رد عاطف على مقال عزيزى الرجل الشرقى أفضل أن اكون عشيقتك مش مراتك

Date posted: March 10, 2009


رد عاطف على مقال عزيزى الرجل الشرقى أفضل أن اكون عشيقتك مش مراتك لمجلة احنا

عزيزتي مروة رخا

اعذريني قد نتفق ونختلف في كثير من الامور حول الزواج وانا لا اعلم شخصيا انكي كنت متزوجة ام لا ام في علاقة عاطفية سواء حب او ارتباط او خطوبة ام لا ولكن الذي اعلمه جيدا انني حاليا اعد كتاب اسمه ثقافة الزواج وذلك من خلال تجربتي المريرة التي يعرفها عني القليلون جدا وبالطبع من احدهم شخصك المصون .

ما كتب في المقالة عن تفضيلك لدور العشيقة وليس الزوجة له رد عن طريق مواقف تجعل الرجل يشعر انه تزوج من اجل ان يكون الخادم المطيع والزوج الحنون والبنك المتنقل واحيانا شيال الهموم والهدوم والعيال ان لزم الامر واليكي بعض المواقف تحدث مع كثير من الاصدقاء:

الموضوع الكبير جدا

 الحمام

زمان وقبل الجواز كان الواحد متعود يرجع من ماتش الكورة وهوه ريحته عمله زي الكلب الميت بل احيانا كلب ميت فعلا وكان لما يدخل البيت وتقابله ستي الحاجة تققوله حمد الله على السلامة ياحبيبي يالله خدللك حمام وغير على ما اجهزلك الغدا او العشا ويبدأ الواحد يقلع هدومه في السكة لغاية الحمام ولما يخلص يطلع على السريع يدور على اي هدمة يلبسها ولو مالاقاش بتبقي الفوطة زي الفل لغاية لما يخلص اكل لكن ياعيني ويالهوي ويا خرابي على اللى حيحصل لو حضرتك مرجعتش من بره واخد الشور بتاعك ودي الكلمة اللى كله بيتعلموها الستات وهدومك من بره بره على التنضيف وكأنك من عالم تاني ويمكن يزيد الموضوع شوية بكلمة ياريت متكررهاش تاني لو سمحت يا بيبي قال يعني عيل صغير

الأكل بره البيت

زماااااااااااااااااااااااان لما كان الواحد يتعزم بره مع اصحابه كانت احلي حاجة في القعدة اللى يخطف من اللى جنبه واللى يخلص اسرع واللى يعمل ابو العريف وياكل اكبر قدر ممكن دلوقتي ياحرام كان الواحد معزوم في رياسة الجمهورية او كأن الأكل محطوط زينة يعني الناس تكلف على نفسها وتتعب وتعمل والآخر يرجع الاكل على التلاجة وتبدا النصايح من البيت وقبل النزول ياريت ما تمدش ايدك على الاكل قبل ما صاحب البيت ياكل وياريت بلاش تطلع صوت وانته بتمضغ وياريت تكون الشوكة في ايدك الشمال وبلاش تقولي حرام وحلال مش ناقصين فضايح كفاية انك حتاكل كل اللى في الطبق وتفضحنا ومش حتاخد عينات زي ولاد الاصول وكان الست هانم كان ابوها كبير الياوران وامها بتشرف على تنظيم حفلات الست الوالدة بتاعت جناب حرم سفير قنصل الوز في بلجيكا البلد

النوم عصرا وليلا

زمان لما الواحد كانت تاخده الجلاله وينام على رأي المثل النوم سلطان سواء كان على الكنبة ولا على الارض ولا حتي في شوية هوا العصاري في البلكونة بعد غدوة متينة وكباية شيء من ايدين الحاجة اللى يرحمها ويبشبش الطوبة اللى تحت راسها ويهد ام مراتي دولقتي تلاقي حد بيضربك في كتفك ومعندوش الا اجابتين يا تدخل تنام في اوضة النوم وبالتالي مع اول كلمة النوم راح خلاص الهي وانته جاهي تقرف مزاجها زي ما قرفت مزاجي او الاجابة التانية تحب اغطيك احسن تبرد يا حبيبييييييييييييييييييييييييي وده طبعا علشان تكون صحيت وخلاص حسبي الله ونعم الوكيل

