مايرضاش يحكى و يقولى عادى بقى خرجت .. لما اساله عامل ايه فى شغله يقولى والله مابحبش اتكلم فى الشغل .. لما حتى احب اعمله مفاجاه فى عيد ميلاده و اجهزله خروجه لينا يقولى انتى عارفه اننا مش هينفع نخرج عشان باباكى و مامتك معان ماما مقلتش لا و بابا مسافر , انا مش بقول انى هعمل حاجه من ورا بابا بس لو عرف اكيد مش هيضايق عشان بابا اصلا مش من الرجاله اللى تخنق .. و افهمه كده يطلعلى مليون حاجه يا مروه .. معاننا مخطوبين و المفروض انى احس بيه و احس انى مخطوبه .. خناقتنا كترت و للاسف انا مبقدرش اكتم انى مخنوقه .. ده غير انه مش حابب انى اشتغل معانى الحمد لله اتخرجت السنه دى من السن و تقديري كويس .. و لما انا وافقت انى ماشتغلش لما نتجوز بدأ يفهمنى انى كمان دلوقتى ماشتغلش .. و حتى الكورسات مكنش موافق عليها بحجه ان المكان اللى ساكنين فيه ضلمه و مش امان و هو خايف عليه .. حتى لبسي يا مروه عايز يغيره .. بقيت حاسه ان ماليش لازمه فى الحياه .. كل ما ابص لنفسي فى المرايه احس انى عجزت مليون سنه و احس انى بقيت بنى ادمه كئيبه مابتعملش حاجه غير اكل و نوم و تفكير فيه و فحياتى اللى مابقاش ليها معنى .. حاسه ان حياتى واقفه عليه هو و بس و هو مش موجود فيها .. كل ما اتصل بيه احس انه مش هيرد لانه غالبا مش بيرد .. حتى من يومين قالى ان عنده مشكله فى الشغل و انا حتى مبقتش قادره اتصل اطمن عمل ايه فى المشكله .. عارفه لما تحسي ان حتى الكلام مابقاش طالع منك .. لما تحسي انك خايفه منه انه يكسفك و يقولك كلمه تدايقك كالعاده .. لما تحسي ان كل ما تقوليله على حاجه مضايقكى يعد يتناقش معايا شويه و مابطلعش ب اى حاجه فى الاخر .. حتى رمضان و مابيتكلمش و هو صايم بحجه انه عايز يصووم صح و بتاع معأننا ياريتنا مثلا مقضينها كلام حب .. ده احنا بنتعامل اقل من الاصحاب … ممكن نعد مثلا بالاسبوعين تلاته مانتكلمش لوحدنا .. و السبب انه مش عايز يخرج و لما بيجلنا البيت هنا ماما و اخوتى قاعدين طبعا و مابنعرفش نتكلم و بيكره التليفون و مابقاش يعد عالنت .. يمكن الحاجه اللى هقولك عليها دى تافهه شويه بس طول ماحنا بنتفرج عالتليفزيون يغازل فى لممثلات .. وانا ولا حتى بسمع كلمه حلوه منه غير كل فين و فين و كل ما اكون زعلانه فبيصالحنى ياعنى .. حتى الهدايا يا مروه .. اخر هديه من 4 شهور .. انا كمان جوايا حاجه بتقولى انه كفايه كده و خلاص انهى الموضوع بقى بس برجع تانى اخافففففففف … بخاف هبقى عامله ازاى لو سيبنا بعض .. بخاف اتدمر من غيره .. هو اول واحد فى حياتى و كان نفسي طول عمرى الاقى حد يحبنى و احبه لانى معظم الوقت كان حد بيحبنى و انا مش حاسه ان هو ده .. لحد ما لاقيته .. خايفه اعيش بقيت حياتى ندمانه عليه …تخيلى يا مروه انا بخاف اكون ظالماه والله ….و سعات بحس انه فعلا بيتعب فى شغله بس برجع وا قول ان فيه يوم اجازه و فيه وقت اكيد يكلمنى فيه .. و حاولت اشغل نفسي باى حاجه بس بجد حاسه ان حياتى بقت هو و بس .. يا اما بفكر فيه هو ليه متصلش يا اما بشتكى منه يا اما بعيط … بقيت حاسه انى لوحدى اوى .. و فنفس لوقت اقول كفايه اننا مخطوبين و هو كده معايا و خلاص … عشان خاطرى يا مروه قوليلى اعمل ايه ؟؟؟

_____________________________

انا مش عارفة اقول لك ايه … مسؤوليه القرار دا كبيرة و انا مش عايزة اشيلها بالنيابة عنك

اختياراتك كالآتى

اولا: يبقى الوضع على ما هو عليه دلوقتى و كمان سنة و كمان خمس سنين و طول عمرك معاه .. لانه مش هيتغير

ثانيا: لو انت فعلا بتحبيه يبقى تتقبليه كما هو و تتقبلى شروطه كما هى … و تتأقلمى و توجدى مصادر متعة تانية فى حياتك … قراءة كتابة نت رياضة فى البيت .. اى حاجة تملا الفراغ لحد ما تخلفى و تتشغلى بالعيال

ثالثا: تقيمى الموقف و تقتنعى ان قعدة الخزانة و لا جوازة الندامة .. نقطة و من اول السطر

تختارى ازاى

لو انت كارهه نفسك و شايفة انك تستاهلى الكآبة دى يبقى الاختيار الاول

لو انت بتحبى نفسك بس تفتقدى الشجاعة انك تسيبيه يبقى بدل ما تضيعى طاقتك فى تغيره .. غيرى نفسك

لو انت بتحبى نفسك و كل يوم تسألى عليا بإيه دا كله و اللى ما ياخدنيش كحلة فى عينه ماخدوش جزمة فى رجلى .. يبقى التالت

من هي مروة رخا؟
مروة رخا: موجهة مونتيسوري معتمدة دولياً من الميلاد حتى 12 عام. Marwa Rakha: Internationally certified Montessori educator from birth to 12 years.

بدأت “مروة رخا” رحلتها مع “نهج وفلسفة المونتيسوري” في نهاية عام 2011 بقراءة كتب “د. ماريا مونتيسوري” عن الطفل والبيئة الغنية التي يحتاجها لينمو ويزدهر. تلت القراءة الحرة دراسة متعمقة للفلسفة والمنهج مع مركز أمريكا الشمالية للمونتيسوري

“North American Montessori Center”