مروة رخا لمجلة احنا – انا ولد بـ اتكسف من خيالى

انا ولد بـ اتكسف من خيالى

صباح الخير يا مروة

انا اكتر انسان خجول في الدنيا من البنات. انا عارف ان مشكلتي تافهة بس تعباني و المشكلة دي ترتب عليها اني حبيت عالنت واحدة لسة معرفش اي معلومة اكيدة … انا حتى مش متأكد انها ولد ولا بنت بس مفيش غيرها عبرني. الخجل دا ضيع مني حبي الاول اللي طبعا كان من طرف واحد لاني مقدرتش اروح اكلمها. الخجل دا هيقف في طريق تعييني في اي وظيفة خصوصا ان مجال مهنتي يعتمد بصفة اساسية على الكلام و الحجج و الاقناع. انا عامة مش ناجح اجتماعيا اوي و اعتبر ناجح في الدراسة و متفوق على غيري و لى اخوات بنات و من سخرية القدر اني متخرج من مدرسة لغات مشتركة. انا بحاول اوصف كل ظروفي عشان حضرتك تعرفي تديني النصيحة المناسبة. على فكرة انا دمي تقيل و شكلي اعتقد انة اقل من المقبول حتى لو ماصادفتش الحب لكن انا هدفي اني اعرف اعيش وسط النس بطريقة سوية انا هكون مدين بكل الشكر لو وقت حضرتك سمح بالرد و ابداْ النصح و ربنا يخليكي لكل الشباب بجد
سلام

………………………………………………
قبل لما ادخل فى الرد على مشكلتك تعالى نتفق على شوية نقط:

اولا اى شئ بيزيد عن حده بيتقلب ضده. يعنى الجرأة لو زادت بتبقى بجاحة و قلة حياء و الخجل لو زاد بيبقى تقوقع و تهميش للانسان ككل.

ثانيا: ان الله لا يغير ما بقوم حتى يغيروا ما بأنفسهم. يعنى ربنا مش هيديك الوظيفة اللى انت بتحلم بيها و البنت اللى نفسك فيها و الوضع الاجتماعى اللى انت تستاهله الا لما انت تشقى و تتعب و تغير من نفسك علشان تستحق الحاجات دى عن جدارة.

ثالثا: لو انت بتدور على حبوب الشجاعة فـ دى مش عندى و لا عند الاطباء و لا عند الصيادلة … مفيش حاجة اسمها حبوب الشجاعة. الشجاعة دى صفة نابعة من داخل الانسان و بتنعكس على تصرفاته.

رابعا: اللى اتبنى فى سنين مش هيتهد بمقالة و مش هيتبنى غيره بكلمتين منى. انت محتاج صبر و ارادة و تحكم فى الذات علشان تغير من نفسك

ندخل بقى فى الموضوع؛ علشان اقدر اساعدك تعالى كده نعدد خسايرك بسبب الخجل:

اولا: اصدقائك – انت بتتخانق معاهم لما يسيبوك واقف لوحدك و يطولوا فى السلام او الكلام مع البنات

ثانيا: اصدقائك – بكرة كل واحد هيرتبط و يسيبك لانك مش اجتماعى و مش هتكون مرتاح فى وجود نصه الحلو

ثالثا: زميلاتك – انت مش بتكلمهم و لا بتتعامل معاهم و لو حاولت بتكون متوتر او عدائى

رابعا: سمعتك – تدهورت من ولد مؤدب و متربى الى ولد مالهوش فى البنات و معقد و الكلام دى فى مجتمعنا عامل زى العيار اللى مش بيصيب لكن بيدوش

خامسا: حبك الاول – ضاعت البنت و هتضيع كل بنت لانك مش مقدام و البنات بتحلم بالفارس الهمام. فانت كده لو هتتجوز هتبقى جوازة من واحدة متسلطة شخصيتها قوية و عايزة تابع او من واحدة لخمة قوى و ربنا يستر على بيتكم و ولادكم.

سادسا: الوظيفة – انت عارف ان كل ما الوظيفة كبرت المرتب هيكبر و كل ما انت بعت نفسك صح فى الانترفيو كل ما الوظيفة كبرت و كل ما كنت واثق من نفسك كل ما الانترفيو هيعدى على خير.

سابعا: انت = ايوة هتخسر نفسك و احترامك لنفسك و صورتك قدام نفسك.

طبعا ده غير المشاكل اللى الهروب للنت هيجيبها و الناس اللى هتلعب بيك علشان انت مش عارف تعبر عن نفسك. انا مش قصدى اسود الدنيا فى وشك لكن انا عايزاك تقتنع ان كده مش هينفع. انا سعيدة انك بعت المشكلة بس انا عايزاك تستجمع عزيمتك علشان نعرف نحل المشكلة.

