مروة رخا لمجلة احنا – أخى المواطن! احترس من هذه المرأة

Date posted: November 1, 2007


أنواع الستات

كتبت الشهر اللى فات عن الرجالة الى مش بييجي من وراهم خير فزعلوا منى واتهمونى بالتحيز للمرأة.

النهارده سأقر و أعترف بأنى فى صف كل رجل أنانى، جبان، خائن، قليل الأدب، أو عديم الذوق … ليه؟

لأن كلام و تصرفات الستات تشجع تضخم غرور الرجل و ترحب بكل اهاناته

فوراء كل رجل "مقرف" امرأة تحتمل "قرفه"!

وعلشان كده، و من باب مساندتى للجنس الخشن، سأكشف ورق بنات حواء اللى مش هييجى من وراهم خير!

1. البراشوت

نوع من البنات انتشر اليومين دول! عايزة تخرج و تنبسط و تتفسح و تاكل و تشرب و تعزم صاحباتها … على حساب البيه. مبدئها: هوا انت مش راجل؟

2. البرنسيسة

باربى هانم … لازم تتدلع و تتهنن. ابعدها عن المسؤولية و المشاركة و الكلام اللى يقصر العمر ده. هاتجرى وراها فى الاول و الآخر و طول العمر … مهما عملت انت مقصر و مهما قلت كانك لم تقل و مهما قدمت انت لم ترضى الهانم و توقعاتها! مبدئها: أكيد فى اكتر .. أكيد فى افضل!

3. الغامضة

كلامها قليل و نظراتها شاردة … و بس! تتوقع منك فك ألغازها و حل عقدها. لعبتها المفضلة و مبدئها: حزر فزر … حزر فزر انا زعلانة لية؟

4. المتشائمة

فى البداية تحترم واقعيتها و قدرتها على وزن الأمور لكن مع العشرة هايجيلك اكتئاب و هاتكلم نفسك من السواد الذى يحيطك! مبدئها: مش هاتنفع … اى حاجة مش هاتنفع!

5. البرابند

مسلية و بحبوحة و حبوبة و … صداع! راديو شغال بالطاقة الترابية و حكاياتها و مواضيعها كتيرة و تافهة. مبدئها: الكمية لا الكيفية quantity not quality 

6. الوصيفة

الادب سوسو و الطاعة سوسو … لكن ليس لك … ولائها الأول للملكة و الملكة هنا ممكن تكون الوالدة أو الجارة أو صديقة عمرها … أو اى صديقة و خلاص! مبدئها: تموت انت و تعيش الملكة!

7. ال "بروطه"

هادئة و مريحة .. لا تهش و لا تنش .. لا طموح و لا أحلام و لا حضور و لا حاجة … خطاف و اتربط فى رجلك و مطلوب منك تمشى و تجرى و تتنفس لك و لها! مبدئها: شيلنى كبة … حطنى كبة … ايوة أنا كبة!

8. الوزة

رمز للحنية و الأمومة و العاطفة المتدفقة … كلما وقعت عينيها عليك صففت شعرك أو عدلت ياقة قميصك أو مسحت جبينك. تسألك دائما عن اكلك و شربك و نومك و صحتك الى ان تختنق من ضيق هذا الرحم الصناعى! مبدئها: انت ابنى اللى ما خلفتهوش!

9. اليائسة

فاتها القطر و انت – أو اى رجل – الامل الوحيد! شيل يا معلم و يا ويلك يا سواد ليلك! انت package عريس مش بنى آدم! مبدئها: كنت فين يا "منيل"؟!

10. النكدية

دموعها حاضرة فى كل مناسبة و العيبة – الضحكة يعنى – ما تترسم على وجهها! مبدئها: الضحك ممنوع و الزعل مطلوب!

11. الزنانة

بدل الفراشة الجميلة تجدها ناموسة لحوحة ورائك حتى تخضع لها و تتركها تمتص دمك! مبدئها: الزن ينول المنى!

