رد صوتى: باسنى و فضحنى

Date posted: April 17, 2009


 

اولا انا بحبك موت وانا اصلا مش من النوع الي ممكن يسمع البرامج الي فيها مشاكل عاطفيه بس بجد والله انت الوحيده الي بسمعلها حتي ماما من كتر ما انا بسمعك بقت بتحبك هيا كمان
المهم انا عايزه احكيلك وافضفض معاكي بس انا عارفه اني غلطانه اوي كمان ومش عارفه ارجع الزمن لورا عشان اصلح الغلط
مش هطول عليكي
في حاجه صغيره بس عايزه اقولها في الاول ان انا من مواليد برج العذراء الي مش سهل عليهم ان هما يحبو 
بس الي حصل ان انا حبيت واحد وهو كان اول حد في حياتي اصلا علي الرغم ان كان عمري وقتها 23ومكنش ليا اي تجارب قبل كده 
هوه كان لسه طالب علي الرغم من انه اكبر مني ب4 سنين وحصل ان احنا اتفقنا في كل حاجه الصغيره قبل الكبيره تفاهم مش طبيعي بيني وبينه من اول كلمه وبعد شهر من تعرفنا صارحني انه بيحبني وعايز يكمل معايا المشكله انه لسه طالب طبعا انا كنت حاسه بحاجه نحيته بس لسه مش عارفه ايه هيه 
كان في بس مشكله صغيره هوه من القاهره وانا من محافظة فكان المقابلات صعبه وبالرغم من كده عمره مفوت اسبوع مجاش فيف ومش هتصدقي لو قلتلك انه كتير كان بيجي تلات واربع مرات في الاسبوع الواحد مش هشغلك بالتفاصيل والحوارات الي كانت بتحصل لان كلها كان بيعدي 
كان في حاجه هوه حاول اكتر من مره انه يحصل بينا اي حاجه بس انا كنت بصده وبعد فتره من كتر الخناق والزعل كتتتر اوي بسبب الموضوع ده جه لوحده والله في مره وقالي ان الموضوع ده اصلا هيبقي بتعنا العمر كله ف مش مشكله وانه خلاص مبقاش زعلان مني 
المهم عدت السنه وهوه نجح وفعلا جاب اهله علي معادنا ووالده ووالدته فرحوا بينا جدا والله ونزلنا اشترينا الشبكه ولبسنا الدبل وخلاص كل حاجه بقت تمام
مره كنت معاه في القاهره وقالي متيجي نشوف العمال في الشقه قلتله ماشي وفعلا رحنا والعمال كانو شغالين وقعدت ارص الشقه في خيالي وهنا كذا وهنا كذا ونزلنا واحنا مبسوطين اوي ف واحنا في العربيه وعلشان الشقه في حدايق الاهرام والمنطقه مفيهاش حد حصل انه اول مره يبوسني وانا بجد كنت مبسوطه اوي وكنت طايره كمان وانا في حضنه
المشكله انه بعدها ابتدي يتكلم معايا في التليفون في كلام انا محبتش اني اتكلم فيه فكنت بسكت ومردش لان انا بطبعي خجوله جدا وبتكسف لقيته هوه ابتدي يتخانق ويقولي بعد اللي حصل مينفعش انك تعملي معايا كده اسلوبه ابتدي ميعجبنيش واحس انه ماسك عليا زله ومش عارفه ايه الصح اتكلم معاه بس انا مش عارفه هوه عايز يقول ايه ويعني ايه انا مش متجاوبه معاه وكلام كتير مش عارفه ايه سببه 
وانا كنت بستحمل نرفزته واحاول اهديه لحد ما جه في يوم واعترفلي انه بقاله اسبوع بيعرف واحده مطلقه معاه في الشغل ونايم في بيتها بقاله اسبوع علشان ادتله حاجه نقصاه وهو معايا 
عارفه والله محستش بنفسي ولا ايه اللي حصلي وقتها ومن كتر الصدمه معرفتش ارد وهو كمان كان بيعيط وبيقولي ان انا السبب 
قعدت عيط طبعا وهو قعد يحلف انه عمره مهيكرر ده تاني وانه عايزني اسامحه في وقتها انا مش عارفه كان مالي بس قلتله خلاص ماشي محصلش حاجه وكلام عبيط كده 
بس انا مش مرتاحه قعدت اسبوع مش عارفه انام ومش ببطل عياط وماما عايزه تعرف في ايه وانا مش عارفه اقول ولا احكي لحد 
المهم بعد الاسبوع قررت ان انا مش هقدر اكمل واتصلت بيه وقلتله ان انا مجروحه منه اوي ومش هقدر استحمل 
لقيته بقي انسان تاني واتحول 180درجه وقلي راجعي نفسك احسنلك
انا مفهمتش من ده انه كان بيهددني 
بس تاني يوم قالهالي بصراحه ان انا لو معشتش معاه برضايا هعيش غصب عني وان انا مليش اي راي او اختيار اني اسيبه وهو كل الي هيعمله انه هيحكي لماما واخويا علي اليوم اللي رحنا نبص فيه علي الشقه لوحدنا واللي حصل يومها وهتجوزك برضاكي او غصب عنك
انا لما سمعت الكلام ده مبقتش مصدقه ومبقتش حتي عارفه اعمل ايه رحت قافله الموبايل ومبقتش برد عليه راح هوة مكلم ماما وحكالها وقالها انه هوه مضحي وقابل بيا بعد الي حصل وانه ياعيني رضي بالهم والهم مرضيش بيه 
من يومها انا مردتش عليه وبعدها قعد يبعت لماما في
رسايل ويعتذر ويقولها حرام عليكي انت كده الي هتحرمينا من بعض وشغل جنان الموضوع ده حصل من شهر بس انا لسه تعبانه جدا مش عارفه طيب لما الواحد بيحب حد طبيعي بيامن له واحنا مخطوبين ولابسه دبلته في ايدي والشقه دي رحنا كلنا اول مره نشوفها كانت ماما واخويا ومامته وباباه واخته وجوزها والدنيا كلها كانت معانا ليه هوه عمل كده مش قادره اعرف ومش قاده افهم 
حاسه ان السكينه لسه سارقاني ومش متزنه 
اه نسيت اقولك انه يوم الجمعه اللي فاتت هوه حاول يكلمني بس انا مش برد علي نمرته راح بعت رسالتين اول واحده
( "يارب اسمع صوتك انا ندمان اوي عليكي

