تفتكروا هتنام معاه و لا لأ؟ … أنا بقول أيوة .. و انتم؟

Date posted: August 24, 2009


 

 

مروة ازيك كل سنة وانتي طيبه يا جميله
مروة انا واقعه في مشكله كبيرة اوي وعايزه مساعدتك اوي
انا اسمي مي عندي 22 سنة مروة انا بأحب واحد زميلي في الكلية بنحب بعض بجنون من اول سنة في الكلية مأقدرش يفوت عليا يوم من غير ما نشوف بعض او نسمع صوت بعض هو كمان بيحبني جدا جدا ومتفقين علي الجواز بس بعد ما يتخرج ويشتغل

احنا بنحب بعض اوي ساعات بنتخانق خناقات بسيطه بس بنرجع علي طول

معلش يا مروة هأعطلك شوية المهم دلوقتي انه من فتره طلب مني طلب صعب اوي فاجأني
بصراحه طلب مني أروح معاه شقته وقالي بصراحه انه عايزني
بصراحه عايزنا نعمل زي الازواج بالظبط
انا ماعرفش ازاي طلب ده كده انا سبته ومشيت وقعدنا فتره بعاد كنت فاكره ان خلاص مش هيفتح ده تاني بس بعدها بأه بيكرر طلبه ويلح ويقول ان احنا هنبقي زوج وزوجه و انه كان يقدر يعمل ده مع اي بنت بس هتبقي خيانة واحنا كده كده هنتجوز واحنا بنحب بعض
بصراحه يا مروة انا بأحبه اوي اوي في الاول كنت رافضه تماما بس مع الوقت بدأت افكر انا منجذبه له اوي هو كمان بيحبني جدا وانا واثقه فيه اكتر من روحي
انا سألت انتيمتي ونصحتني اوافق
انا محتاره جدا بس بصراحه نفسي انفذله طلبه وانا كمان نفسي اروح معاه
بليز يا ميرو ردي عليا بسرعه انا اشتركت علي الفيس بس علشان أكلمك
باي منتظره ردك باي

________________________________________

 

شوفى يا مشمشة

انا لا هقول لك صح و غلط و حلال و حرام و لا الكلام دا كله

انا هسألك سؤالين

الاول … لو عملتى كدة معاه و سابك لأى سبب من الأسباب .. هل هتقدرى تعيشى عادى و الدنيا تمام؟
الثانى … لو عملتى كدة و الناس عرفت لأى سبب من الأسباب .. هل هتقدرى ترفعى راسك و اللى مش عاجبه يتقلق؟

لو الاجابات أيوة يبقى اعملى اللى انت عايزاه
لو الاجابات لأ يبقى بلاش تعملى حاجة ترجعى تندمى عليها

ماحدش ضامن الظروف و ما حدش عارف مين هيبقى من نصيب مين

لو انت هتعملى كدة علشان هيبقى جوزك يبقى ما تعمليش كدة الا لما يبقى جوزك

________________________________________________

 

طيب يا مروة لو فرضنا انه عمره ما هيسبني
ولا حد هيعرف أبدا

انا عارفه ان ده فرض مش سهل
لكن لو حصل كده يبقي ايه رأيك

______________________________________________

 

يا بنتى هو هينام معايا و لا معاكى … انت اللى هتواجهى اهلك و المجتمع و عقدة الذنب و الخوف من انه يسيبك

اعملى اللى انت عايزاه بس اتحملى نتيجة تصرفك

و بعدين انت ضامنه منين اى حاجة .. مش يمكن يموت و لا يسافر و لا اهله يرفضوكى … مين ضامن اى حاجة؟

اخر كلام عندى … اللى بيشيل قربة مخرومة بتخر على دماغه .. انا لا هقول لك نامى معاه و لا ما تناميش معاه لكن اللى هقولهولك اللى تخافى تعمليه قدام الناس ما تعمليهوش فى الخفا

Bookmark and Share