ايه يا ربى دا؟

Date posted: July 13, 2009


 

 

 

ازيك مروة انا بحبك وبحترمك جدا ومتبعاكي دايما ف كل مكان عشان بحس بجد اد ايه فاهمانا وقريبة مننا وكمان بتعرفي اصل المشكلة وتلاقيلها حلول دائمة وبتمنى تساعديني ف مشكلتي..
الاول اعذريني لو هطول عليكي بس معلش دي اول مرة اتكلم مع حد،دايما بسمع وبستحمل هموم الناس بس مبلاقيش حد يسمعني لو حبيت اتكلم.
انا عندي 20 سنة كلها هموم ومافتكرش فيها غير كام يوم بس حلو انا عارفة ان كل الناس عندها مشاكل ومحدش مرتاح بس انا زهقت بجد وحاسة اني مش فارقة مع حد..
اول مشكلة اهلي…واحنا صغيرين اخدونا بلد عربي واتربينا هناك وكانت ايام صعبة جدا وكانوا دايما بيتخانقوا وبابا بيضرب ماما لدرجة محدش يتخيلها بس اللي اكتر من كده انه كان بيتحرش بيا والحكاية دي مستمرة لحد دلوقتي انتي متخيلة؟ انا دايما بسمع عن عنف جسدي من ناس اصحاب الاهل مثلا او ف المدارس بس مش بابا انا بكرهه جدا وبكره امي عشان مصدقتنيش لما قولتلها ومن ساعتها معاملتهم وحشة جدا معايا و بجد بتصعب عليا نفسي اوي عشان انا مظلومة ومحدش حاسس وكلهم بيكرهوني وماتتخيليش بيعاملوني ازاي.بعد مارجعنا حطيت همي كله ف دراستي وكنت عاملة زي الكمبيوتر بحفظ وبذاكر من غير احساس لحد ماخلصت ثانوي وكان حلمي ادخل كلية الالسن ومخططة حياتي بعدها عاملة ازاي ومجموعي كان اكبر منها كمان بس غصبوا عليا ادخل نفس الكلية اللي فيها اخويا عشان مايحسش اني احسن منه ف حاجة وقالولي اختاري تعيشي معانا ولا ف الشارع وشوفي مين هيصرف عليكي،انا بالنسبالي الشارع اهون مليون مرة من اللي بيحصلي واسحملت وفضلت عايشة معاهم وكلهم بيكدبوا على بعض وانا ف حالي واحلامي بتضيع ورا بعض وبجد تعبت ومش قادرة استحمل اكتر من كده.
ف الفترة دي كنت بكبر وبحس اهتمام الشباب ليا بيزيد وانا كنت ببعد عنهم عشان حاسة انهم كلهم زي بابا وفعلا كل اللي كانوا مهتمين بيا كانو بيفكروا فيا ف جسمي وشكلي بس ماتتخيليش اد ايه ده بيحسسني اني مليش قيمة يعني محدش فيهم يعرف انا بفكر ف ايه مثلا ولا ممكن اعمل ايه ف حياتي كل اللي بيفكروا فيه اني واحدة شكلها حلو وجسمها جامد-انا اسفة على التعبير بس بصراحة-بحس اني اتهنت من اول معاملة بابا ليا لحد الناس في الشارع كاني جسم ماشي من غير عقل ولا تفكير حرام عليهم بجد انا اتظلمت كتير بس الحمدلله لحد اخر لحظة بحافظ على نفسي وبتعامل مع الكل بحساب.
اخر مشكلة اني دلوقتي كان عندي صاحب هو جدع جدا معايا وبيحترمني جدا غير كل الناس اللي شفتهم وعارف اني مليش لا تجارب ولا علاقات قبله وحسسني انو بيحبني ومهتم بيا اكتر من صداقة ف الاول وانا كمان اتعلقت بيه وحسيت اني بحبه وقلتله كده بس مش عارفة هو ساعات بيتصرف على انو بيحبني وبيقولي ده وبيتكلم على مستقبلنا مع بعض وساعات بيتكلم ف صداقة ويحسسني انه مابيفكرش في ارتباط اصلا ومبقتش فاهمة طب لو هو مابيفكرش في حب ليه قالي كده وعلقني بيه من الاول ولما اقوله كده يقولي انتي مش فاهمة حاجة يعني انتي شايفة اني مابحبكيش ؟ بجد مابفهموش وانا والله مهتمية بيه وبحياته وشغله وقبل كده دراسته كنت بهون عليه ايام كتير ودايما بيقولي ان امنية حياته اني افضل معاه على طول ويرجع يتغير ويقسى عليا ويقولي لو بتحبيني هتستحمليني..انا اصلا مش ناقصة و ف نفس الوقت خايفة اظلمه ويكون بيحبني فعلا بس هو طبعه كده طيب انا اعرف ازاي؟
انا عارفة طولت عليكي بس انا متأكده انك هتفهميني وتساعديني..
مروة انا من كام يوم بقى عندي 20 سنة ونفسي اعيش حياة طبيعية زي الناس العادية واخلص من كل همومي وعندي استعداد اعمل اي حاجة عشان احس اني عايشة ولو مرة واحدة بليز ساعديني.

 

 

_______________________________________________

 

يا حبيبتى .. ايه يا ربى دا؟ معقولة؟

انا خايفة من كذا حاجة
أولا خايفة لا يكون ارتباطك بالولد دا هروب من حالة بيتكم
ثانيا خايفة لا يكون اختيارك للولد متأثر سلبا بتحرش والدك بيكى
ثالثا خايفة لا تكون لهفتك على الحب و الحنان هى اللى مصورة لك الصداقة حب
رابعا الدنيا ظلمتك كفاية و انا مش عايزاكى تظلمى نفسك

انت دلوقتى صورة الرجل اهتزت فى مخيلتك و طبيعى ان دا هيأثر على نظرتك و تقييمك للرجل .. انا عايزاكى تحتفظى بالولد دا كصديق علشان توازنك النفسى و ممكن أرشح لك اخصائيين فى معالجة آثار التحرش و العنف المنزلى و أخر طلب هاطلبه منك بلاش تختارى زوج دلوقتى .. استنى لما تتخرجى و تشتغلى سنة ولا اتنين علشان فعلا تقدرى تختارى بنضج … انت من يوم ما وعيتى على الدنيا و انت زى العروسة الماريونيت بيحركوكى بخيط من بعيد … انا عايزاكى لما تقوى شوية و تستقلى شوية تجربى الدنيا من غير خيط بيحركك و قرارك يكون من دماغك و كل دا مش هيتم الا اذا اتصالحتى مع نفسك و الماضى

Bookmark and Share