تاني واحده 
(سمحيني يادووري احنا ملناش غير بعض كفايه كده
(
بس انا مش قاده اسامحه علي اللي هوة عمله فيا هوه انا كده صح ولا ايه مش عارفه ارجوكي ردي عليا

المشكله اني حاسه اني مكسوره مش قادره ارفع عيني في ماما ولا اخويا
وعندي طول الوقت احساس ان هما عمرهم ما هيثقو فيا تاني 
هما معاهم حق طبعا بس قوليلي اعمل ايه
يا دكتور ممكن سوال تاني معلش
هو انا كده ابقي اتنازلت عن مبادئي لما سمحتله بكده
وهوه مش كل اتنين مخطوبين ممكن يحصل بينهم حاجه ولا انا كده بنت مش كويسه ؟؟؟؟؟؟؟

المهم انا جيالك بمشكله اكبر من اللي فاتت
اتقدملي واحد ابن صاحب بابا الله يرحمه وماما مصره تجوزهولي
وانا مش عارفه اقول لا مع ان الولد اقل مني في التعليم ومش عارفه اتصرف
وكل شويه تفكرني ب احمد 
قوليلي عشان خاطري اعمل ايه
انا مش مستعده لاي حاجه دلوقتي ومش قادره انطق

انا علي فكره منمتش طول الليل لان اللي حصلي من ماما واخويا كان نصه كفايه والكلام الي انا سمعته عمري مكنت اتصور اني اسمعه
واخويا كان هيضربني وقالولي اني هاتجوزه غصب عني هوه انت نسيت انت ايه وانت فاكره انه لو عرف عنك حاجه هيبص في وشك هوة ولا غيره 
هوه انا ايه يا دكتور
هوه انا لازم ادفع تمن الغلطه الي انا غلطها 
هيه كانت غلطه كبيره اوي كده
انا الموت ارحم عندي
وعلي فكره هوه مش بس اقل مني في التعليم لا ده كمان عنده بهاق
ومش ممكن اتجوزه ابدا ابدا ابدا
انا قريت المشكله بتاعت البنت الي كان ليها علاقه بتلات ولاد قبل كده وعجبني ردك اوي عليها بس لقيت نفسي بحسدها انها مفيش واحد من التلاته دمرها وقال لاهلها مع انها مكانتش اتخطبت لحد منهم
انا حاسه ان حياتي بتنهار وانا واقفه متكتفه

اضغط على شريط الاستماع لمعرفة ردى

Get the Flash Player to see this player.

 

Bookmark and Share