فى مقولة بتقول ان افكارنا مع الوقت بتتحول الى واقعنا و بالبلدى اللى بيخاف من العفريت يطلع له. خوفك من الانثى حولها الى مارد مرعب فى خيالك. فأول حاجة هنصحك بيها انك تدى للمارد حجمه الحقيقى. البنت بنى ادم زيها زيك … دى كمان فى اغلب الاحيان بتبقى خايفة و مرعوبة اكتر منك. خايفة لا شكلها ميعجبكش و لا تقول حاجة غلط تضحك عليها و لا تتلخبط فى الكلام فتقول عليها عبيطة و لا و لا و لا … قبل ما تفكر ترتبط انا عايزاك تقرب من اخواتك البنات … اتكلم معاهم … اسألهم عن رأيهم فى حاجات تخصك و حاجات عامة … حتى لو صدوك اول مرة بحكم العادة حاول تانى و تالت. اخواتك دول زى مدرسة السواقة هما اللى هيدولك اول درس فى تفكير البنات و اهتمامتهم.

برده قبل ما تفكر ترتبط و بعد ما تعدى مرحلة اخواتك البنات انا عايزاك تغزو عالم الزميلات. ايوة يا بطل … تروح تسأل عن محاضرة و لا دكتور و لا كتاب و لا مكان بره الجامعة عايز تروحه. فى الاول هيضحكوا عليك لانهم مش متعودين انك بتكلمهم لكن بعد كده هيبتدوا يردوا عليك و الكلام هيجيب بعضه. اقولك سر .. بدل ما تتعب نفسك فى البحث عن مواضيع اسال اسئلة و سيبهم يتكلموا .. كدة الحواجز هتختفى اسرع. اسئلة ممزوجة بالمجاملة زى انا عيد ميلاد اختى جاى و مش عارف اجيب ايه؟

كدة المارد دخل القمقم. مطلوب بقى دلوقت تغيير صورة ذاتك. يعنى انت لما بتبص فى المرايا بتشوف ايه؟ من كلامك انت بتشوف حاجة تقرف … ولد دمه تقيل و شكله مش حلو و عدوانى و منعزل و الناس مش بتحبه. صورة الذات دى مش بس انت شايف نفسك ازاى .. دى كمان انت هتخلى الناس تشوفك ازاى. لو انت مش عندك ثقة فى نفسك الناس هتشوف صورتك مهزوزة. اسأل نفسك انت عايز الناس لما تبصلك تشوف ايه و حاول كل مرة تبص لنفسك فى المرايا تلاقى الصفات دى.

اخر نصيحة عندى هتبقى فى قسم المهارات الاجتماعية

اولا مش مطلوب منك تكون ولد ظريف و ابن نكتة لو انت مش شايف نفسك كدة لكن ممكن تبقى الولد المثقف او الولد اللى يعتمد عليه او الجدع او كاتم الاسرار او اللى بيحب يساعد الناس او المستمع الجيد … اختار لك وظيفة اجتماعية من دول و هى دى اللى هتقدم نفسك بيها فى اى تجمع لحد لما الصفة تثبت. يعنى لو ساعدت واحد و اتنين و تلاتة الناس هتقول عليك خدوم.

ثانيا ابتسم دائما. الابتسامة بتنور الوش و بتكون زى دعوة مفتوحة للناس انها تقرب منك و تكلمك. الابتسامه هتدارى خجلك و توترك لان عضلات وشك كلها اتحركت. الابتسامة هتنور عنيك و البنات بتحب العنين اللى بتلمع على عكس الوش المتجهم و العين المطفية

ثالثا اتنفس. ايوة اوعى تنسى تتنفس لا صوتك يتحشر و وشك يحمر و الدنيا تبوظ. بين كل جملة و التانية اقف و خد نفس (من غير صوت) علشان تعرف تكمل الحوار.

رابعا اسمع اكتر ما تتكلم علشان تقلل حجم الخساير

خامسا بص للناس فى عينها و انت بتتكلم مع الحفاظ على الابتسامة و الا شكلك هتبقى زى اللى عامل عملة و الناس هتنفر منك

سادسا اهتم بمظهرك. شعرك و لبسك و بارفانك و سنانك لان الناس بتتقبل الانسان المهندم السمح اكتر من الانسان المبهدل فى نفسه

النصائح دى كمان هتساعدك فى الانترفيو و الشغل و ربنا يوفقك.