fbpx
مونتيسوري مصر- تقدمها مروة رخا

اتجوزه و ابقى زوجة تانية؟

 

 

السلام عليكم ورحمة الله وبركاته
انا فتاة ابلغ من العمر 31 سنة ولا اعمل حاليا لان امى مريضة وانا متحملة مسئولية البيت حتى لما بتبقى كويسة وانا خارج البيت ببقى قلقانة عليها لان مجهودها على قدها المهم البيت شديدنى اوى ده من الاسباب الهامة فى عدم شغلى وكمان مفيش حاجة تشجع علشان انزل اشتغل
الموضوع بقى ان من حوالى 11 سنة تقريبا كده كنت مخطوبة لابن خالتى وكنت بحبه من قبل كده بكام سنة كمان وخالتى وجوزها شجعوه انه يخطبنى علشان عارفين الحكاية واستمرت الخطوبة 4 شهور انفصلنا بعد كده وكان الانفصال من طرفه لاسباب منها مثلا انى ما كنتش وقتها اخدت الثانوية العامة لانى مرت بظروف صعبة فى الثانوية العامة واتاخرت شويةوهو كان عايز واحدة جامعية وكنت رفيعة اوى وهو ما كنش بيحب كده وكان بيقولى كل شوية اتجنى شوية وكنت خجولة كتير وما كنتش بعرف اعبر عن حبى وهو كان مسمى الخجل ده غموض وما كنتش اخده عليه لانه كان بعيد انا فى اسكندرية وهو فى والقاهرة كل ما يجى اجازة اخد عليه شوية ويبعد وكده وللاسف جرحنى اوى رغم انه عارف انى بحبه اوى وبعد واتجوز واختار واحدة تانية الموضوع بقى انه متزوج بقاله 8 سنوات ولم ينجب لاسباب تخص زوجته وهو بيحب الاطفال جدا ومش عايز يترك زوجته لانها ما عملتش حاجة غير انها مش بتخلف وباباها وماماتها متوفين والبيت بتعاهم راح لاصحاب البيت فهتروح فين من الاخر مالهاش غيره رغم انها بتشتغل فى مكان كويس جدا هو بقى عايز يتجوز مع الاختفاظ بها وما رشحنى تانى ليه بس انا مش قادرة خالص بيحاول يكلمنى كتير من حوالى سنة لحد دلوقتى وانا عارفة رقمه ومش برد عليه كل لما اجى واقول المرة اللى جاية ارد عليه مقدرش ارد مش قادرة هقوله ايه حاسة انى فارغة اوى من ناحيته رغم انى ما حبتش غيره وما عملتش علاقات مع حد خالص مش اكتر من عرسان بيتقدمولى عن طريق الصالونات ومش بيحصل نصيب وانا ما عنديش مجال اساسا لعمل علاقات ولا شغل ولا خروج علاقات محدودة مش عارفة اعمل ايه ابتديت اضايق من تعليقات الاخرين انى كبرت واتعديت سن التلاتين ومش من حقى اتامر زى زمان رغم ان شكلى مش باين عليه خالص
وبالمناسبة مشتركة على مواقع للزواج مثل زوجتى وقيران ومش متقبلة موضوع الجواز عن طريق النت ده خالص اولا مش بحب اعمل علاقات مع حد معنديش الجرئة على كده واما حد بيقولى رقم تليفونك مثلا بتهرب وامشى ومكلموش تانى نفسى ارتاح لحد واقول هو ده
الحزب الاغلب بيقولى ارجع لابن خالتى تانى هو راجع ونادم انه فرط فيا زمان رغم انه لو كنا اتجوزنا زمان كان زمان ابننا اللى هو بيدور عليه دلوقتى على الاقل عنده 8 سنين واخواته فى راسه
حاسة انى مجروحة طول عمرى منه وبسببه هو عايز يعرف منى راى الاول فى التليفون علشان محرج من بابا من الحصل زمان رغم ان خالتى كلمت ماما فى الموضوع وماما رفضت مرتين كلمنى بعدها تانى برضه بس ماما خالاتى ماثرين عليها شوية بعد ما احتديت على خالتى فى الكلام ورفضت وبيقولوا لو يكتب الشقة باسمى ممكن يوفقوا
مش عارفة اعمل ايه ومش عايزة ابقى زوجة تانية حاسة انها اهانة ليا اوى انى ابقى زوجة تانية ليه
ايه رايك بالله عليك ادى لنفسى فرصة واكلمه ولرد عليه لما يكلمنى المرة اللى جاية ولا علشان سبنى زمان ما ارجعش نفسى تانى هما بيقولوا ان حالته وحشة اوى وبيعيط ومكتئب علشان الخلفة
دلينى وردى عليا بالله عليكى
اشكرك جدا
وكل سنة وانتى طيبة بمناسبة رجب وقدوم شعبان اللهم بلغنا رمضان انشاء الله

__________________________________________

 
انا لسة كنت حاطة رد على موضوع الجواز التانى فدا ردى عليكى فى النقطة دى
 
انا ما ينفعش احرم حاجة ربنا حللها و علشان كدة مش هاتكلم فى موضوع خراب البيوت و خطف الرجالة و الكلام دا
 
انا هاسألك شوية أسئلة و وانت هتقررى
 
أولا: مش هتغيرى و هو بيبات عندها؟
ثانيا: مش هتغيرى من ولاده؟
ثالثا: مش هتتضايقى ان مرتبه مش ليكى و لا لبيتك؟
رابعا: هتخلفى؟ هيقدر يصرف على ولاده منك زى ولاده منك؟
خامسا: هيقولها؟ ولا ولادك هيطلعوا كارهين اخواتهم و اخواتهم كارهينهم؟
سادسا: أولا يوم رمضان، يوم عيد ميلاده، وقفة الاعياد، راس السنة، عيد الحب، المصيف … هو هيبقى فين؟
سابعا: هيحضر معاكى مناسباتك العائليه؟ افراح؟ عزاء؟ ولادة؟ و باقى المجاملات؟
ثامنا: هتستحملى كل الكلام دا قد ايه؟
 
اما موضوع انه رجع نادم .. لأ لأ لأ
هو رجع علشان يجرحك و يستغلك و يدوس عليكى تانى
 
انت بالنسبة له وعاء .. مجرد رحم يشيل ذرته
 
هو مش بيحبك و لا عمره حبك
 
و ايه الوضع لو انت كمان ماخلفتيش؟ هيرميكى؟
 
تأخر سن الزواج مش عيب لكن العيب اليأس
 
الا اذا
 
انت مش عايزة زوج و لا بيت و لا حياة مستقرة  .. عايزة طفل و بس
 

و سؤال .. هو الطفل هيتربى فى حضنك و لا هتخلفى و ياخده معاه؟

من هي مروة رخا؟
مروة رخا: موجهة مونتيسوري معتمدة دولياً من الميلاد حتى 12 عام. Marwa Rakha: Internationally certified Montessori educator from birth to 12 years.

بدأت “مروة رخا” رحلتها مع “نهج وفلسفة المونتيسوري” في نهاية عام 2011 بقراءة كتب “د. ماريا مونتيسوري” عن الطفل والبيئة الغنية التي يحتاجها لينمو ويزدهر. تلت القراءة الحرة دراسة متعمقة للفلسفة والمنهج مع مركز أمريكا الشمالية للمونتيسوري

“North American Montessori Center”