بنت حسرت قلبى عليها

Date posted: July 24, 2009


 

 

انا عندى 19 سنة ارتبط بواحد وانا عندى 15 سنة كان هو عنده وقتها 25 سنة كان اول حد فى حياتى واول حب وكبرت و كبر حبه جوايا واتعلقت بيه اوووووووى كنت فى الاول خايفة منه وحاسة انه بيتسلى بيه المهم هو علشان يكسب ثقتى حكالى انه كان بيحب واحدة وغدرت بيه من غير سبب وانه تعب اوى و من ساعتها وهو بداء يشرب خمره ويعرف بنات ويضحك عليهم و حاجات كتير وكمان ساعتها كان قالى انه بيشتغل طيار حربى المهم فات وقت وانا كنت لسه بردوا قلقانة منه ودايما حاسة انه ممكن يسبنى فى اى وقت وان واحد زى ده ممكن يلعب بيا فقررت ابعد عنه وفعلا بعت شهر لكن هو رجع كلمنى واتحيل عليه وقالى انا مش عايز ارجع تانى زى الاول خليكى جنبى وكلام من ده رجعت على طول لان انا كمان تعبت اوى من غيره فى الشهر ده وبعدين عرفت بعد كدة بفترة انه كداب وان هو بيشتغل محاسب فى شركة فابعت عنه لكن بردوا رجع تانى وفضل يتحايل عليا ويكلم فى اصحابى ويقولى انا بجد بحبك علشان انتى اللى خرجتينى من اللى انا فى و خلتينى انسان نظيف وخلتينى احب الدنيا ادينى فرصة واحدة بس من تانى ورجعتله تانى وصدقت تانى و فضل كويس معايا اوى لمده سنة كانت اجمل سنة فى حياتى قربت منه اوى وحسسنى ان انا دنيته كلها وعشت معا فى احلام كتير المهم وكان دايما يقولى انه بيحترمنى علشان انا بحترم اهلى لان انا فهمته ان امى تعرف الموضوع علشان كنت عايزه يحس ان انا معايا حد كبير علشان لو بيلعب بيا يبعد المهم اول ماخلص قربت اخلص مدرسة وادخل الجامعة ابتدى يتغير وبقى بيعلمنى وحش اوى وكل لما تحصل اى حاجة بنا يبعد وافضل انا اعتذر وكنت دايما انا اللى ارجع اكلمه حتى لو هو اللى غلطان وفضل يبعد عنى وانا ارجعله يكلمنى كويس اول يومين واحس فعلا انه عايزنى وبعدين يرجع تانى يتغير وانا اللى دايما اتصل واسأل عليه و ساعات كمان كنت اتصل يقفل السكه فى وشى ومش يرد عليا ولما يحس انى خلاص هبعد يرجع يعتذر ويومين ويرجع تانى المهم طالبت اقابله علشان اتكلم معا واعرف بقى هو عايز اية لانى قولتله لو مش عايزنى اقولى وانا هبعد بس بلاش تعاملنى كدة يقولى انا لو مش عايزك هقولك مافيش حاجة تمنعنى المهم كل لما اقوله عايزة اشوفك يقولى بكره بعده كلمينى يوم الجمعة ونتفق اكلمه مايردش وبعدين لما يحس انى خلاص هقلب عليه يتصل ويفضل يقول فى اعذار وانا كنت بحس ساعات انه كداب واقوله بلاش تكدب قولى انك مش عايزنى وانا هبعد مافيش داعى يعنى لكل ده خليك صريح وخلاص الموضوع يخلص يقولى والله ظروف لو سامحتى قدرى وكلام من ده فطبعا انا كنت بقول لنفسى اكيد ظروف ماهو لو مش عايزنى هيقول و تمر الايام على كدة كل يوم اقوله بتحبنى ؟ اننت مابقتش معايا زى الاول و يقولى طيب هقولك بكره هوبطلى زن ويقلبها هزار شوية و يتكلم جد شوية المهم جيت فى يوم حسيت انى مش قادرة استحمل صممت انه يقولى هو بيحبنى ولا لا قالى لا قفلت معا السكة وقولت خلاص لحد كدة كفايا لانى ذلت نفسى كتير اوى معا وجيت على نفسى وخلاص الحق اللى باقى من كرمتى وامشى وفعلا بطلت اكلمه وخلاص اتقطعت كل حاجة الكلام ده كان اول مادخلت الجامعة قبل امتحانات الترم الاول على طول طبعا كنت تعبانة جدا ومش عارفة اذاكر ولا عارفة اخرج ولا عارفة اعيش حياة طبيعية وكل لما حتى حد يقولى انه بيحبنى ماكنتش قادرة اسمع الكلمه دى من حد غيره و دايما قاعدة اعيط واسأل نفسى هو اية اللى غيره و لية عمل فيا كدة ولية ماقليش انه بيحبنى و سبنى اكلمه و اتحيال عليه لية لما هو مش عايزنى انا كنت بستحمل منه كل ده على اساس انه بيحبنى بس هى فعلا ظروف وفضلت تعبانة 4 شهور و فجأة كنت قاعدة بعيط و بتكلم مع صاحبتى عليه لقيته بيكلمنى وبيقولى انه بيحبنى وانه اسف وانه عايز يشوفنى
فرحت فرحت الاعمى اللى فتح كان اسعد يوم فى حياتى و كلمته كويس اوووى و كانه معملش اى حاجة ووفقت اقابله وحسيت ان الدنيا كلها بتضحك وقولت اكيد المرة دى هو اللى رجع كلمنى بنفسه يبقى بيحبنى وقابلته وقعد يشرحلى بقى هو كان بيعمل كدة لية وقالى ظروف وعدت وانه مش هيسبنى تانى وكلام كتير من ده و فضل كويس معايا وبعد 3 اسابيع بالظبط وفجاه ومن غير اى مقدمات بيكلمنى عادى زى ما كل يوم بيكلمنى لقيته بيقولى احنا مش هينفع نكمل مع بعض وانت زى اختى سألته لية اية اللى حصل طبعا وانا بنهار ومش قادرة اسكت دموعى قالى بعدين هبقى اقولك مش وقته نبقى نتكلم على الاميل اقوله لو سمحت بس قولى لية وانت مش هتسمع صوتى تانى رد بردوا وقالى بعدين المهم كلمته على الايميل و بقوله اية اللى حصل قالى انا ماستهلكيش انا خونتك مع واحدة ونمت معاها قولتلوا يعنى انت لما قابلتنى وقولتلى انك بتحبنى كنت فعلا بتحبنى قالى اه قولتله طيب لية عملت كدة قالى ضعفت المهم انا كنت تعبانة اوى وقولت هسامحه وخلاص علشان انا بحبه لو حسيت انه ندمان فعلا هسامحه وفعلا كلمته قولتلوا انا عايزة اقابلك واتكلم معاك شويه قالى اوكى كلمينى بكره ونتفق قولتله طيب بس لو سامحت لو مش عايز تيجى قولى وخلاص بس بلاش تقولى اه و كلمينى وكدة وانت ناوى ماتجيش قولى لا و انا هقفل وخلاص قالى لا عادى هاجى مافيش مشاكل و اكلمه مايردش و بعدين يرد ويقولى مش فاضى خليها بكره كل مره بحجه وكل يوم بحكاية وفى اخر مرة بقى كان خلاص هيقابلنى بس انا كنت هتاخر على الميعاد فقولتله لو فاضى بكرة خليها بكره احسن انا ممكن كدة اتأخر عليك قالى خلاص كلمينى باليل و نتفق على الميعاد وقالى غالبا هتبقى الساعة 12 الظهرا علشان بعد كدة مش فاضى المهم يعنى ان احنا شبه اتفقنا على الميعاد وبعدها بساعتين بكلمه علشان اشوف هقابله فين قالى لا انا مش هينفع اجى بكره و عايز اقولك على حاجة كمان انا هخطب قولتله طيب لية لما انت بتحب واحدة و هتخطبها رجعت كلمتنى ولية عمال تكدب وتقولى انك خنتنى قولى سبب واحد يخليك تعمل فيا كده لية بس انت كرهتنى فى حياتى فضل ساكت ساكت و بعدين قالى انا ماعملتش حاجة وقفل السكة فى وشى

