ربنا اداكى بدل الاشارة عشرة ان الولد دا ما ينفعكيش

Date posted: July 20, 2009


 

 

شكرا جداااااا انك وافقتي تسمعيني ومتزعلش لو طولت عليكي

انا عمري 23 وشهور و عمري مارتبطت بانسان و لا كانت لي اي علاقات الا زمالة وصداقة برئية لكن ده ميمنعش اني حبيت واعتقد انك كان حبي قوي جدااا في جميع مراحل عمري لاني بجد ومش مجرد كلام انا عايشة عشان احب ويمكن ديه كانت المشكلة انا حبيت تقريبا مرتين و تعذبت فيهم جداا بس كان حب من طرف واحد حب البنات يعني نظرة وابتسامة و ضحكة واقول لصحبتي ويقول لصحابه كده يعني بس عمر الموضوع ما خرج مني لاي واحد من اللي حبتهم ,, انا هدخل في الموضوع عشان مطولش عليكي انا اشتغلت بعد تخرجي في احد الشركات الخاصة والمروقة بمصر و اشتغلت وانا عندي 20 سنة يعني تقريبا كنت اصغر حد في الشركة وبعد عام تقريبا وده من حوالي سنتين تمام في النفس الوقت الحالي ,, اشتغل معنا في القسم مهندس جديد في الاول كانت علاقتي بيه رسمي جدااا عكس باقي الناس بعدين لما اتكلمنا مع بعض لقيته من تاني مرة نتكلم فيها بيلمح باعجابه بيا و صدقني ده بدون مبالغة في الاول كدبت شعوري لكن هو كمان بيلمح انه عايز يخطبني و مرة كلمني وقالي ظروفة وانه معجب بيا وعايز يتقدم وقالي فكري وفكرت و بعض ضغط غير عادي منه وافقت اني اتكلم واسمع ظروفة قال انه اكبر اخواته وولده متوفي وانه رجل البيت بعد ولده وانه مش هيقدر ياخد اي خطوة الا لما اخته الوحيدة تتجوز وهي اساسا مخطوبة وكلها شهور قليلة ووافقت وقلت لولدتي وقررت استني الشهور وقربنا لبعض جدااااا لدرجة اني كنت بموت لو غاب عني و اتعلقت بيه لدرجة غريبة مش عارفة يمكن لانه اول ارتباط يمكن حبيت التجربة اني مرتبطة وكلام رايحة فين وجاية منين و الغيرة والكلام ده وانت فهماني طبعا ,,, بعد كده اخته اتجوز لما سالته قال ايه لولدته قال ان بتقول استني شوية لما افوق من موضوع اختك ( ممكن تكون قاصدة الجانب المادي ) و تمر ايام وايام وابتدي يختفي هو من طبعه لما يكون مضايق يختفي وكنت بموت لكن اول ما يرجع ويقولي اي حجة اصدق وانسي مرة في مشكلة في الشغل و بما اني معاه في الشغل قال انها مشكلة مينفعش يقولها يعني اسرار شغله ,, ويختفي ويرجع الكلام ده قعد لمدة سنة تقريبا لغاية مرة قعد اسبوعين معرفش عنه حاجة و بعدها كلمني وقال ان ولدته عملت مشكلة عشان تجوزه بنت خاله وانه هو مش موافق بس مش عارف يقنعها وبمعني اصح كل واحد يروح لحاله ,, وكانت اصعب فترة فقي حياتي و حاولت ادور علي العيوب اللي فيه عشان اكرهه وانساه وفعلا نسيته و الكلام ده من سنه وما بين كل شهرين يكلمني ويقول انه بيطمن عليا و مرة يقول انه هيكلم بابا و انما كان ردي اني مش عايزاه تاني خلاص وهو حاول بكل الطرق كلم واحد زميلانا وهو زي اخويا الكبير بس الغريب ان زميلي ده لما جيه يكلمني عليه قاللي "خدي بالك منه انا وهو اصحاب من حوالي 6 سنين و لسة معرفش شخصيتة" وشوية يلمحلي انه مش كويس وشوية يقول انه كداب هو مقلش كده صراحة بس لمح لانه كان خايف يوجع مشاعري و اكتشفت ان ده مش رايه بس ده راي ناس كتير انه شخص مش واضح .. انا مش عارفة اعمل ايه وهو بيلح من سنة انه يتقدم وانا بصده ,, لغاية مرة واحدة صحبتي قالت صلي استخارة وخليه الموضوع يمشي ولو ربنا سهل يبقي ربنا عايز كده و رجعت كلمته تاني بس كنت متحفظة جدااا علي مشاعري وكان كلمنا انه يتقدم لقيته بيقول انه عايزني اسيب الشغل مع انه عمره معترض علي الشغل و بعدها حسيت ان ولدته مش موافقة عشان انا شغالة سكرتيرة و تمر ايام وشهرين بعد مكان المفروض يتكلمن خلال اسبوع وحصلت مشاكل عندي وعنده في البيت وتاجل الموضوع تاني بس انا حسيته سالبي وقررت اني متكلمش تاني الا لو كان بصفة رسمية ,, لكن ان كتبت لكي عشان بجد مش لقية حد يقولي حاجة اعمل مع العلم اني حاسة انه بيحبني بس مش عارفة حبه ده ممكن يوصله ان يتغير ولا لا ؟؟ وهو دلوقتي اتكلم مع واحدة صحبتي وقالها ان هيكلم بابا وديه كانت ثالث مرة يقولها مع ان بابا بيتشغل معانا في نفس الشركة يعني مش صعب يوصل له ( عايزة اقول حاجة كمان ان في الفترة اللي بعدت عنه قابلت شخص وتقريبا كده اعجبت بيه بس والله ده محصلش الا لما فعلا كنت نسيته لاني اكتشفت ان حبي ليه مجرد حب التجربة بس و الانسان اللي عرفته ده للاسف هو شخص بالنسبة ليا احلامي كلها بس للاسف هو كان عنده تجربة ارتباط فاشلة خليته ميفكرش في الموضوع تاني مع اني بشوف في عنيه نظرة اعجاب ليا بس هو مركز جدااا علي حياته العملية ,, انا بقولك كده عشان اكون صريحة معاكي )

