fbpx
مونتيسوري مصر- تقدمها مروة رخا

رد صوتي: الندية … راس براس مع الراجل

 

ازيك يا مروة، في البداية بجد احب ابدي اعجابي بدماغك، واسلوبك وكلامك الصائب بجد، وموزون بشكل مظبوط كتير..

عندي نقطة في حياتي ، عايزة اتناقش معاكي فيها واعرف هل ده صح ولا غلط، طبيعي ولا في شئ مش مظبوط، ولو كده احب اعرف منك اية الصح، او ازاي اعملة..؟

معليش هطول عليكي شوية لكن حبة افرد ورق المشكلة كلها قدامك علشان تبقا عندك خلفية كامة عن المشكلة وصاحبة المشكلة، علشان اوصل معاكي للرد المناسب..

انا عندي 26 سنة
غير مرتبطة

من عيلة كويسة ام ذكية واب طيب، واخوات انااكبرهم .

بوصي يا مروة، بختصار انا لسة متجوزتش لحد دلوقتي لأسباب ناس كتير بتعتبرها مش صح، لكن انا الوحيدة وامي ،مع بعض الاصدقاء اللي بتفكر بنفس التفكير.اللي معتبرينها صح.
السبب هو اني مش عايزة اتجوز لمجرد الجواز، ومش عايزة اتجوز وخلاص، عايزة اتجوز راجل بمعني الكلمة، وعارفة كويس قوي انا عايزة اية في الشخص ده، ومحتاجة مواصفات معينة اولها هي الرجولة اللي مش حاسة انها بقت متاحة حاليا بسهولة.

هو فعلا في رجالة لكن للأسف مش كلهم يصلحو لية.

حسة ان مش عايزة اي جوازة ولا اي حد ولا اي بيت وخلاص، زي ما انتي قولتي.
هحكيلك شوية مقتطفات من حياتي تعرفك مشكلتي اللي مش ملموسة لكنها محسوسة وانا وقلة قليلة اللي بتلاحظها.

من وانا بنوتة لسة صغيرة ، كنت اتمنا قوي اني احب واتحب زي البنات اللي معايا في المدرسة، وكده زي اي بنوتة في سني، لكن للأسف مكنتش ملفتة قوي علشان اجذب حد وحسيت بشوية قصور فية مخلية الموضوع مش بيحصل، فحاولت محاولات بأت كلها بالفشل طبعا.

لكن بعدها قررت اسيب الموضوع ده، لحد فعلا ما دخلت المعهد، وفي سنة تانية قابلت حد في اغلب المواصفات اللي اي بنت تتمناها، زي مثقف مستوا راقي، وسيم، حتي دراستة اعلي مني بكتير، كل ده بهرني في الاول، واللي بهرني اكتير انة عجبة استيلي اسلوبي الحاجات الخارجية دي اللي بتميز البنات، وبعدين لما اتكلمنا وقعدنا فترة مع بعض، وبما ان شخصيتي مكنتش نضجت كفاية، هو حس بالنواقص اللي عندي فطبيعي سابني، ولما ضغط علية اعرف السبب، قالي بعد معاناه السبب، وهو النواقص اللي عندي ، وهو قالها بشكل غير واضح قوي، لكن كان التلميح واضح، منها مستوايا الثقافي مش زية، اسلوب تفكيري مش مناسب لية، المختصر ان كل حاجة عجبتني فية، طلعت هي نفسها عيب فية، وبعده عني، واصلا مكنش في نصيب، بس لحد هنا انتهت القصة الاولي اللي في حياتي وانا عندي 21 سنة.

ومن اليوم اللي عرفت فيها عيوبي اللي هو قالهالي، قررت قرار مفيهوش راجعة.

اني اخد الايميل اللي بعتهولي واقرا كل حرف فية، واحس بية قوي واحس بعيوبي قوي، علشان تبقا دافع قوي واني فعلا اغير كل العيوب دي، اشتغلت كتير قوي علي حالي، لدرجة اني اتحولت مش بس اتغيرت، مبقتش انا شكلنا اتحول، استيل اتغير قوي، اسلوب تفكير انحرف عن اللي كنت فية لدرجة ان اللي يكلمني دلوقتي لايمكن يصدق ان هي دي البنوتة بتاعت زمان اللي من 5 سنين كانت تفكيريها عادي.