طبعا انا نفسيتى مدمره و تعبانه ومن يوم اللى حصل مابطلتش عياط ومش قادره اصدق ان ده الانسان اللى انا حبيته وامبارح قاعده فى امان الله بقراء قراءن وبدعى ربنا يصبرنى لقيته بيكلمنى رديت لقيته بيقولى ياريت ماتكنيش زعلانة منى وقولى لصاحبتك تبطل الحاجات اللى بتبعتها اتارى صاحبتى كنت انا صعبانه عليها وبعتت تقوله كلمها و كدة فا انا مش فاهمة حاجة طبعا منه المهم قولتله انا اسفة مش هخليها تبعت حاجة تانى قالى مش عايزك تبقى زعلانه قولتله انا مش عايزة اسمع صوتك تانى و مع السلامه وفجاءه واحدة خديت منه السماعة وقالتلى انا فلانه وهو كتب كتابه عليا وقالتلى انا زى اختك الكبيره لو سامحتى قوليلى كان فى اية بينك وبينه هو وعدك بحاجة زمان ولا لا ؟ قولتلها اه وعدنى المهم من كلام مراته فهمت ان هو لما جى قابلنى وقالى انه بيحبنى كان اصلا كاتب كتابه عليها وهى عرفت الموضوع بالصدفة شافت الرسالة بتاعت صاحبتى و وجهتخ بيها كدب عليها وقالها ان انا ابقى بنت خالت البنت اللى كان بيحبها زمان اللى هو بردوا حكالى عليها وقالى انها غدرت بيه بس قال بقى لمراته انها ماتت فى حادثة المهم وانا بتكلم بقى انا وهى اكتشفنا انا وهى كدب كتير اوى وقالتلى حاولى تسامحيه على اللى حصل لانك لو ماسمحتيهوش انا مش هكلمل معاه وانا قولتلها لا انا مش مسامحه لانه كسر قلبى من غير اى سبب وقالتلى عندك حق وهو مايستهلش انك تزعلى عليه وبطلى عياط وكلام من ده وبعدين باليل لقيته هو بعتلى رساله عمال يقولى لو سامحتى سامحينى على اى حاجة عملتها وبعدين انا ماعملتش حاجة تخليكى تكرهينى انا مش عايز اخسر مراتى انا بحبها ودلوقتى بس عرفت احساس انك تبقى بتحبى حد ويضيع منك وفضل يتكلم ماردتش عليه وبعدين بعتله رساله قولتله لو سامحت كفاية وانا مش هسمحك انت اللى عملته فيا ماكنش شوية قالى سامحينى على اساس ان انا انسان مش على اساس ان انا فلان قولتله بس انت عمرك ماكنت انسان معايا انت ذلتنى كتير ودوست عليا ققالى انا اسف قولتله اطلب السماح من ربنا بس انا مش هسامح
بس وبعدين كلمتها اشوفها عملت معا اية قالتلى انا هاسمحه على اية حاجة فاتت المهم ان هو هيتغير
انا بقى تعبانة اوى و مصدومة اوووى مش قادرة اصدق ان فى ناس كدة فى الدنيا تعبانة اوى مش بنام مش عارفة اعيش حياتى وهو عايش حياته و حتى لمل طلب منى اسامحه كان علشان مش عايز يخسر مراته لية مافكرش فيا و مافكرش انه بيوجعنى و هو بيطلب من انى اسامحة علشان يعرف يعيش مع واحدة تانية قوليلى اعمل اية انا كل حاجة بتفكرنى بى مش عارفة اعمل اية بجد تعبانة اوى وتعبت من العياط
ياريت تساعدنى انا حاولت اشغل نفسى كتير بس مافيش فايدة
حاسه انى عايزة اشوفوا بيعيط و مذلول يمكن ارتاح
ساعدينى

