fbpx
مونتيسوري مصر- تقدمها مروة رخا

مسؤولية اختيار شريك الحياة .. و الجرى ورا الواد الفتك

 

 

مرسى على اهتمامك يامروة وربنا يقدرك وتساعدينى انا ياستى عندى 26 سنة ومتجوزة من 9شهور وحامل فى الشهر السابع انا خريجة كلية الهندسة ومتجوزة من زميلى فى الكلية وانا مش بشتغل المهم انا مشكلتى كلها انى تعيسة فى حياتى على الرغم من انى متجوزة عن حب لكن التفاهم بيننا مفقود وعشان كده انا دايما تعيسة لآنى كمان مش حاسة بحب جوزى ولا بتحمله لآى مسؤلية ناحيتى او ناحية اللى فى بطنى وكمان انا مقهورة ومش قادرة اتعامل معاه ولا عارفة اخد حقى فى اى حاجة والنتيجة انى بعد ماكنت بحبه بجنون حاسة منه بقهر خلانى بعدت بمشاعرى اوى عنه وهو ماشى فى علاقات خارجية مع بنات وولاد للأسف بيشجعوه على الخراب واهلى كلموه وانا كلمته كتير وليه اخت طيبة كلمته برده كتير وهو بيتغير للأسوأ مع العلم انه كان بتاع بنات اوى قبل الجواز وكان بيعمل كل حاجة غلط ممكن تتخيليها وللأسف الناس اللى حواليه من اصدقائه عزاب وللأسف برده اخلاقهم سيئة.انا تعبت ومش قادرة اكمل حياتى كده وكل اللى حوالايه رافضين الطلاق عشان اللى فى بطنى وانا طاقتى فى الاحتمال خلصت.تنصحينى بايه؟ولو عايزة اى معلومات تانية انا تحت امرك واعذرينى ان كلامى مش مرتب

____________________________________

شوفى يا مشمشة

اللى بيشيل قربة مخرومة بتخر على دماغه و انت من الاول واخداه و هو كدة يبقى بتشتكى ليه دلوقتى؟ هو ماتغيرش .. انت اللى كان عندك توقعات و آمال وردية انه هيتغير و ما حصلش

انا مش باقولك كدة علشان تتضايقى
انا باقولك كدة علشان تخرجى من قوقعة الضحية و تعرفى ان دا اختيارك

سيبك بقى من نفسك و سعادتك
و سيبك منه و من تصرفاته

خلينا فى الطفل اللى جاى

لو فضلت متجوزة و باين عليكى عدم الرضا و القرف و الندم … الطفل دا ذنبه ايه؟ ما هو جوزك دا اختيارك و انت اللى عملتيه اب لطفلك

و لو اتطلقتى و الحياة قست عليكى و مسؤولية تربية طفل لوحدك كبيرة و الضغوط كتيرة … طفلك برده هيدفع التمن .. هيدفع من غضبك و عصبيتك عليه

دلوقتى انا عايزاكى تواجهى نفسك بمسؤوليتك فى اختيار شريك حياة غلط و مسؤوليتك فى الاستعجال فى الخلفة و مسؤوليتك تجاه الطفل دا

سعادتك مش اهم حاجة … استرجاع جوزك مش أهم حاجة … الانتقام و العند مش اهم حاجة

اهم حاجة انك تبقى افضل ام للطفل دا و بلاش يدفع تمن اخطائك

لو كان طلاقك هيخليكى ام افضل يبقى اتطلقى
و لو كان استمرارك فى الجواز هيخليكى ام افضل يبقى استمرى

من هي مروة رخا؟
مروة رخا: موجهة مونتيسوري معتمدة دولياً من الميلاد حتى 12 عام. Marwa Rakha: Internationally certified Montessori educator from birth to 12 years.

بدأت “مروة رخا” رحلتها مع “نهج وفلسفة المونتيسوري” في نهاية عام 2011 بقراءة كتب “د. ماريا مونتيسوري” عن الطفل والبيئة الغنية التي يحتاجها لينمو ويزدهر. تلت القراءة الحرة دراسة متعمقة للفلسفة والمنهج مع مركز أمريكا الشمالية للمونتيسوري

“North American Montessori Center”