يعني من الاخر عملت زي اللي وقع وقام نفض هدومة وكمل طريقة، مع تعديل كل اللي اتبهدل فيا.
دراستي خلصتها ، ودخلت كلية تانية علشان ارتقي بتعليمي بعد ما خلصت بكالريوس ومعهد ، قررت اني ادخل الكلية في جامعة مفتوحةـ، واخد كورسات،ـ واشتغل، وارتقي بتفكيري واقرب من كل اللي تفكيرهم حلو قوي، علشان اتعلم منهم، واحاول ابقا زيهم، وفعلا بشهادة الجميع انا مبقتش انا اتيغرت جدااا، لدرجة ان ثقتي بنفسي زادت بشكل كبير قوي، وبقيت افتخر بنفسي.

برغم ان شكلي صغير قوي، ومش جميلة قوي، لكن بعرف اخلي نفسي جميلة، والحمد لله بحب شكلي قوي، جايز مش حلو قوي، لكن بحب خلقة ربنا، برغم سخرية بعض الناس من الموضوع ان شكلي صغير قوي عن سني يادوبك ادي 16 سنة ، لكن مش بحب اتك علي النقطة دي، واعتبرها نقطة ضعف، والفضل يرجع لربنا، ثم امي، بجد لما حسيت اني فيا نقص، عرفت ازاي ترفعني وتكملي النقص ده، بكلامها ونصايحة، ولما سمعت كلامها عرفت فعلا ابقا زي ما انا دلوقتي.

بس ده ولد فية حاجة مش عارفة عيب ولا ميزة، حسة بثقة في نفسي، وحسة اني عايزة الراجل المناسب لية، ولتغيري ولشخصيتي، وانتي اصلا قولتي انك لما تفكري في نفسك انك مفيكيش حاجة، علشان متقابليش ناس غلط، وتقابلي الناس الصح لما تثقي في نفسك.
ولاني حسة ان روحي صح، حسة اني عايزة الراجل الصح، مش المكسور والمشروخ من جواة.

المشكلة الحقيقية اني من طفولتي وانا الكبيرة زي ما قولتلك من طفولتي دي وانا في البيت حسة ان ماما ازكي من بابا، لكن اللي مسيطر عالبيت فعلا بابا، بابا فية مميزات كتير حلوة ، طيب حنين، محترم جداا، متتدين، لكن ساعات الحاجات دي بتبقا عيب قوي، والناس بتستغلها، لكن مع ذالك هو عصبي جدااا، زمان كان لما يتعصب ميعرفش يسيطر علي عصبيتة، ولما يتحط في مشكلة ميعرفش يبعد عن العصبية ، ويتحلي بالحكمة زي ماما او خالو، دي النقطة الوحيدة اللي مش بحبها في، يعني برغم سيطرتة علي البيت بأنة بيصرف علينا، وانة مش بيخلي مراتة تبقا هي راجل البيت، لكن كتير بحس امي بذكائها بتقدر تعمل اللي هي عايزة بس وهي محسساه ان هواللي بيقرر مش هي.

ده مش واضح للناس، وده مش بحبة، وفي نفس الوقت نفسي مبقاش كده في البيت، اوقات كتير بحس ان قرارات بابا تودي في داهية بطيبتة، قصاد قرارات ماما وخالي الكبير، انا شخصيا بعد ما غيرت من شخصيتي بقيت بحس اني بوزن الامور اكترم ن بابا، اه ساعات خبرتة في الحياة بتخلية يوزن الامور لكن مش طول الوقت، انا مش حسة انة يقدر يقود البيت لوحدة من غير ماما، لية 3 اخوات شباب معرفش يحتويهم، هما قابلين للضياع، لكن امي بتحاول تحتويهم بشكل قوي، لأن هي بتعتبر اب وام في ان واحد، برغم انهم بيخافو من بابا قوي، وبيسمعو كلامة قوي، لكن مش حسة انة يقدر مثلا زي ما امي عملت زمان لما حسيت ان ثقتي مهزوزة، ترفعلي الثقة دي.

وبحسة رامي الحمل كلة علي ماما، في مسؤالية التربية.

في عيب كمان، ماما طموحة قوي، انا اكتسبت منها الموضوع ده، بابا العكس تماما، بيعمل زي اللي بيقول علي قد لحافك مد رجليك، مبيهموش قوي الشكليات، ماما تهماها قوي، بيسقط شوية تفاصيل مهمة قوي في المواضيع.

يعني لما اتعرفت علي شاب معايا في الكورس، وجة اتقدملي في البيت، حسيت ان في القاعدة اللي ماسك الدافة ابو العريس مش بابا، وبرضة في خطوبة اختي نفس الحكاية، ابويا طيب قوي،لحد ما الموضوع اتفشكل، لكن زي ما بقولك الناس بتستغل الطيبة دي قوي.

