fbpx
مونتيسوري مصر- تقدمها مروة رخا

مروة رخا لمجلة احنا – أهلى كانوا صح/غلط لما قالوا

أهالينا

أهلى كانوا صح/غلط لما قالوا
 
1-إن مش كل واحد يبتسم فى وجهك يبقى صديق وعلى رأى المثل: "فى الوش مرايا وفى القفا سلاية"
 
2- إن مش كل واحد يمد لك إيده يبقى عايز يساعدك وعلى رأى المثل برضه: "ما حك ظهرك مثل ظفرك"
 
3- إن محدش بـ يموت من الحب (كُتره أو قلته)
 
4- إن الزمن بـ يداوى كل الجراح
 
5- إن البيوت أسرار والحيطان ياما بـ تدارى
 
6- إن الغرور والكبر هما ليس إلا عقد نقص فى البشرية
 
7- إن الجمال مش دايم، واللى هـ يحب شكلى النهارده بكره مش هـ يبص فى وشى
 
8– إن الاعتذار صعب … صعب أوى
 
9- إن النكد بـ يجيب الفقر والفرح بـ يجيب الحظ
 
10- إن اللى ياكل على ضرسه ينفع نفسه
 
11- إن شعرى بـ يسد بلاعة البانيو، لو ما رمتهوش أول بأول البلاعة هـ تتسد … الكلام للجارة المتضايقة وشايلة الهم (أنا يعنى)
 
12- إن الفلوس عمرها ما عملت بنى آدم، البنى آدم هو اللى بـ يعمل الفلوس
 
13- إن حتى لو قميصى مقطوع أرفع رأسى بثقة … الناس بـ تشاور بس على اللى على رأسه بطحة
 
14- إن السر لو نطقه لسانى ما بقاش سر
 
15- إن النصيحة لو قلتها على الملأ بقيت فضيحة
 
16- إن التكييف بـ يعيّى
 
17- إن البنت لازم تبقى بـ 100 رجل
 
18- إن الرجل مش بعضلاته بل بقدرته على مساندة الغير وقت ضعفهم
 
19- إن أكل العيش مُر والشغل كله زفت
 
20- إن البنى آدم اللى قلبه أسود بـ يبان غضب ربنا على وجهه
 
21- إن فيه أوقات لازم اختار بين شيئين ولما عقلى وقلبى يعجزوا لازم أغمض عينى واتكل على الله
 
22- إن مفيش حد قلبه على الواحد قد أهله
 
23- إنهم مش هـ يعيشوا لى العمر كله
 
24- إنهم مش ملائكة وممكن يغلطوا
 
25- إنى بكره هـ اكبر وافهم كل الكلام اللى لسانهم اتدلدل وهمّ بـ يقولوه
 
الكبار غلطوا لما فهمونا
 
1- إن البنت اللى بـ تكلم ولد أو قاعدة معاه فى النادى قليلة الأدب والخشا والحشمة
 
2- إن الجواز والخلفة أهم حاجة فى حياة البنت والشغل سلاح وبس
 
3- إن كل ولد خرج مع بنت مسك إيدها – على الأقل
 
4- إن كل بنت قاعدة جنب ولد فى عربية لازم يحط إيده على ركبتها
 
5- إن البنت المؤدبة لازم تروّح بيتها قبل الساعة عشرة، لإن "الحاجات الوحشة" بـ تحصل بالليل
 
6- إن البنت اللى بـ تشرب سجاير صايعة
 
7– إن شرف البنت ليس إلا عود كبريت
 
8- إن الولد مهما كان ولد فيعمل ما بداله، والرجل مهما كان رجل فمراته لازم تستحمله
 
9- إن الحب كلام أفلام
 
10- إن الضحك بصوت عالى خلاعة وقلة تربية
 
11- إن الرقص والغنى مسخرة
 
12- إن رحلات المدرسة والجامعة تضييع فلوس وبـ يحصل فيها "قلة أدب"
 
13- إن الأنشطة والمعارض والندوات تضييع وقت
 
14- إن المجموع الكبير فى المدرسة والتقدير العالى فى الجامعة أهم حاجة فى الدنيا
 
15- إنك لازم تكون أشطر واحد فى المدرسة والجامعة والشغل ولو على حساب الصداقة والزمالة … وأى حد يحاول الوقوف فى سكتك "زيحه"
 
16- إن المظاهرات "حرام" والمتظاهرين عيال مالهاش شغلة ولا مشغلة
 
17- إن الكلام فى السياسة كلام فاضى واستعراض عضلات
 
18- إن الإيمان بقضية ما والدفاع عنها تفاهه وشغل "ألاضيش"
 
19- إن معارضة الكبار بجاحة
 
20- إن مناقشة المدرس أو المدرسة عيب
 
21- إن الاعتراض على أى حاجة يجيب المشاكل
 
22- إنك قبل ما تعمل حاجة لازم تفكر الناس هـ يقولوا عليك/علينا إيه
 
23- إن من خاف سلم، فانت لازم تخاف وتمشى جنب الحيط
 
24- إنك لما تضحك كتير تقول خير اللهم اجعله خير لأن السعادة لحظات مسروقة من عيشة هباب
 
25- إن أى حد مختلف عنك فى لون أو جنسية أو ديانة أو رأى يبقى "وحش وكُخة"
من هي مروة رخا؟
مروة رخا: موجهة مونتيسوري معتمدة دولياً من الميلاد حتى 12 عام. Marwa Rakha: Internationally certified Montessori educator from birth to 12 years.

بدأت “مروة رخا” رحلتها مع “نهج وفلسفة المونتيسوري” في نهاية عام 2011 بقراءة كتب “د. ماريا مونتيسوري” عن الطفل والبيئة الغنية التي يحتاجها لينمو ويزدهر. تلت القراءة الحرة دراسة متعمقة للفلسفة والمنهج مع مركز أمريكا الشمالية للمونتيسوري

“North American Montessori Center”