اللبن لما يتعكر

Date posted: July 25, 2009


 

 

كان في واحد بيحبني من 3 سنين وانا كنت داخلة لسه الكلية بس انا داخلة كلية من كليات القمة وهو كان في صنايع بس كان ناوي يدخل قوات مسلحة بعدها انا كل ده ميهمنيش لكن لما حكيت لماما رفضت جدااااااااا وفضلت احاول معاها كتير ولما ملقتش امل قولتله مش هينفع الموضوع وبعدها اتقابلنا صدفة ورجعنا نتكلم علي اساس صحاب بس رجعنا تاني و كان ساعتها دخل قوات مسلحة وماما بدات توافق لكن مامته هو قالتله مش دي اللي كانت مامتها رافضاك وبقت المشكله عنده بس فضلنا مع بعض لحد ما واحدة صاحبتنا احنا الاتنين وقعت بيني وبينه وبين ماما ومامته وسيبنا بعض وبعدها ب 8 شهور كان عرف اللي حصل وااتاسفلي ورجعنا بس من غير ما حد يعرف وبعدها ناس قرايبه عارفني شافونا وقالوا عنده في البيت راحت مامته قالتله يا يسيبني وينسي خالص ويخطب واحدة تانية قريب اوي يا يسيب البيت وفعلا ساب البيت فترة بس هو متعلق جدا بعيلته لكن يوم عيد ميلاد اخته كلمني وقالي انه راجع البيت وطالما راجع يبقي موضوعنا انتهي انا اسفة اني طولت عليكي بس عايزة اقولك اني طول اي فترة كنا سايبين فيها بعض ناس كتير اتقدمتلي لكن انا مش عارفة اشوف حد غيره

_________________________________

 

بصى يا مشمشة

فى مثل بيقول اللبن لما يتعكر عمره ما يصفى تانى و النسب زى اللبن و اللبن عندكم اتطين على الاخر

بصى لقدام .. حماتك مش طايقاكى و لا طايقة اهلك و قرايبه مش طايقنك و الدنيا زفت فى زفت

ليه تدخلى دنيا فى وسط عيلة ملبشة من ناحيتك كدة

الحب لوحده مش كفاية و هو لا يمكن يسيب مامته علشانك و لو عملها هتبقى فى الاول بس

دول هيبقوا عيلة ولادك و بدل الدفئ و الحنان و الامان و الاستقرار هتشوفى ايام سودا

حكمى عقلك

Bookmark and Share