رد صوتى: الوش الخشب علشان الولد يحترمنى

Date posted: May 22, 2009


 

ازيك يا مروه …يارب يكون كله تمام …مشكلتى يا ميرو انى فهمت اللعبه من الاول غلط …يعنى ببساطه كنت فاهمه ان الوش الخشب هو اللى هيخلى الولد اللى قدامى يعرف حدوده معايا وكنت فاكره ان الولد هو اللى مفروض يعد يتقرب من البنت والصح ان البنت تطنشه ومش تديله وش لحد ما تعرف هو جد وهيحترمها سوا فى علاقه زمايل او علاقه حب ولا عاوز يتسلى .

.انا على فكره مش بتكلم على علاقه الحب بس لكن كنت بتصرف كده فى اى علاقات فيها تعامل مع الولاد حتى زمايلى فى الكليه …يعنى مثلا الاقى ولد زميلى فى الكليه جيه اتكلم معايا فى موقف ولا حاجه ولما يشوفنى تانى الاقى بيبص لى كده ومش بيسلم عليا ولا حاجه ولا كانه يعرفنى…طبعا انا فى الاول بقيت بستغرب طب هو ليه بيعمل كده والموقف ده اتكرر مع اكتر من حد مع انى من جوايا مش عندى اى مشكله فى انى اتعامل مع اى ولد بدال هيحترمنى..

وانا بجد الحمدلله اللى بيقرب منى بجد بيحبنى وبيتعلق بيا كمان بس كلهم بنات ده طبعا افتكر بسببى..وبعدين فى مره سمعتك بتقولى ان الابتسامه بتبقى زى اشاره كده للبنى ادم اللى قدامك انك قابلاه او قابله تتكلمى معاه .. ف الجمله دى فوقتى شويه او انا فهمتها كده مش عارفه..وانا طبعا الابتسامه بتكون على وشى للبنات فقط ….

انتى شايفه ايه هل هى مشكلتى فعلا موضوع الوش الخشب ده ولا فى حاجه تانيه انتى حاسها او جايه فى دماغك ….انا الحمدلله ربنا مدينى حاجات كتير اوى حلوه وفى البيت عندى عمر ما حد بيقول كلمى فلان او اوعى تكلمى فلان لانهم عندهم ثقه كبيره اوى فيا .. ..مش عارفه بقى ازاى اقدر اصلح الحكايه دى خصوصا انى مش عاوزه اخسر الناس اكتر من كده وازاى بجد اللى فهمنى غلط اصلح معاه الحكايه دى …و الفتره اللى جايه هدخل فى مرحله الشغل وعاوزه بجد ابقى ناجحه اكتر من كده فى علاقاتى وفى نفس الوقت اللى قدامى يحترمنى ويعرف حدوده معايا بس من غير حكايه الوش الخشب اللى انا وقعت فيها دى او يمكن فى غلطه تانيه انا مش واخده بالى منها …فكرى كده معايا وقوليلى وانا كمان هبقى اسمع ردك واقولك

اضغط على شريط الاستماع لمعرفة ردى

Get the Flash Player to see this player.

 

Bookmark and Share