انا باعتذر مقدما عن الكلام القلة الأدب الجاى فى السكة

Date posted: August 24, 2009


 

 

هاي مروه

انا من اشد المعجبين بفكرك
انتي فعلا خبيره في مجالك و ده بنشوفه قليل اوي في مصر

مش هطول عليكي .. انا في العشرينات و كل وقتي في الشغل و مخطوبه جديد من كام شهر.
مشكلتي ان خطيبي بيقولي اني مش "بتدلع" !!!!! و بيقول ان ده في طبيعه اي بنت و انه المفروض ميلفتش نظري من الأساس لكده.

انا مش البنت الرقيقه بصراحه بس في نفس الوقت بكلمه كلام حلو و ببعتله مسيجات حلوه و بحسسه باهتمامي و بأني فخوره بيه. بس هو مش قادر ينسي النقطه دي مهما عملت.

عارفه انك ممكن مثلا تقوليلي اني أساله مباشره " انت عاوزني اتدلع ازاي؟" .. حصل و سألته بطريقه كويسه .. قعد يقولي كلام مش فاهماه .. زي مثلا انه الدلع يكون في طريقه كلامي .. في حركاتي …و اني أستفزه … تقريبا يقصد "أتمايص" ….اتبسطت اوي انه ناضج و بيقول اللي بيعوزه مني بصراحه و بيتكلم … لكن انا بصرااااااااحه مش بعرف أتمايص خالص.. يعني لو بتدلع يبقا شويه

و بعدين انا شايفه انه لسه بدري علي الدلع و المياصه… بصراحه بتكسف و بتلبخ … و شايفه انه لو بقا جوزي هعرف اسعده اكتر لانه ساعتها هلغي الحواجز اللي في دماغي و طباعي و اللي انا محبش اتجاوزها و اللي ممكن تكون فعلا مأثره دلوقت.

من يومين قريت مقال لواحده بتقول ممنوع بعض التلامسات الجسديه بين الخطيبين و عجبني قوي جمله كتبتها و قالت " انا مش هسمح لحد بأنه ينتهك عفتي العقليه و النفسيه" بصراحه انا كمان برغم حبي ليه الا اني عاوزه اعمل اللي يعجبني في الوقت اللي يعجبني لانه مبقاش جوزي و مبقتش لسه ملكه …

انا قلقانه موووووت و خايفه اخسره قدام واحده تانيه … و الموضوع ده بقي ماثر عليا لدرجه اني ساعات اعمل حاجه حلوه ابقي خايفه اسأله عجبته و لا لا لاحسن يقول لا و اني برده مش بعمل اللي في دماغه…

بتمني طبعا من كل قلبي انك تردي عليا او تنشري مشكلتي علي الموقع .. و عندي أمل انك هتعملي كده … انا عارفه ان ردك هيعجبني و خصوصا اني قعدت اسأل شويه من اصحابي مكنوش بيريحوني . يا ريت تعرفيني هتردي عليا فين . ميرسي مقدما

اللي محتاجه مساعدتك
ميم

_______________________________________

 

اهلا يا جميلة

انا باعتذر مقدما عن الكلام القلة الأدب الجاى فى السكة

الرجالة اللى من نوع خطيبك دول بيفكرونى بالكلاب …. هو عايز اى نتاية و لا بيحبك انت لشخصك و عقلك و مشاعرك؟
هو انت انسانة و لا فيلم قبيح هيدفع تمنه مرة واحدة و يتفرج عليه بقيه عمره؟
هو انت بالنسبة له شريكة حياه و مشوار عمر لسة بتبتدوه و لا جثة؟
و يعنى ايه تخسريه لواحدة تانية؟ هو كل الستات اتساوا فى نظره؟

انا مش بقول لك تسيبيه .. انا باقول لك انت صح .. مش صح علشان العادات و التقاليد و الدين … صح علشان مش بتسمحى لحد يبتزك عاطفيا لحد ما تعملى حاجة انت مش مقتنعة بيها

ابقى خليه يقرا ردى يمكن يفهم انك بنى آدم

Bookmark and Share