جوزى زير نساء و انا لسة عندى 20 سنة

Date posted: July 19, 2009


 

 

هاى مروة انا بحبك جدا و عجبنى كلامك جدا فى اللقاءات بتاعتك على ال

tv
بس انا عندى مشكلة كبيرة اوى انا عندى 20 سنة متزوجة من سنة انا لسه فى الدراسة و عندى بيبى عنده شهرين عرفت جوزى من سنتين صدفة لانه صاحب جوز اختى بصراحة الاول مش حبيته بس بعد كدة حببنى فيه حسيت انه طيب و اخلاق و اهم حاجة انى حسيت بحبه ليا المهم اتخطبنا 7 شهور و بعد كدة اتكتب كتابنا و بعد كدة اتجوزنا
عايزة اقولك انى كنت بثق فيه اكتر من نفسى و بحبه حب مش فى حد يتصوره رفضت اكتر من واحد عشانه و كنت بقنع ماما انه كويس عشان توافق عليه لان هى مش بتحب الظباط و هو ظابط حربية

انا الحمد لله شكلى مقبول جدا و بشهادة الكل و بحمد ربنا على النعمة دى و اخلاقى الحمد لله كويسة
المشكلة عندى الخيانة لان بعد اسبوعين من جوازنا بدأ يتغير و يتكلم فى الموبيل من وراية و بيعمل حركات غريبة و يكدب عليا و انا و الحمد لله ربنا معاية و بيكشفلى كل كدبه و لما جيت اواجهه انه بيتكلم مع واحدة كان يزعقلى و يسيب البيت بعد كدة اعرف انه عنده ايميل من وراية و عليه بنات كتير جدااااااا و من ضمنهم واحدة كان سافرلهه المكان اللى عايشة فيه عشان يقابلهه و مش بيقولهه انه متجوز لولا انى كشفت الموضوع و عرفتهه كانت هتقابله و لاقيت عنده على الهاى فايف بنات كتير جدا و كلهم من نوع اللى بالى بالك صور من غير هدوم بقة و قلة ادب و كمان ممكن يقول انه مش معاه فلوس او يقول على مبلغ و يطلع معاه اكتر و مبالغ كتير اوى بيصرفهه و لما بسأله يقوللى مش عارف و الله بتتصرف فى اية
كل ده و انا على نار و كل ما اعرف حاجة يقوللى مش هعمل كدة تانى
بصراحة انا مش بقيت قادرة استحمل خالص الكدب كدة و بشك فيه حتى و هو فى الشغل و كل اصحابه المتجوزين كل شوية واحدة من مرتاتهم تقوللى انا جوزى جاب واحدة فى الشقة و انا مش هنا و اللى تقوللى انا جوزى بيصرف الفلوس و بيعرف بنات يعنى حتى اصحابه كلهم اصحاب سوء
و بقيت بشك فيه انه بيجيب بنات فى البيت و انا مش موجودة فيه لان حجج كتير بيقولهه عشان ابات عند مامته
انا تعبانة و اللى كان بيخلينى اعديله غلطاته هو حبى ليه و انا خايفة عمرى يمر و انا جمب واحد بيخدعنى و حبه ليه وهم و بصراحة عايزة اعيش حياتى من اولهه لانى حاسه انى مدفونة
انا عارفة انى طولت عليكى بس تخليلى نار و عذاب طول سنة كاملة مع حمل و تعب و ولادة تربية بيبى
ساعدينى ربنا يخليكى و بليز فى اقرب وقت
شكرا ليكى و جزاك الله خيرا

_________________________________________

 

انت مشكلتك فعلا صعبة …. و معلش انا أسفة .. أنا هاعتب عليكى و على اهلك فى
موضوع جوازك البدرى دا

انت اتجوزتى و انت عندك 19 سنة … يعنى لا شوفتى حاجة فى الدنيا و لا فهمتى
حاجة … عمرك اتسرق لانك نطيتى مراحل من حياتك … دلوقتى انت طالبة و زوجة و
ام و مش سعيدة …. البنات اللى فى سنك مش المفروض انهم يشيلوا مسؤولية حاجة
غير مذاكرتهم

انا بحاول اتخيل حياتك كمان 5 سنين .. اللى فى سنك وقتها هيكونوا بيكونوا اسرة
لسة بعد ما اتخرجوا و اشتغلوا و شافو الدنيا و اختاروا بعقلهم .. لكن انت ..
انا مش عارفة هيبقى مصيرك ايه و لا حتى شكلك ايه .. يا ترى الهم و المسؤولية
هيعجزوكى كام سنة بدرى؟

انا ما عنديش حل مضمون لمشكلتك … اقولك ازاى تتطلقى … يعنى هتبقى عندك 20
سنة و مطلقة و معاكى طفل … طيب هتشيلى مسؤوليته ازاى و انت اصلا لسة طالبة؟ و
هتصرفى عليه منين؟ و هتربيه لوحدك ازاى؟ و هتشتغلى ازاى و انت مربوطة
بالمسؤوليات بدرى كدة؟

أنا فعلا مش ممكن اقولك تتطلقى

و مش قادرة اقولك تستحملى … ذنبك ايه انك تستحملى الاهانة و الخيانة و الغدر
و قلة الادب … البيه اللى عامل فيها فلانتينو دا اصلا يبقى اب ازاى؟

و مش هاعرف اقولك تغيريه .. لانه شاب ارعن ماعندوش قيم و لا مبادئ و لا نخوة و
لا اى احساس بالمسؤوليه … لو كلمتيه باسم الدين مش هيفهم و لو كلمتيه باسم
الصح و الغلط مش هيسمع و لو كلمتيه باسم الابوة مش هيعرف انت اصلا بتقولى
الكلام دا ليه

اقتراحى الوحيد .. مؤقتا .. انك هتصهينى عن خياته و تدعى ربنا يهديه و فى الوقت
ذاته عايزاكى تتخرجى و تشتغلى علشان تعتمدى على نفسك و فى نفس الوقت طلعى كل
مشاعرك و حبك فى طفلك لانه مالوش ذنب يرضع سم

Bookmark and Share