انا اسفة طولت عليك بس صدقني انا ارتحت وياريت متقوليش عليا اني هوائية ولا مراهقة ولا اني خدعته انا بس انسانة بدور علي حاجة لغاية الان مش عارفة الاقيها ,,و اسفة تاني مرة اني طولت عليكي

____________________________________

 

انت لو ماشغلتيش عقلك هتروحى فى خبر كان

ربنا اداكى بدل الاشارة عشرة ان الولد دا ما ينفعكيش
اولا موقفه بعد ما ربطك بيه و اختفائه
ثانيا امه و بنت خاله و الحكاية دى
ثالثا تحذير الراجل اللى زى اخوكى
رابعا سمعته و رأى الناس فيه
خامسا وعوده بانه هيكلم باباكى و خلفه كل الوعود
سادسا اللى بحب حد لايمكن يعمل فيه اللى هو بيعمله فيكى دا
سابعا تدخل الست الوالدة مش مطمئن
ثامنا مالها السكيرتيرة؟ ايه النظرة المحدودة العنصرية المقززة الزفت دى؟
تاسعا هو بأى حق بيتطلب و يتشرط؟
عاشرا .. اقرى تانى كل الكلام اللى فوق و بلاش تخدعى نفسك و تيجى تعيطى بعد كدة

اما بقى موضوع الراجل صاحب التجربة .. انا مش معترضة عليه من حيث المبدأ لكن انا حاسة انك غاوية مشاكل .. لازم تعجبى بالراجل اللى هيكرهك فى عيشتك و لازم تدخلى المواضيع المعقربة .. ليه كدة .. انت عندك 23 سنة و الدنيا لسة بتفتحلك ذراعها

Bookmark and Share