رد صوتى: البنت الاستبن

Date posted: June 5, 2009


 

 انا شوفتك فى برنامج شبابيك فى حلقه الزكاء العاطفى وبجد عجبتنى جدا والحمدالله قدرت اوصلك عن طريق برنامج بحب فيك ايه ونزلت كل الحلقات واستافدت منها جدا الحقيقه يا مروه انا عندى مشكله ومحتاجه جدا رايك فيها وياريت اى طريقه اكلمك انتى شخصيا وسورى لو كنت هطول عليكى شويه بس محتاجه انك تسمعينى فعلا انا طالبه فى الجامعه واتعرفت على شاب زميلى اتشدينا لبعض جدا

اول ما اتكلمنا وكنا بنفهم بعض اوى وبنحس ببعض حتى من غير كلام وده اللى خلانا قربنا من بعض بسرعه جدا وبقينا نعرف بعض يمكن اكتر من اصحابنا اللى بقالنا سنين نعرفهم المهم هو كان حاكيلى على جارته اللى بيحبها وهى بنت فى ثانوى وانهم كانو مرتبطين وفجاه بعدت عنه عشان اخوها وباباها عرفو الموضوع لكن ده حصل من غير ما تقولو او تديلو اى مبرر ولما حسينا اننا منجذبين لبعض بدء يبينلى انه خلاص البنت دى هى اللى بعدت وهو مش هيستنى منها حاجه ومش فارقه معاه

وبان اعجباه بيا من تصرفاته اهتمامه الزايد بيا وخوفه عليا وانا يا مروه لاقيت معاه الحاجات اللى كنت بجد مفتقداها وهى بس اول ما ببقى جمبه بحس بامان وانه بيحتوينى وبيحمينىودى اكتر حاجه علقتنى بيه وكنت خلاص متاكده انه هيصرح ليا بمشاعره لحد ما لاقيت عكس كده انه قالى ان مش هينفع يكون بينا حاجه لانه لسه متعلق بجارته وانها لو جت وكلمته فى اى وقت هيرجعلها

وانه كان سهل اوى يرتبط بيا زى ما بيعمل مع اى بنت بس انا مش زى اى بنت هو عرفها وانى مينفعش اتجرح وانه مش عايز يظلمنى وقالى انه من وقتها قرر نبقى اخوات بس انا كنت اتعلقت بيه اوى وده بان من تصرفاتى لدرجه انه كان لما بيحس بكده بيقولى انه هيبعد عنى عشانى وانا اللى كنت بدارى ده لانى بخاف بجد انه يبعد عنى وكنت بتحمل تصرفاته معايا لانى اخته وانه مش حاسس بيا

وفعلا البنت جارته دى رجعتلو بس اتفقت معاه ان الموضوع يتأجل سنتين لحد ما هى تدخل الكليه وتقدر تقول لاهلها او هو يتقدملها وقالتلو انا اللى هكلمك لما اكون لوحدى او ينفع اكلمك وبدءت متكلمهوش خالص وطنشه وهو طبعا اتخنق من كده جدا وحس انه مش فارق معاها وانها مبقتش تحبه وطبعا هو كان بيحكيلى على كل حاجه بينهم لانى كنت بفهمه من غير ما يتكلم بس كان ده بيجرحنى اوى ومش بقدر ابين بس لما حاسيت انه اتخنق منها رجعلى الامل تانى ان الحاجز اللى بينا ممكن يروح بس برغم كده هو محسش بيا

وبردو صدنى وفى الفتره الاخيره بدأت طريقته تتغير معايا قل اهتمامه بيا جدا بحس انه بيتعمد يتريق عليا او يضايقنى عشان يبينلى انه مينفعش يكون بينا حاجه لدرجه انه كذا مره كان بيألس على حاجه فى شكلى مع انى حلوه والله وده قلل من ثقتى فى نفسى وحسسنى ان مش انا البنت اللى بيحلم بيها انا نزلت من كرامتى كتير فى الموضوع ده بس مش عارفه اعمل ايه انا متعلقه بيه جدا وكل ما احاول ابعد عنه انا اللى برجع واقربلو تانى واى كلمه منه بطلعنى سابع سما وتنزلنى لسابع ارض قوليلى اعمل ايه وفى امل من الموضوع ده ولا لاء وللاسف انا مكنش عندى الزكاء العاطفى اللى انتى قولتى عليه معاه انا اسفه انى طولت عليكى بس ارجوكى ردى عليا ضرورى وبسرعه

اضغط على شريط الاستماع لمعرفة ردى

Get the Flash Player to see this player.

 

Bookmark and Share