fbpx
مونتيسوري مصر- تقدمها مروة رخا

عملية نضيفة 100 فى ال 100

 

 

ازيك يا مروه عامله ايه انا مش من متابعينك اوي بس انا عارف ان رأيك بيجي من خبرة وقرايه ومشاكل كتير بتشوفيها انا مش عارف انتي شوفتي حكاية زي دي قبل كده ولا لا مش عاوز اطول في المقدمة بس هقولك علي الي حصل وعاوزك تقولي رأيك وتقوليلي علي قرار في الموضوع

 

انا بقعد علي النت كتير وبكلم ناس كتير اوي وسعات كتير اوي بقابل ناس من دول تانيه اجانب يعني وبقعد اتكلم معاهم افهم الناس دي بتفكر ازاي ومن فتره مش كبيره قابلت واحده علي النت من امريكا المهم هي عندها 45 سنه وعايشه لوحدها ومريضه عندها سرطان في الكلي المهم ده ممنعنيش اني اتكلم معاها مع ان فيه ناس كتير ممكن يتخنقو انهم يتكلمو مع حد كده اتكلمنا عن البلد وفي السياسه وفي الحياه وفي كل حاجه يوم بعد يوم ابتدينا نتكلم بشكل شبه يومي تقريباً وقربنا من بعض جداً يمكن انا في الأول كنت مشفق عليها من المرض بتاعها وحاولت اني اساعدها علي اساس انه مفيش حد جمبها اختصاراً احنا اعجبنا ببعض بشكل غريب انا عندي 25 سنه علي فكره الموضوع اتطور لأعجاب وبعد كده اتطور لحب وكلام في التيليفونات وطبعاً انتي فاهمه هما لما بيعملو حاجه بيعملوها عن اقتناع انا بحبها وبحب حبها ليا كمان هي النهارده اسلمت عن اقتناع ومش علشان بتحبني ومقتنعه بالي هي عملته وفاهمه كويس جداً ايه الألتزمات الي عليها وانا قلتلها انها مش هتعمل كل حاجه مره واحده وكل حاجه بتيجي واحده واحده اهم حاجه الأيمان والأقتناع بالي هي بتعمله هي عندها عملية في شهر 8 وهي مش ضامنه نجاح العملية هي بتقول انها لو نجحت هتخف من السرطان ان شاء الله بعد كده هتيجي علي مصر علشان المفروض اننا هنتجوز هنا بقي المشكله الكبيره اهلي طبعاً مش هيرضو اني اتجوز واحده عندها 45 سنه وفيه ناس قالتلي انت بتبيع نفسك مع اني مش عاوز اسافر معاها والمفروض اننا لسه مقررناش اننا هنقعد فين بس انا قلتلها مصر احسن انا بشتغل والحمد لله مرتبي كويس وهي كمان بتشتغل طبعاًً …………انا فاهم ان كل الي بيحصل ده زي الأفلام بس انا لحد دلوقتي مش عارف اخد قرار هل مقلش لأهلي واسافرلها انا ولا اقول لأهلي واقعد في وسطهم وده طبعاً مستحيل علشان محدش هيتقبل كده ولا اسيبها بعد لما تخف علشان مبقاش جرحتها وابقي طلعت معاها كويس للأخر واسيبها وهي كويسه ده طبعاً في حالة نجاح العمليه ….لو فيه تفاصيل تانيه عاوزه تعرفيها ابقي ابعتيلي بعد اذنك طبعاً متشكر جدا

____________________________________________

 

يا خبر ابيض … ايه يا راجل دا

الاول انا افتكرت واحد من اياهم .. اللى بيدوروا على هجرة و جنسية و بعدين لما قلت انها مريضة بالسرطان قلت فى بالى دا الولد بينشن … يسافر و يتجوزها و ياخد الجنسية و هى تموت و يعيش حياته بقى

و بعدين قريت بقية كلامك ما حسيتش انك من النوع دا

لكن انت علاقتك دى فيها ثغرات كتير

اولا انت بتحب امرأة اليكترونية مش لحم و دم .. يعنى لا روحتوا و لا جيتوا و لا اتعاملتوا وجها لوجه و لا عرفتوا طباع بعض فى الحقيقة … و الموضوع دا لا يستهان به … يعنى ممكن جوازات بتبوظ علشان مخارج الفاظه بتعصبها و لا طريقة اكلها بتقرفه

ثانيا انت هتجيبها هنا و تبهدلها .. انت يعنى شايف الشغل على قفا من يشيل؟ و لا العيشة سهلة؟ و لا المياة نظيفة؟ و لا الرعاية الصحية مضمونة؟ و لا هتستنى لما تخلف لك عيل و تاخده و تهرب؟

ثالثا هى بقى عايزة تتجوزك ليه؟ انا هاخلع برقع الحياء و اقولك من الاخر… علشان تنبسط و تتروق … ايوة … هى بتموت و الله اعلم هتخف و لا لأ و لو خفت هيرجع تانى و لا لأ .. الست عايزة تشوف لها يومين عدلين … و انت سيد الفاهمين

انا فاهمة دوافعها الانتحارية الانتهازية بس مش فاهماك انت … انت فى عز شبابك و شغلك كويس و مرتبك كويس .. يبقى ايه بقى؟ و لا كلامى اللى فى الاول فى شئ من الصواب؟

من هي مروة رخا؟
مروة رخا: موجهة مونتيسوري معتمدة دولياً من الميلاد حتى 12 عام. Marwa Rakha: Internationally certified Montessori educator from birth to 12 years.

بدأت “مروة رخا” رحلتها مع “نهج وفلسفة المونتيسوري” في نهاية عام 2011 بقراءة كتب “د. ماريا مونتيسوري” عن الطفل والبيئة الغنية التي يحتاجها لينمو ويزدهر. تلت القراءة الحرة دراسة متعمقة للفلسفة والمنهج مع مركز أمريكا الشمالية للمونتيسوري

“North American Montessori Center”