________________________________________________

 

ايه يا لوزة دا؟

أولا ادينى عقلك و فتحى مخك معايا …. راجل مين عنده 25 سنة يدخل فى علاقة مع
بنت فى ثانوى عندها 15 سنة؟ راجل معيوب؟ راجل متخلف؟ راجل ناقص؟ عيل؟ مراهق؟
فاشل؟ راجل مش لاقى واحدة من سنه تبص له فدور على بنت ساذجة مش هتعرف تفأسه و
لا هتعايره بخيبته التقيلة؟

فرق السن مش هو المشكلة هنا … لكن فرق الخبرة هة الكارثة … انت اتلعب بيكى

ثانيا ادينى عقلك بردوا … اللى يكدب فى الصغيرة هيكدب فى الكبيرة و هيعيش و
يموت كداب … و اخينا كل كلمة قالها لك كانت كدب و كل كلمة قالها للست اللى
كلمتك كانت كدب و مش بعيد دى تكون اصلا مراته و هو خبى عليكى انه متجوز و مش
بعيد تكون لا مراته و لا خطيبته و لا حاجة و بيعمل عليكى فيلم … عليكى بقى
بايه دا كله؟

ثالثا ادينى قلبك بقى …. قلب الانثى اللى بيشعر بالغيرة على راجلها … قلبك
دا سامحه ازاى على البلاوى السودة اللى بيعملها؟

رابعا ادينى كرامتك … ايه المرمطة دى؟ انت ازاى تسمحي له يدوس عليكى كدة؟ قفل
سكة و تهرب منك و مواعيد مضروبة و اهانة و معاملة زفت؟ انت بنت و لا مواطن
ملطشة؟

خامسا … انا زعلت عليكى … انت عندك 19 سنة يعنى المفروض تكونى وردة متفتحة
مقبلة على الحياة .. خروج و فسح و تنطيط و انشطة و بهجة و احلام بمستقبل باهر
.. لكن كاتبه المشكلة دى عجوز روحها شاخت قبل اوانها .. و لا كأنك أرملة و لا
مطلقة شايلة هم الدنيا كله …. انت فى 4 سنين اتسرقوا من عمرك … ناوية تضيعى
ايه تانى؟

انا كلمتك بالعقل و خاطبت مشاعرك و استنفرت عزيمتك و عبرت لك عن حزنى عليكى ..
الباقى فى ايدك انت

Bookmark and Share