اما بالليل فياريت تغسل اسنانك اللى ريحتها جايبة لغاية اخر الشقة وتغسل رجلك وتقلع الروب وتعلقه مع اني والله العظيم لما بتفرج على التليفزيون بشوف الناس بتحط الروب على الارض وبيبقوا من غير هدوم اصلا

ليلة الخميس يا عمدة

الليلة الموعودة تبدأ عادة بالنصايح الغلسة والبايخة يا ريت تلخص انا تعبانة العيال قرفوني او اسمها ايه اللى علمونا واحنا في تانية اعدادي انها بتيجي 5 ايام في الشهر ونلاقيها بتيجي تقريا كل 5 ايام في الشهر معرفش ليه علشان يبقي انا كان نفسي بس

الفرجة على التليفزيون

زمان وياريت ترجع يازمان زي زمان الفرجة على التليفزيون كانت تحلي في أي وقت وفي أي شكل وخصوصا لما يكون فيه ماتشات كورة من اللى بيلعب فيها سيد الكل الاهلي (على فكرة ماليش في الكورة بس مراتي اهلوية ) كان الواحد يجري على عم اسماعيل بتاع اللب مع قزازتين خروب ساقعين ومفيش مانع لو الحاجة كانت عاملة شوية حلويات لزوم الاهلي وحبايب الاهلي ويبدا الماتش وتلاقي اكل بدأ المسابقة العالمية في التقشير والنفخ والتف والرمي وكأنك قاعد في استاد الحكومة مش في ملك ابوك ناهيك ودي كلمة سمعتها من مراتي برضه عن شوية الشتايم اللى بيخدوها اللعيبة والحكم اثناء المباراة انما دلوقتي ويعيني وياخرابي ويالهوي على دلوقتي ممكن يكون وقت الماتش هوه وقت مسلسل ام سيد وعيالها السبعة التايهيين في بلاد الواق واق وياويلك يا ضلام مش يا ظلام لأن التانية احن من الاولي في المعني لو فكرت تفتح خشمك وتعترض ولو لا سمح الله مكنش في حاجة وقت الماتش او ربنا كان كرمك بتلفزيون تاني في اوضة العيال يبيقي الفرجة بأدب وكأنك بيتحقق معاك في دهاليز امن الدولة عمرك شفت حد بيتكلم هناك ولا بيتفرج ويمضي وهوه ساكت فاهم يا شاطر.

الخروج للشراء من خارج المنزل

بنت بارم ديله حرمنا المصون من سكان منطقة من ارقي مناطق مصر وبلاش نعمل دعاية اكتر من كده وكان الهوم ديلفري عندهم زي الميه والهوا لدرجة ان شرايط الفيديو والصيدلية بيوصلوا بنفس الطريقة ولكن بعد الجواز مضطرين واحنا من سكان المناطق الراقية بس الجديدة والبعيدة اننا نروح بنفسنا ومش لوحدها – جملة اعتراضية الله يرحمك يا امه – علشان نجيب حاجة الشهر او الاسبوع واللى غالبا بتخلص بعد يومين او يترمي اكترها علشان الاكسبير بتاعها خلص غير كمية العروض الى فاكر منها كويس عرض كان ممتاز على شوية حاجات عليها تخفيض كبير جدا يجي 50% وانا فرحت ولما رحت البيت كانت عبارة عن مجموعة ادوات العاب البحر للأطفال مع اننا مكنش عندنا اطفال وقتها وقالتلي اهه محدش عارف لما يجوا الاطفال حيبقي في فلوس ولا لأ. ولكن الاهم في الموضوع انني كنت اسمع قبل الجواز منها كلمة حاضر نعم طيب كتيرررررررررررررررررررررررر وفي مرة سألتها يا حبيبتي هوه انتي ليه لسانك عامر بالذكر الطيب ده فقالتلي علشانك ياروحي وعلشانك مقلكش كلمة تزعلك وعرفت بعدين انها كانت بتحفظني التلات كلمات دول.

عرفتي ليه يا مروة مقارنة العشيقة افضل وبعدين النقطة الاهم في سيد السيد انه بيحب مراته جدا ومبيحبالهاش البهدلة وبيصونها في بيتها انما الباقيين ميفرقوش معاه بتلاتة صاغ (عملة قديمة كانت تستخدم ايامنا) وعلشان كده ترقص ولا تقول ولا تقلع ولا تلبس وانا مالي وانا من بقيت اهلها

Bookmark and Share