فى محاولة جريئة لتقريب وجهات النظر بين بنات حواء وأبناء آدم قمت بـ عمل استقصاء على أدى كده لمعرفة أغبى أسئلة بـ تعصب البنات وبـ تخنق الشباب وقررت نشرها النهارده لعلهم يتعظون.
Ladies first
فتعالوا نشوف الجنس الناعم رأيهم إيه:
1- الاستنصاح، بمعنى إنه يسأل نفس السؤال بطرق مختلفة علشان "يوقعنى" بلسانى.
أهى النصاحة دى اللى بـ توقف المراكب السايرة!
2- التحدى، يعنى الندية والراس بالراس.
فين يا جماعة شعرة معاوية ؟!
3- آلو … إنتى فين؟ إنتى مع مين؟ إنتم بـ تعملوا إيه؟ بـ تكلمى مين على الموبايل؟ الـ sms دى من مين؟ بـ يكلمك ليه؟
إيه الخنقة دى؟ الراجل من غير ثقته فى نفسه مش راجل والعلاقة من غير ثقة متبادلة مصيرها الفشل الذريع!
4- إنت عاملة فى نفسك كده ليه النهارده؟ ده فى حالة عدم وجود مكياج او فى حالة التأنق كأنه شاف أراجوز.
الملافظ سعد يا عبد العال !
5- هـ تخلصى امتى؟
همه ليه مش بـ يفهموا إن الكوافير ممكن يكون زحمة وإن الاجتماع ممكن يطول وإن المحل ممكن يكون بعيد وإن الزن ده مش كويس؟
6- حبيتى قبل كده؟
لأ يا ناصح كنت فى الدير!
بعد الخطوبة تحلى الأسئلة عن الماضى والمقارنات والغباوة اللى من النوع ده. اكذبى يا بنتى هو إنت حالفة يمين!
7 – هو إنت ليه لحد دلوقت ما ارتبطيش؟
ايه الجليطة دى!
8- إنت ليه مش عايزة تسمعى الكلام؟ هو إنت لازم تعارضينى؟ هو إنت لازم تحرقى دمى؟
إيه هو ده! هو أنا عيلة صغيرة؟!
9- صوتك عالى ليه؟ ضحكتك عالية ليه؟ لبسك ملفت ليه؟
ده بقى تخلف وغباوة وخنقة
10- إنت ليه مش محجبة؟
شوف واحدة محجبة وحل عنى
11- الحجاب بلدى، إنت ليه لابساه؟
إنت سايب كل اللى مش محجبات دول وجاى لى أنا ليه؟
الجنس الخشن إتخنق من:
1- إنت بتكلم بنات؟
لأ طبعا يا حبيبتى – إيه قلة الأدب دى!
2- إنت بـ تخونـّى؟ انت عمرك هـ تخونى؟
معقولة يا روحى؟ ده كفاية ثقتك فى نفسك!
3- كنت فين؟
إيه السخافة دى!
4- ما كلمتنيش ليه؟ مش بـ ترد عليا ليه؟
تفتكرى ليه؟!
5- إنت مش بـ تحبنى ليه؟
أقول إيه يعنى؟ ده نصيب؟
6- إنت بـ تحبنى؟ إنت بـ تلعب بيا؟
هم ليه الستات بـ يسألوا الأسئلة الغبية دى؟
7- إنت لسه بـ تحب فلانة؟
آه، استريحتى؟!
8- هـ نروح فين؟ هـ تاكل إيه؟
ليه أنا اللى لازم أقرر، هو إنت مالكيش رأى؟
9- هى فلانه سابتك ليه؟ إنت سبت علانة ليه؟
يا حشرية … يا نكدية!
10- إنت مش بـ تقول لى كلام حلو ليه زى فلان ما بـ يقول لفلانة؟
روحى اتجوزى فلان!
11- عياط … عند رؤية بيبى
ده كمين يا معلم!
12- نفسك فى بيبى؟ انت هـ تبقى أب هايل
هى يائسة للدرجة دى؟
13- ماما بـ تحبك من قبل ماتشوفك … هـ تيجى إمتى؟
قديمة!!
14- إنت اتغيرت ليه؟
إيه لعب العيال ده؟ هو الواحد لازم يبقى دادة على طول؟!
15- إنت متأكد إنك هـ تقدر تحقق كل أحلامك؟
هى للدرجة دى مش مؤمنة بيا؟
16- إنت على طول مش معاك فلوس؟
هى بـ تعايرنى؟
17- إنت ليه مصمم تحرجنى قدام الناس؟ الناس تقول عليا ايه؟ (الشبكة والشقة والفرح والذى منه).
هى كل همها الناس؟!
You must be logged in to post a comment.