بيشتمها و هى موافقة

Date posted: July 1, 2009


 

 

انا كنت مرتبطة بابن خالى من 4 سنين انا عندى 21 سنة وكان كويس جدا وبيعاملنى كويس لمدة سنتين وبعد السنتين بقى يعاملنى وحش ويشتمنى لما اغلط ويغير عليا من كل حاجة من المغنيين والممثلين اللى انا بحبهم فى التليفزيون اتخنقت من حصاره وكنت بلاقيه فى كل مكان اروحه بس هو كان كويس فى اوقات كتير كان بيخاف عليا ويحب يسعدنى بس كان بيخنقنى اوى من تصرفاته ويشك فيا لما نكون فى مطعم انى ببص للجرسون ويتخانق معايا قدام الناس واعيط وكل الناس تتفرج عليا وبعد كدة يعتذر واسامحه بس بعد كدة تعبت منه وجربت اسيبه كتير مرضيش .اهله كانوا مش موافقين على جوازنا ابدا وكان بيكلمنى من وراهم ولما قررت ابعد عنه بجد روحت قلت لاهله ودى غلطة حياتى بحس على طول ان انا شخصيتى مش كويسة عشان عملت فيه كدة وكمان لانى فى اخر 3 شهور عرفت واحد تانى وقلت له بردو عشان يرضى يسيبنى ومرضيش وبعديها لما قلت لاهله فعلا مكلمنيش تانى ابدا بقاله 3 شهور دلوقتى وغير رقم تليفونه  بس انا جبت رقمه الجديد اكلمه ولا لا انا بحبه بجد بس مقدرتش استحمله وندمانة ع كدة
_________________________________

 

 ربنا عرفوه بالعقل

انت بتتكلمى فى جواز و عيال مش بس حب و مشاعر و شهوة و تعود

الحياة اللى انت وصفتيها دى لا تطاق و واضح جدا انه عنده مشاكل .. يبقى ايه
بقى؟ ربنا فتح عنيكى و نجاكى و انت عايزة تودى نفسك فى داهية .. اقلبى الصفحة و
افتكرى ان الجواز عشرة و الولد دا عشرته وحشة و مهينه

Bookmark and Share