12. اللزقة

ايدها فى ايدك و رجلها على رجلك .. كل خطوة و كل مكان نفسها مع نفسك. واذا حاولت الاختلاء بنفسك و نزلت تشم هوا لوحدك يبقى انت مش بتحبها … و طبعا النهاية معروفة. و يا سعدك يا هناك لو كانت لزقة و غيورة و شكاكة "طلعة واحدة"! مبدئها: الزقى لطيرك لا يلوف على غيرك!

13. النحات / النجار

امرأة مبدعة … امرأة ذكية … تريد تشكيلك على مزاجها! تريد اصلاح عيوبك و حل مشاكلك سواء رضيت أم أبيت. تصنفر جزء و تكسر جزء و لو "باظت" اللعبة ترميها و تجيب غيرها! مبدئها: جوزك على ما تشكليه!

14. المحامية

الحوار معها ممتع و طبعا كل شئ بالاقناع .. ابقى قابلنى لو وصلت لحاجة! حجتها حاضرة و كلامها مرتب و انت مش هاتعرف تمشى كلامك عليها و لا تاخد منها حق و لا باطل! مبدئها: باب النقاش و الحوار دائما مفتوح!

15. الجنرال

منظمة … حاسمة … واضحة … مطلوب منك الالتزام بالقواعد و الا حق عليها عقابك و انهاء خدمتك. مبدئها: كلامى واضح!

16. النجمة

ساطعة متألقة … محور اهتمام الجميع … و بس! لو لك اى طلبات اخرى فى شريكة الحياة يا تنسى النجمة يا تنسى الطلبات. كلامى ليس عن الفنانات و المشاهير .. أنا بحذرك من امرأة انانية لا ترى سوى نفسها. مبدئها: أنت نجمة (مع الاعتذار لصابون لوكس)

17. ذات اليد "المخرومة"

خراب بيوت مستعجل … لا هتعرف تشيل قرشين للزمن و لا هتعرف "تدكن" قرشين من وراها. مبدئها: احنا هانعيش كام مرة؟

18. ذات "الدماغ" الفاضية

جرايد ايه و أخبار مين … ما العالم عمره ما هايتصلح حاله! مبدئها: أنا مش عايزة صداع

19. ذات الرأى المعدوم

لا هتصد و لا هترد وانت هتحس انك متجوز الهوا. مبدئها: زى ماتشوف يا حبيبى!

20. ذات الحق المهضوم

كل الناس ظلمتها و ما فى شخص فهمها و العالم كله ضدها و انت عليك عبئ احتوائها بعدما فشل الجميع. مبدئها: هو انت مش راجلى؟

21. أم لمس

حساسة .. حساسة جدا … لا انت مش فاهم …. قابلة للكسر يا استاذ! مبدئها: انا اتجرحت!

22. الجميلة النائمة

نامت فى ثبات عميق لحد ما سعادتك شرفت و اضفت الملح لحياتها الباهتة. ده فخ!! انت مطلوب منك تتحول الى مصدر السعادة و الترفيه الاول و الاوحد فى حياتها … انسى حياتك انت بقى! مبدئها: انا on hold الى ان تاتى يا فارس الاحلام!

23. سيندريلا

غلبانة … بنت ناس و الزمن بهدلها … كل الناس بيعاملوها معاملة مرات الأب و انت البطل الهمام … يارب تكون عندك املاك و اطيان تعوضعها عن سنين الشقاء و ما يشبه الخدمة فى البيوت! مبدئها: ربنا يتوب علينا من الشقاء!

24. الساحرة الشريرة

ماكرة مفكرة مدبرة … تكيد كيدا و تصبر صبرا … خطط ايه و احزاب و مناوشات ايه … شخصية مسلية لكن مؤذية .. النهاردة معاك بكرة هاتبقى عليك … و هاتبيعك هدومك!! مبدئها: انت معايا ولا عليا … لو مش معايا تبقى عليا؟

Bookmark and Share