مروة رخا لمجلة احنا – حسبى الله و نعم الوكيل فيكم يا بشر

Date posted: May 1, 2008


هات ودنك لما أكلها

الموقف الأول

كوكو: البنت "المنفسنة" عليكى بـ تقول لى إن مجلة "شبح الماضى" كلموها وعايزنها تكتب معاهم بس هى رفضت لأنها مجلة مش قد كده

أنا: برافو

كوكو: بس دى بـ تقول لى إن المجلة قالوا لها دى مروة رخا كلمتنا علشان تكتب معانا

أنا: اسم المجلة إيه تانى؟

كوكو: أنا قلت لها مش ممكن طبعا مروة ما تعملش كده أبدا!

أنا: أنا مش فاكرة إنى كلمت حد قريب، بس انت إيه اللى خلاك واثق إن أنا ما كلمتش المجلة

كوكو: عيب طبعا! وبعدين انت وشك قلب كده ليه الحق عليا إنى بـ اكبرك؟!

الموقف التانى

مشمش: إيه يا مروة ده معقولة كلمتى المعدة وطلبتى منها إنها تستضيفك فى فقرة الكتاب؟

أنا: أيوا انت مستغرب ليه؟

مشمش: لأ يعنى … أصل الكاتب لازم الناس هى اللى تجرى وراه وتطلبه ما تزعليش منى بس انت كده بـ تدللى على كتابك!

الموقف الثالث

سمسم: صحيح يا مروة انت اتطردتى من OTV؟

أنا: اتطردت ازاى يعنى؟

سمسم: علشان انت لسه جاية من أمريكا وأفكارك غريبة فـالناس اشتكوا

أنا: أمريكا؟؟

سمسم: ولا همّ طردوكى علشان بـ تتكلمى فى السياسة … آه ما هو انت برضه لازم تلمى الدور شوية علشان أكل عيشك

أنا: سياسة؟ أكل عيشى؟ هو فى إيه؟؟

سمسم: بس انت عارفة أنا حاسس إن الأهالى همّ اللى اشتكوا. ما هو انت فى آخر حلقة قبل ما يمشوكى كنت بـ تتكلمى على الأهل وإن تربيتهم الغلط هى سبب كل المشاكل … حد يقول كده برضه يا مروة!

************

حسبى الله ونعم الوكيل … يعنى أعمل إيه فى نفسى، دول بس 3 لقطات من لقطات كتيرة كده تخلى الواحد عايز يطلع من هدومه!

يا كوكو مش عيب ولا حرام ولا قلة قيمة إن البنى آدم لما يعوز تفاحة يمد إيده يجيبها. فلو أنا شايفة إن المجلة دى ولا غيرها هـ تضيف ليا حاجة يبقى عادى جدا إنى أكلمهم واوريهم الإضافة اللى ممكن أضيفها لهم … أما بقى البنت "المنفسنة" يا روحى خليها تنفعك!

يا مشمش … لو انت عندك طفل وحاسس إنه ييجى منه، مش هـ تحاول تدخله مدرسة كويسة؟ ولو المدرسة اتنكت عليك مش هـ تجرى تقابل المدير ومساعد المدير وأى حد ممكن يأثر على المدير؟ هى نفس الحكاية، أنا مش بـ خلف عيال وارميهم فى الشارع … وزى أى أم فخورة بفلذة كبدها هـ اعمل نسناس علشان ابنى ياخد فرصته فى الحياة … فهمت يا أستاذ؟

أما انت بقى يا سمسم حكايتك حكاية … أمريكا مين اللى أنا لسه جاية منها؟! أنا رحت أمريكا وانا عندى 8 سنين ورجعت بعدها بسنة … مالك بقى فيه إيه؟ وبعدين أفكار إيه دى اللى غريبة هو علشان أنا مش بـ كفر الناس من عيشتهم أبقى دسيسة؟ وسياسة إيه يا عم السياسة، هو أنا لما أطالب بحق كل بنى آدم فى إنه يحب ويتحب ويكون له رأى وشخصية يبقى أنا كده بـ اتكلم فى السياسة؟؟ 

أما بقى موضوع الأهل، فأنا راضية ذمتك … أنا بقى لى فترة بتجيلى مشاكل على الميل … عادى، وعلى الفيس بوك … برضه عادى، وعلى التليفون … عادى جدا. لكن اللى مش عادى إن المشاكل دى مبعوتة من بنات وأولاد مالهمش أهل!

أيوا لما واحدة تروح البيت وشها وارم ومامتها ما تسألهاش إيه اللى حصل لها ولا مين اللى عمل فيها كده، ولما واحدة تقضى الليل كله معايا على التليفون وهى مفلوقة من العياط وبـ تتشحتف علشان قلبها مكسور، ولما واحدة تتجوز مدمن من ورا أهلها وأهله يطلقوها منه وأهلها فى سابع نومة، ولما واحد يضيع 8 سنين من عمره فى حب واحدة مش حاسة بيه وبـ تستغله وأهله ولا همّ هنا، وواحد تانى معجب بولد زيه ومش عارف يعمل إيه فى روحه … الناس دى أهلها فين؟؟ نايمين على ودانهم؟!

أما بقى يا سمسم موضوع الطرد ده … فأنا برضه مش هـ رد عليك!

 
Bookmark and Share