fbpx
مونتيسوري مصر- تقدمها مروة رخا

 

 

يا صباح الكنافه

انا عندى حاجه عايزاكى تقوللى اعمل ايه فيها

انا مخطوبه بقالى تقريبا 8شهور و كنت مرتبطه بخطيبى قبل كده يعنى اجمالى العلاقه سنه

كل لما تيجى مناسبه تقعد ماما قبليها تقول المفروض بقى يجيب كذا وكذا ولو مجبش او اتأخر شويه فى انه يجيب تفضل تنأرز فيا كلام
يعنى مثلا فى مولد النبى الولد جاب علبه حلاوه تشرفوه قدام اهلى
لكن بعد ما مشى تروح ماما قايله مجبلكيش عروسه؟

وقيسى على كده كل حاجه
المهم ان بينى و بينه بنكون اخر انسجام واخر دلع وموضوع الهدايا ده مش بيفرق معايا اوى خصوصا انه مش مقصر بس يمكن بيجيب الحاجه متأخر شويه عن معادها
يعنى مثلا نجحت و ممكن يجبلى الهديه بعدها بشهر و طول الشهر ده ماما طبعا
مش ساكته
زى ما قولتلك ان الموضوع ده مش فارق معايا اوى بس من كتر الكلام الى ماما بتقوله بحس بعد كده لنى مضايقه جداااااا
وبحاول على اد ما اقدر انى مطلعش ضقتى عليه
وبعدين تقعد تقارن بين الى خطيبى بيعمله و بين الى بابا كان بيعمله معاها
او بين الى كان بيعمله خطيبى الاولانى رغم انها كانت بتفضل تشتم فيه اد كده لما كان معايا

انا مقتنعه مليون فى الميه ان كل واحد بيعبر عن حبه بأسلوب مختلف

فى حاجات انا بكون مقدراها فى علاقتى بالانسان ده ماما مش بتكون عارفها فبالتالى بترجع كل حاجه انه بخيل حتى لو مقالتهاش بس انا بكون فاهماها من كلامها

قوللى بقى اقول ايه لما ماما تقولى كلام زى ده بس من غير ما ازعلها
واعمل ايه مع خطيبى عشان يجيب الهديه فى معادها

____________________________________________________

ماما مزوداها لكن هى ماما و مش هينفع نغيرها

يبقى تدخلى من ودن و تطلعى من ودن من غير ما الكلام دا يأثر عليكى

لكن برده ادرسى تعليقاتها كويس يمكن تكون عندها حق فى بعض النقاط

المثل اللى انت ضربتيه بتاع حلاوة المولد طبعا مثل بيغلطها

لكن ممكن يكون عندها حق فى حاجات تانية

فحطى فى بالك انها كبيرة و من جيل مختلف و فى نفس الوقت هى برده عندها خبرة فمش كل كلامها يترمى فى الزبالة

كلمة حاضر تريح و انت بينك و بين نفسك فكرى فى الكلام

اما بقى خطيبك … هو اتأخر ليه؟ كسل؟ و لا لسة ما قبضش المرتب؟ و لا كان موصى على الهدية و اخدت وقت على ما جت؟ … ايه اللى بيأخره؟ و هل هو دايما متأخر؟

_____________________________________________________

هو فعلا كان لسه مقبضش
وقالى ساعتها انه مش ناسى هديه نجاحى
وانا حسيت انه لو يقدر يجيبلى حته من السما هيجيبهالى

 

بس انا عايزه اعرفه ان الهديه لما مش بتيجى فى وقتها بتفقد معناها
ومش قصدى على موقف نجاحى ده
انا بقول كده عموما………….فهمانى

ده انا بخاف لما اى مناسبه تقرب
لايتاخر لاى سبب و ماما متسكتش

 

 
______________________________________________________
 
ربنا عرفوه بالعقل

 

هيسرق يعنى علشان يظبط ميعاد الهدية على ميعاد المناسبة؟

و ماما لازم تفهم و تقدر

لو انت حاسة انه بيستعبط و لا بيستهبل و لا مكبر يبقى انا معاكى فى انك تطلعى عينه لكن الواد غلبان و بيحبك يبقى بلاش افترى

 

من هي مروة رخا؟
مروة رخا: موجهة مونتيسوري معتمدة دولياً من الميلاد حتى 12 عام. Marwa Rakha: Internationally certified Montessori educator from birth to 12 years.

بدأت “مروة رخا” رحلتها مع “نهج وفلسفة المونتيسوري” في نهاية عام 2011 بقراءة كتب “د. ماريا مونتيسوري” عن الطفل والبيئة الغنية التي يحتاجها لينمو ويزدهر. تلت القراءة الحرة دراسة متعمقة للفلسفة والمنهج مع مركز أمريكا الشمالية للمونتيسوري

“North American Montessori Center”