المهم انا بحس ان من ضمن اسباب فركشة الجوازات ان بابا من الشخصيات اللي سهل يبلفة بكلمة.
انا خلاص استعوضت ربنا في موضوع ان ابويا لما يقعد مع عريس يبقا مسيطر عالقاعدة، وبقيت عارفة طلامة في حد اتقدم لبابا او عن طريق بابا، يبقا الموضوع متفركش، مع العلم ان بابا شخصية محبوبة من الجميع، والناس بتحترمة برضة علشان سنة هو تقريبا 55 سنة

المشكلة كمان دلوقتي ، اني خلاص بقيت مركزة في اني اتغير، واعدل من حياتي وشخصيتي، ومحدده اهدافي في الحياة وعايزة ابقا سيدة اعمال ، برغم اننا طبقة فوق المتوسطة بشوية ، لكن عايزة اعلي بكتير قوي عالمستوي ده، والاهم عندي اني احقق اهدافي اللي مخطتتلها.

فده بيخليني انشغل عن موضوع الجواز، وانا فعلا اخترت الطريق ده علشان كده، لكن بعدين لاقيت طعم النجاح حلو لدرجة ان مش مخليني مضايقة زي زمان اني لسة متجوزتش، ولا للقيت الراجل اللي في دماغي.

المشكلة اني بقيت كل ما اقابل شخص، احس ان دماغة مش حلوة، وببص للراجل مش اني انثي بتبص لذكر، لأ بقيت ابص لدماغ بتبص لدماغ، عايزة دماغ معينة فبلغي كل المواصفات التانية، بخلاف اني عايزة حب وانة يبقا وسيم، وانة يبقا من مستويا الاجتماعي والدراسي، وانة يبقا طموح اعلي مني او زي علي الاقل، اللي بيهمني اكتر الدماغ، عايزة واحد اسلملة حياتي، ومستقبلي واطمن وانا معا، الامان مبقتش حسة بية، ضايع مني الامان، والامان اقصد بية الامان المعنوي اكتر منة المادي.

والامان عندي في التفكير، عايزة واحد دماغة حلوة واحسن من دماغي كمان، عايزة واحد كملي اللي ناقصني، لاني بعتبر ان الجواز مشاركة وتكملة للنواقص عند كل واحد، مش اتنين يبقا واحد او اتنين متشابهين، لكن محتاجة التكامل قوي.

والرجالة اللي قابلتهم ودماغهم عجبتني قوي، وجذبتني جداا، فيهم عيبين.

اما يكونو مرتبطين فعلا، وده مستحيل افكر فية، لان اللي مرضهوش لنفسي مرضهوش لغيري.
واما اني مجذبش الراجل ده، والسبب بيرجع ان هو بيحس بأني مش انا اللي هيرتاح معايا خصوصا ان ساعات بحسهم مش بيحبو شخصيتي القوية، ولا الواثقة قوي في نفسها، مع ان هما مش يعرفو اني لو حبيت هبقا اللي في دماغهم هبقا الانثي اللي بيدوره عليها،وبيتكتفو بأني ابقا صديقة وفية، لكن انا لأغية شوية الانثي دي علشان مش تتفجر الانوثة وتخليني مركزش في حاجة غيرها وابقا عايزة اتجوز والسلام،زي اغلب البنات دلوقتي،اما انا حطة قلبي في ايدي وعقلي بس هو اللي بيشتغل دلوقتي ، بقيم كل واحد يحاول يرتبط بية تقيم كلي علشان مش عايزة اتجوز وبعدين يبقا قدامي خيارين اما اني اطلق وده مش هيبقا اقل من تأخر سن جوازي يعني الاتنين واحد ويبقا كأنك يا ابو زيد ما غزيت.

او اني اجبر نفسي واعيش معا ، وانا مش حسة ان ده الراجل اللي اناعايزة، وبالتالي هنفر منة.( بدل ما يقولة مطلقة، او لسة متجوزتش، او خطبتت وفركشت) مع العلم اني لسة لحد دلوقتي متخطبتش لاني مش لاقية اني اقرر اتخبط علشانة، حتي اختي اللي اصغر مني اتخطبت قبلي، لكن زي ما قولتلك مكملتش، برضة موضوع ان انا واختي لسة متجوزناش لحد دلوقتي يضايق شوية، لكن الحمد لله امي واعية وابويا وعارفين ان ده نصيب، واحنا مش بيهمنا كلام الناس طلامة مش بنعمل حاجة غلط، وبنشتغل وبنكمل دراسات حرة، ومؤدبين وعارفين حدودنا، وبنات استيل ومن عيلة محترمة، فعادي ان مش يهمنا كلامهم لان مش بنعمل حاجة غلط زي ما بقولك.

