روح القتال و الجاذبية و كلام كبير

Date posted: July 26, 2009


 

 

ازيك يا مروة
انا عندى 28 سنة وعلى فكرة ان اللى عندى ده مش عارفة دى مشكلة ولا حاجة عامة بين البنات اللى فى سنى ولا ايه بس ارجوكى تردى عليا بردود عملية أقدر انفذها اناعارفة ان انتى صريحة جدا وعايزاكى فى ردك ليا تكونى صريحة جداجدا جدا عشان أقدر اساعد نفسى المشكلة هى مشكلة الأرتباط اناعلى فكرة ما عنديش مشكلة مع الجنس الأخر بالعكس انا أعرف ناس كتير وبحوذ على أعجابهم وتقديرهم جدا وساعات بحس ان فى حاجة جواهم وساعات فعلا بيحصل وبيكون أحساسى صح بس المواضيع بتوقف من غير سبب وساعات المواضيع بتفضل مفتوحة مش عارفة ليها نهاية الى الأن على فكرة انا مريت بقصة حب جامدة جدا هى اللى كسرتنى وبجد ضيعت اى ثقة ليا بنفسى لأنى انا مش من طبعتى انى اعجب بحد من غير ما هو يبدى اعجابه بيا الأول والمرة اللى حبيت فيها كان كده برده وهو اللى فضل ورايا لغاية ما وقعنى فى حبه بس اكتشفت فى الأخر انى كنت بس شخصية صعبة عليه ولما أتاكد انى وقعت فى حبه — على فكرة انا عشت أجمل قصة حب بس كل ده طلع ولا حاجة لأنى بعد كده قاللى مش حننفع لبعض من غير اى أسباب بس انا عرفت انه عايز واحدة موزة جدا فى كل حاجة وانه مش حيقدر يكمل معايا انا مش قادرة اقولك انى انا لسه فايقة شوية من الموضوع ده لأنى كنت محطمة لمدة سنة المشكلة انه معايا فى الشغلوبتعامل معاه لغاية دلوقتى وهو ولا كأن عمل فيه اى حاجة وشايف انه ما غلطش فى حقى خالص وأنه لفترة حس انه بيحبنى جدا وبعدكده بيحبنى بس ما ننفعش نتجوز ومضطرة اتعامل معاه عادى وده اللى كان بيمثلى ضغط غير طبيعى انا حبقه ابعتلك تانى وأحكيلك تفاصيل الموضوع ده كله بس اللى انا عايزة اقوله لك ان قصتى زى بالظبط فيلم السلم والتعبان أكيد شوفتيه بس المشكلة ان اللى حصلى مانتهاش زى الفيلم والله نفاصيل الفيلم كلها كانت معايا تقريبا نفس الأحداث ما عدا النهاية بس انا ما فيش حد من صحا بى سمع الموضوع غير وقاللى الله يكون فى عونك فعلا بس بجد أصحابى وقفوا معايا وقفة من غيرهم بجد ما كنتش حقدر أكمل اى حاجة
بصى يا مروة ملخص الموضوع كله ان انا ثقتى بنفسى راحت خالص وبقيت حاسة ان ما فيش حد ممكن يعجب بيا مع العكس ان فى ناس بتبدى اعجبها بس بحس ان كل ده وهم مع العلم ان ما فيش عرسان بتجيلى البيت كتير و بتتقدم لى فبحس ان انا مش من النوع اللى يلفت النظر مع ان فى العمل أو فى مجال الأصدقاء يحدث عكس ذلك مع ان كل الناس بتلفت نظرها عيونى ولونها وبتأكد انها جميلة جدا بالرغم من كده ما بحسش ان انا مرغوب فيا تناقض غريب مش عارفة ايه ده وايه المفروض أعمله وهو انا كده خلاص فعلا السن بتاعى خلاص صغب الفرص اللى انا عايزاها تيجى وانى مضطرة اتنازل بصى مش عايزاكى تقوليلى كلام نظرى انا عايزة كلام عملى ونفسى بجد أحكيلك التجربة العاطفية الغريبة اللى انا مريت بيها معلش طولت عليكى بس يا رب اكون وصلت اللى جوايا ولو فى حاجة محتاجة تفهميما قوليلى وانا أوضحالك

________________________________________

 

المشكلة مش فى شكلك … المشكلة فى روحك … هو دا اللى مش بيجذب الناس او يشجعهم
 
انت زى ما تكونى طفيتى نفسك …. بريقك اتخطف … كاريزمتك اتدفنت … كأنك عجزتى من جوا او كأنك عجوز عندها 60 سنه فى جسم فتاه عندها 28 سنه
 
من جواكى لازم تكونى مبتهجة و مبسوطة و مفرفشة علشان وشك ينور و عينيكى تلمع و روحك تجذب الناس حواليكى
 
كتافك لازم تتفرد و خطواتك تبقى بترج الارض مش تبقى ماشية كأنك اللهو الخفى أو تتمنى انك فعلا تكونى خفيه
 
ضحكتك تنور وشك و تصغرك 10 سنين
 
اطردى الحزن و الكآبة لانهم زى النار فى الهشيم .. مش هيخلوا لك اخضر و لا يابس
 
اللى حصل حصل و اللى فات مات و المرحوم مش اغلى من اللى راح و لا اغلى من اللى جاى و اى انسان مش اغلى من اللى قبله و لا اغلى من اللى بعده .. التجارب هدفها انها تقوينا و تعلمنا و تخرجنا للمجتمع شخصيات اقوى و افضل .. مش الهدف خالص ان الواحد يتسفلت و يتساوى بالأرض
 
اتعلمى من اخطائك و اتعلمى كمان انك تسامحى نفسك
 
Bookmark and Share