مش عارفة، بس كل تفكيري اني مبقاش راجل البيت في الباطن .

انا بقا مش عارفة اعمل اية في اللي وصلتلة، قفلت علي قلبي، وبقيت جامدة، ولا بقيت عارفة ادخل حد قلبي بسهولة، ولا بقيت قادرة استحمل عيوب اكتر من كده، واللي بيعجبوني قوي، مش مناسبين لية خالص، او انا مش بعجبهم، وفي كل الحالات يبقا الوضع علي ما هو علية.

انا كل يوم سن جوازي يتأخر و خايفة استمر علي الحال ده من غير ما احل المشكلة دي.

ملحوظة: خوفي مش من تأخر سن الجواز قد ما هو خوف من العيب اللي وصلتلة في شخصيتي يأثر فيما بعد علي حياتي بشكل عام.

جايز المشكلة محدش حاسس بيها دلوقتي لكن حسة ان بعدين هحس بيها.
انا بقيت جامدة في مشاعري، وبقيت شكاكة بشكل يخنق، واوقات بحس ان ده بيستفز الراجل اللي بيفهمني وبيعجبني تفكيرة، حتي الحنية بقيت احس انها اختفت من حياتي بشكل عام.

تعرفي انا من كتر ما بقيت اخاف حد يغدر بية محوطة قلبي بأسوار كتير قوي، وللأسف مش بيقع تحت ايدي غير رجالة تافه قوي، ولا مبلا في الحياة، ولا عنده هدف يعيش علشانة ولا حاجة خالص.
انا بحلم براجل هو اللي يغيرني يفجر في اعماقي الانثي، مش راجل انا اللي اغيرة، انا عايزة راجل يحتويني مش بس انا اللي احتوية.

محتاجة زي ما هدي اخد.
انا اديت زمان كتير قوي ومخدتش حاجة.

ودلوقتي مبقتش ادي غير بحساب، وللأسف مش لاقية اصلا اللي ياخد مني، فبتالي بقا عندي كبت مشاعر كتير قوي، وللأسف اكتر بقيت حسة اني محتاجة للجواز، لكن كرها نفسي علي عدم الجواز غير لما اقابل الشخص المناسب، كل همي بجد اني متجوزش جوازة والسلام.
عارفة يا مروة، هقولك جملة قالهالي واحد من اللي اعجبت بيهم لكن محبتهمش علشان مرتبط، والاهم اني مجذبتوش.

انتي عايزة راجل تحطي راسك عالمخدة وانتي مطمنة انة هيبقا قد مسؤالية انة يدير حياتك وحياتة بشكل صح، ويكاد يكون احسن منك كمان.

اسفة جداا طولت عليكي بس بجد تعبانة ومش عارفة هتقدري تلمسي مشكلتي اللي بين السطور ولا لأ..؟؟
منتظرة ردك لأني بجد محتاجة اسمع ردك قوي.لان كلامك موزون قوي وبيعجبني.

سوري في نقطة مهمة فاتت مني مذكرتهاش في الكلام احب اوضحهالك

اني للأسف مؤخرا بعد ما شخصيتي اتغيرت بقيت اجذب ناس كتير
، واغلبهم موجود فيهم المواصفات اللي عايزاها
ومع ذالك مش بوافق لأني بلاقي فيهم انهم بيكملو بية اللي ناقصهم
يعني شخصيتي قوية وهو مش شخصية بنفس القوة او اقل بكتير
او شبة ملغية
برغم ان مديش اني اوافق علي حد كده ده مستحيل
مش هيملا عيني وبرفض طبعا
بس الغريب ان اللي بيعجبوني مش بجذبهم قوي ممكن نبقا اصدقاء كويس قوي لكن بحس ان لحد الحب نو

 

 

 

من هي مروة رخا؟
مروة رخا: موجهة مونتيسوري معتمدة دولياً من الميلاد حتى 12 عام. Marwa Rakha: Internationally certified Montessori educator from birth to 12 years.

بدأت “مروة رخا” رحلتها مع “نهج وفلسفة المونتيسوري” في نهاية عام 2011 بقراءة كتب “د. ماريا مونتيسوري” عن الطفل والبيئة الغنية التي يحتاجها لينمو ويزدهر. تلت القراءة الحرة دراسة متعمقة للفلسفة والمنهج مع مركز أمريكا الشمالية للمونتيسوري

“North American Montessori Center”